ހޯމް ސްކޫލިންގެ ނަމުގައި ޒުވާން ޖީލު ހަލާކުކުރުމުގެ ފުރުސަތު ދީގެން ނުވާނެ: ރައީސް ނަޝީދު

ހޯމް ސްކޫލިންގެ ނަމުގައި ރާއްޖޭގެ ޒުވާން ޖީލު މަގުފުރައްދައި ހަލާކުކުރުމުގެ ފުރުސަތު ދީގެން ނުވާނެ ކަމަށް މޯލްޑިވްސް ޑިމޮކްރަޓިކް ޕާޓީ (އެމްޑީޕީ) ޗެއަރޕާސްން އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ މިއަދު އެމަނިކުފާނުގެ ރަސްމީ 'އެކްސް' އެކައުންޓުން ހިއްސާކުރެއްވި ޕޯސްޓެއްގައެވެ.

އެ ޕޯސްޓުގައި ރައީސް ނަޝީދު ވަނީ މިހާރުވެސް ރާއްޖޭގައި ހަތަރު ހާހަށްވުރެ ގިނަ ކުދިން ގަވާއިދުން ސްކޫލަށް ނުދާ މައްސަލައަށް އަލިއަޅުއްވާލައްވައި ކަންބޮޑުވުން ފާޅުކުރައްވާފައެވެ. އެމަނިކުފާނު ފާހަގަކުރެއްވި ގޮތުގައި، ކިޔަވާ އުމުރުގެ އެތައް ހާސް ކުދިންނެއް ތައުލީމީ ނިޒާމުން ބޭރުވެފައިވާ ދަނޑިވަޅެއްގައި، ހޯމް ސްކޫލިންގެ ނަމުގައި ކުދިން ގޭގައި ބައިތިއްބައިގެން ކިޔަވައިދިނުމަކީ ޒުވާން ޖީލު ނުރައްކަލުގެ ތެރެއަށް ވެއްޓިގެން ހިނގައިދާނެ ކަމެކެވެ. އެހެންކަމުން އެފަދަ ފުރުސަތެއް ދިނުމަކީ ރާއްޖޭގެ މުސްތަގުބަލު ހަލާކުވެގެން ހިނގައިދާނެ ކަމެއް ކަމަށް އެމަނިކުފާނު ސިފަކުރެއްވިއެވެ.

ރާއްޖޭގައި ހޯމް ސްކޫލިން ތައާރަފުކުރުމާއި ކުދިން ސްކޫލަށް ނުފޮނުވާ މައްސަލައަކީ ފަހަކަށް އައިސް ރާއްޖޭގައި ވަރަށް ބޮޑަށް ބަހުސްކުރެވެމުންދާ މައުޟޫއެކެވެ. އެގޮތުން ރައްޔިތުންގެ މަޖިލީހުގެ ހުރާ ދާއިރާގެ މެންބަރު އަނާރާ ނައީމް، އިއްޔެ ވަނީ މަޖިލީހަށް ހޯމް ސްކޫލިންނާއި ބެހޭ ބިލް ހުށަހަޅާފައެވެ. މިއަދު ވަނީ އެ ބިލަށް މަޖިލީހުގައި ބަހުސްވެސް ކޮށްފައެވެ.

ރާއްޖޭގެ ގާނޫނުއަސާސީ އާއި ތައުލީމުގެ ގާނޫނު ބަޔާންކުރާ ގޮތުގައި އަސާސީ ތައުލީމު ހާސިލުކުރުމަކީ ކޮންމެ ކުއްޖެއްގެ ވެސް ހައްގެކެވެ. އަދި ދައުލަތުން ކަނޑައަޅާފައިވާ މިންގަނޑުތަކާ އެއްގޮތަށް ކޮންމެ ކުއްޖަކަށް ވެސް ސްކޫލް މާހައުލެއްގެ ތެރެއިން ތައުލީމު ލިބިދޭން ޖެހެއެވެ.

ނަމަވެސް، ދީނީ ގޮތުންނާއި އިޖުތިމާއީ ގޮތުން ހައްދުފަހަނައެޅި ވިސްނުންތަކުގެ ސަބަބުން ބައެއް ފަރާތްތަކުން ކުދިން ސްކޫލަށް ނުފޮނުވައި، ގޭގައި ބައިތިއްބައިގެން ކިޔަވައިދިނުމަށް ނުވަތަ އެއްވެސް ތައުލީމެއް ނުދީ ބޭތިއްބުމަށް މަސައްކަތްކުރާ މައްސަލަތަކެއް މީގެ ކުރިންވެސް ވަނީ ފެންމަތިވެފައެވެ. ޚާއްސަކޮށް، އަންހެން ކުދިން ވަކި އުމުރަކަށް ދިއުމުން ސްކޫލުން ވަކިކުރުމާއި، ސަރުކާރުގެ ރަސްމީ މަންހަޖަށް ކިޔަވައިދިނުމަށް އިންކާރުކުރާ މައްސަލަތައް ރާއްޖޭގެ ބައެއް ރަށްރަށުން މީގެ ކުރިން ރިޕޯޓުކޮށްފައިވެއެވެ.

މިފަދަ ކަންކަމަކީ އިޖުތިމާއީ ބޮޑެތި މައްސަލަތަކަށް މަގުފަހިވާ އަދި ކުޑަކުދިންގެ އަސާސީ ހައްގުތަކަށް އަރައިގަތުން ކަމަށް ކަމާބެހޭ މުއައްސަސާތަކުންނާއި އިޖުތިމާއީ ދާއިރާގެ ތަޖުރިބާކާރުން އަބަދުވެސް އަންނަނީ ބުނަމުންނެވެ.

ރައީސް ނަޝީދު މި މޭރުމުން ވާހަކަފުޅު ދައްކަވާފައި މިވަނީ، ރާއްޖޭގެ ސްކޫލް ނިޒާމުގެ ތެރެއިން އެތައް ކުދިންނެއް ގެއްލެމުންދާ ކަމުގެ ކަންބޮޑުވުން ތައުލީމީ ވުޒާރާއިންނާއި އާންމުންގެ ތެރޭގައި ވެސް އިތުރުވަމުންދާ ދަނޑިވަޅެއްގައެވެ. ކުދިންނަށް ފުރިހަމަ ތައުލީމާއި ތަރުބިއްޔަތު ލިބެނީ އެކުދިން މުޖުތަމައާ ގުޅި، ސްކޫލް މާހައުލުގައި އެކުވެރިންނާއެކު އުޅެގެން ކަމަށްވާތީ، ހޯމް ސްކޫލިންގެ ނަމުގައި ކުދިން މުޖުތަމައުން އެކަހެރިކުރުމަކީ ގަބޫލުކުރެވޭނެ ކަމެއް ނޫން ކަމަށް ގިނަ ބަޔަކު ދެކެއެވެ.