އެތައް ކުޑަކުދީންނާއެކު، މިއަދުގެ މިހާތަނަށް ޣައްޒާއިން 28 މީހުން ޝަހީދުކޮށްލައިފި

އިސްތިއުމާރީ އިސްރާއީލުގެ ޓެރަރިސްޓުން ޣައްޒާގެ އުތުރާއި، މެދުތެރެއާއި، ދެކުނުގެ ރަށްތަކަށް ދެމުންގެންދާ އުދުވާނީ ހަމަލާތަކުގައި މިއަދުގެ މިހާތަނަށް އެކަނިވެސް 28 މީހުން ޝަހީދުކޮށްލައިފިއެވެ.

ޝަހީދުކޮށްލާފައިވާ މީހުންގެ ތެރޭގައި އެތައް ކުޑަކުދީންވެސް ހިމެނެއެވެ. އަދި ހަމަލާތަކުގައި އިތުރު އެތައްބަޔަކު ޒަޚަމްކޮށްލާފައި ވެއެވެ.

ޣައްޒާ ސިޓީގެ އިރުމަތީ ތުއްފާހް އަވަށުގެ ގެއަކަށް ބޮންއެޅުމުގެ ސަބަބުން އެ ގެއިން އެކަނިވެސް މިހާތަނަށް 10 މީހުން ޝަހީދުވެފައިވެއެވެ. ޝަހީދުވި މީހުންގެ ތެރޭގައި 3 ކުޑަކުދިންވެސް ހިމެނެއެވެ. އެތައްބަޔަކު ޒަޚަމްވިއެވެ.

ޣައްޒާގެ މެދުތެރޭ ބުރެއިޖް ރެފިއުޖީ ކޭމްޕްގައި އާންމުންގެ ގްރޫޕަކަށް ދިން ޑްރޯން ހަމަލާގައި 3 މީހުން ޝަހީދުވެ އެތައްބަޔަކު ޒަޚަމްވެފައި ވެއެވެ.

ޣައްޒާގެ މެދުތެރޭ ދީރުލް ބަލާހްގެ ޒަވެއިދާ އަވަށުގެ ގެއަކަށް ބޮންއަޅައި ދެމީހުން ޝަހީދުކޮށްލާފައި ވެއެވެ.

ޣައްޒާގެ ދެކުނުން ރަފަހް ސިޓީގެ އަލްޖެނީނާ އަވަށަށް ދިން ވައިގެ ހަމަލާގައި 4 މީހުން ޝަހީދުވެ އެތައްބަޔަކު ޒަޚަމްވެފައި ވެއެވެ.

މިއަދުގެ ހެނދުނުގެ ވަގުތުގައި ޓެރަރިސްޓުން ދިން ހަމަލާތަކުގައި 9 މީހުން ޝަހީދުކޮށްލާފައި ވާއިރު، އެތައްބަޔަކު ޒަޚަމްވިއެވެ.

ޣައްޒާ ހެލްތު މިނިސްޓްރީން މިރޭ ބުނީ، އިސްތިއުމާރީ ޓެރަރިސްޓުން ދެމުންގެންދާ ހަމަލާތަކުގައި ވޭތުވެދިޔަ 48 ގަޑިއިރުގެ ތެރޭގައި އެކަނިވެސް 80 އަށްވުރެ ގިނަމީހުން ޝަހީދުވެފައިވާ ކަމަށެވެ.

ޒަޚަމްވި މީހުންގެ އަދަދު 305 އަށް އަރާފައި ވެއެވެ.

އިއްޔެއަކީ ޣައްޒާއަށްވެސް ފިޠުރު ޢީދު ދުވަހަށް ވާއިރު، އިއްޔެގެ ހަމަލާތަކުގައި އެކަނިވެސް 53 މީހުން ޝަހީދު ކޮށްލާފައި ވެއެވެ. އިއްޔެގެ ހަމަލާތަކުގައި 189 މީހުން ޒަޚަމްވިއެވެ.

ފިޠުރު ޢީދު ދުވަސްވީމާ، އިސްތިއުމާރީ ޓެރަރިސްޓުންވަނީ ޣައްޒާއަށް ދޭ ހަމަލާތައް އިހުނަށްވުރެ އިތުރުކޮށް ވަރުގަދަވެސް ކޮށްފައެވެ.

ހަމަލާތައް ހުއްޓާލުމަށް ހަމާސްއާއި އިސްރާއީލާ ދެމެދު ވެވުނު އެއްބަސްވުން މާޗް 18 ގައި އުވާލައި، މުޖުރިމު ނަތަންޔާހޫގެ އަމުރަށް ޣައްޒާގެ އާންމުންނަށް ދެމުންގެންދާ ހަމަލާތަކުގައި މިހާތަނަށް 1،001 މީހުން ޝަހީދު، 2،359 މީހުން ޒަޚަމްވެފައި ވެއެވެ.

ނަތަންޔާހޫ އަދިވެސް ގެންދަނީ، ޣައްޒާއިން އާންމުން މެރުން އިތުރުކުރާނޭ ކަމަށް އިންޒާރުކުރަމުންނެވެ.