މަރުގެ އަދަބު ދިނުމުގެ ގާނޫނަށް އަމަލުކުރަން ފަށައިފި

ރާއްޖެއަށް މަސްތުވާތަކެތި އެތެރެ ކުރާ ފަރާތްތަކަށް މަރުގެ އަދަބު ކަންޑައެޅުމުގެ ގާނޫނަށް އަމަލުކުރަން ފަށައިފި އެވެ

މި ގާނޫނަކީ މަސްތުވާ ތަކެއްޗާއި ބެހޭ ގާނޫނަށް ގެނައި ދެވަނަ އިސްލާހެވެ.

މި ބިލު މަޖިލީހުން ފާސްކުރީ، މިދިޔަ ޑިސެމްބަރު މަހުގެ 3 ވަނަ ދުވަހުއެވެ. މި ބިލު ރައީސުލްޖުމްހޫރިއްޔާ ތަސްދީޤު ކުރެއްވީ، މިދިޔަ މަހުގެ 6 ވަނަ ދުވަހުއެވެ.

އިސްލާޙުގައި މަސްތުވާތަކެތި ރާއްޖެއަށް އެތެރެކުރާ މީހުންނާއި، އެތަކެތީގެ ވިޔަފާރި ކުރާ މީހުންނާއި، ނުޙައްޤުން މުއްސަނދިވެފައިވާ މީހުންނަށް ހަރުކަށި އަދަބުތައް ވަނީ ކަނޑައަޅުއްވާފައެވެ.

މި އިސްލާހުގައި ބުނާ ގޮތުން 350 ގްރާމަށްވުރެ އިތުރު އަދަދެއްގެ ކެނެބިސްއާއި، 250 ގްރާމަށްވުރެ އިތުރު އަދަދެއްގެ ޑައިފޯމިން އަދި އެ ނޫން ބާވަތެއްގެ މަސްތުވާތަކެތި ނަމަ 100 ގްރާމަށްވުރެ އިތުރުނަމަ މަރުގެ އަދަބު ދެވޭނެއެވެ.

މަރުގެ އަދަބު ތަންފީޒް ކުރެވޭނީ ދިވެހިރާއްޖޭގެ އެންމެ މަތީ ކޯޓު ސްޕްރީމް ކޯޓުން މި މަސައްކައެއް ބެލުމަށްފަހު ކޯޓުގައި މައްސަލަ ބެއްލެވި ފަނޑިޔާރންގެ އިއްތިފާގުންނެވެ.

މަރުގެ އަދަބު ކަނޑަ ނޭޅޭނަމަ އެ ހާލަތުގައި އެ މީހަކު އުމުރަށް ޖަލަށްލުމާއެކު 100،000 ރުފިޔާއާއި، 10،000،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ވަނީ ކަނޑައަޅާފައެވެ. 


ޖަލުތަކާއި ޕެރޯލްގެ ގާނޫނުގައި ވާގޮތުގެ މަތިން ކުށުގެ އަދަބު ލުއިއކޮށްދިނުމާއިި މާފް ދިނުން ހިމެނޭއިރު މަސްތުވާތަކެތީގެ ބޮޑު މައްސަލައެއްގައި އެމީހަކަށް މަރުގެ އަދަބުގެ ކުށެއް މާފެއް ނުކުރެވޭނެ އެވެ.

މި އިސްލާޙުގައި ޤާނޫނުގެ 161ވަނަ މާއްދާއަށް ގެނައި އިސްލާޙުގެ ދަށުން މަސްތުވާތަކެތީގެ ކުށްތަކުގައި ހޯދާ މުދަލާއި ފައިސާ ދައުލަތަށް ނެގޭ ގޮތަށް ވަނީ ބަދަލުކޮށްފައެވެ. ކުރިން މިގޮތަށް ބަދަލު ނެގެނީ, ދައުލަތުގެ މާލިއްޔަތު ޤާނޫނުގެ ދަށުން އެކުލަވާލާފައިވާ އުސޫލެއްގެ ދަށުންނެވެ.