8 އަތޮޅަކަށް އެސްޓީއޯ އަގުގައި ތެޔޮ ފޯރުކޮށްދިނުމަށް 8 ރަށެއްގައި ސްކިޑް ޤާއިމުކޮށްފި

ރާއްޖޭގެ ކޮންމެ އަތޮޅެއްގައިވެސް މަސްވެރިންނާއި ޢާންމު ރައްޔިތުންނަށް އެސްޓީއޯ ރޭޓުގައި ތެޔޮ ލިބޭނެ އިންތިޒާމު ޤާއިމުކުރުމަށްޓަކައި ސަރުކާރުން ފަށާފައިވާ މަސައްކަތް ވަރަށް ހަލުވިކަމާއެކު ކުރިއަށްދާ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިކަން ހާމަކުރެއްވީ އެކްސްގައި ހިއްސާކުރެއްވި ޕޯސްޓެއްގައެވެ. ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންފައިވާ ފަދައިން، ރާއްޖޭގެ ހުރިހާ އަތޮޅަކުން އެސްޓީއޯގެ އަގުގައި ތެޔޮ ލިބޭނެ މަގު ފަހިކުރުމުގެ މަޝްރޫޢު ބާރުދުވެލީގައި ކުރިއަށްދާ ކަމަށެވެ. އެގޮތުން މިހާތަނަށް 8 އަތޮޅެއްގެ 8 ރަށެއްގައި ފިއުލް ޝެޑް ޤާއިމުކޮށް ނިންމައި، ޚިދުމަތް ދޭން ފަށާފައިވާކަން ވަޒީރު ފާހަގަކުރެއްވިއެވެ.

ސަރުކާރުގެ މައިގަނޑު އަމާޒަކީ ރާއްޖޭގެ ހުރިހާ ސިޓީތައް ހިމެނޭހެން، މުޅި ރާއްޖޭގެ ހުރިހާ އަތޮޅަކުން މި ޚިދުމަތް ލިބޭނެ އިންތިޒާމު 2027 ވަނަ އަހަރުގެ ނޮވެމްބަރު މަހުގެ ކުރިން ޤާއިމުކޮށް ނިންމުން ކަމަށްވެސް ވަޒީރު މުޙައްމަދު ސަޢީދު ވިދާޅުވިއެވެ.

މި ޚިދުމަތް މިހާތަނަށް ޤާއިމުކުރެވިފައިވާ ރަށްތަކުގެ ތެރޭގައި ހއ. އިހަވަންދޫ، ހދ. ހަނިމާދޫ، ށ. މިލަންދޫ، ރ. ދުވާފަރު، ބ. އޭދަފުށި، ދ. މީދޫ، ދ. ކުޑަހުވަދޫ އަދި ފ. ނިލަންދޫ ހިމެނެއެވެ.

މި މަޝްރޫޢުގެ ސަބަބުން، ޢާންމު ރައްޔިތުންނާއި، ވަކިން ޚާއްޞަކޮށް މަސްވެރިންނާއި ޞިނާޢީ އެކި މަސައްކަތްތައް ކުރާ ފަރާތްތަކުން ހަކަތައަށް ކުރަންޖެހޭ ހޭދަ ބޮޑުތަނުން ކުޑަވެގެންދާނެއެވެ. އަދި ތެޔޮ ހޯދުމަށްޓަކައި އެއް ރަށުން އަނެއް ރަށަށް ކުރަންޖެހޭ ދިގު ދަތުރުތައް ނިމުމަކަށް އައިސް، ވަގުތު ސަލާމަތްވެ، ރައްޔިތުން އުފުލަންޖެހިފައިވާ ތަކުލީފުތަކަށް ބޮޑު ލުޔެއް ލިބިގެންދާނެ ކަމަށް ސަރުކާރުން ދެކެއެވެ.

ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް އެތައް އަހަރެއް ވަންދެން ތެލުގެ އަގު ބޮޑުވުމާއި ތެޔޮ ހޯދުމުގައި ދަތިތަކާ ކުރިމަތިލާން ޖެހިފައިވާއިރު، ރައީސް ޑރ. މުޙައްމަދު މުޢިއްޒުގެ ސަރުކާރުގެ މި ސިޔާސަތަކީ ރައްޔިތުންގެ ކަންބޮޑުވުންތަކަށް ޙައްލު ހޯއްދަވައިދެއްވައި، ޤައުމުގެ އިޤްތިޞާދީ ދުވެލި އިތުރަށް ހަރުދަނާކުރުމަށް އެޅުއްވި މުހިންމު ފިޔަވަޅެކެވެ. މިއީ ރައްޔިތުން އުފުލަމުންދިޔަ ބުރަތައް ލުއިކޮށްދެއްވައި، ޤައުމަށް ހެޔޮ ބަދަލުތަކެއް ގެނެސްދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ފާހަގަކޮށްލެވޭ ކާމިޔާބީއެކެވެ.