ރައްޔިތުންގެ މެދުގައި ނުތަނަވަސްކަން އުފެދޭ ގޮތަށް އެއްވެސް ފަރާތަކުން މައުލޫމާތުނުފެތުރުން އެދެން: އީސީ

އިލެކްޝަން ކޮމިޝަން (އީސީ)ން ގާއިމުކޮށްފައިވާ ނިޒާމުތަކުގައިވާ މައުލޫމާތުތަކަކީ ރައްކާތެރިކަމާއެކު، އެމައުލޫމާތު ބޭނުންކުރަންޖެހޭ ހާލަތްތަކުގައި ހުއްދަލިބިފައިވާ ފަރާތްތަކަށް އެކަނި ބޭނުންކުރެވޭގޮތަށް ފަރުމާކުރެވިފައިވާ ނިޒާމެއް ކަމަށް އެ ކޮމިޝަނުން ބުނެފިއެވެ.

އީސީގެ ޕޯޓަލަށް ވަދެ މައުލޫމާތު ނެގުމުގެ ފުރުސަތު ޕީއެންސީއަށް އޮތް ކަމަށް އިދިކޮޅު އެމްޑީޕީން ބޭއްވި ނުސްވެރިންގެ ބައްދަލުވުމެއްގައި ވަނީ ތުހުމަތުކޮށްފައެވެ.

އެކަމާއި ގުޅިގެން އީސީއިން ނެރުނު ބަޔާނެއްގައި ބުނީ، ލޯކަލް ކައުންސިލްތަކުގެ އިންތިހާބަށް ކުރިމަތިލުމަށް އެދި ހުށަހަޅާ ފޯމުތައް ބަލައިގަނެ، ގާނޫނުގައި ބަޔާންކުރާ މުއްދަތަށްވުރެ އަވަހަށް ކެންޑިޑޭޓުންނަށް ޖަވާބު ދެމުންދާކަމަށެވެ.

އެކޮމިޝަނުން ބުނީ ލޯކަލް ކައުންސިލްތަކުގެ އިންތިހާބުގެ ގާނޫނުގައި ބަޔާންކޮށްފައިވާ ގޮތުން، އިންތިޚާބަށް ކުރިމަތިލުމަށް އެދޭ މީހާ އެކަމަށް އެދި ހުށަހަޅާ ލިޔުން އިލެކްޝަންސް ކޮމިޝަނަށް ލިބޭތާ ގިނަވެގެން 5 (ފަހެއް) ދުވަހުގެ ތެރޭގައި، ހުށަހެޅުމާމެދު ނިންމިގޮތް އަންގަންވާނެ ކަމަށް ބަޔާންކޮށްފައިވީ ނަމަވެސް، ކެންޑިޑޭޓަކަށް ވުމަށް އެދި ފޯމު ލިބެމުންދާ މިންވަރަކުން، ބަޔާންކޮށްފައިވާ މުއްދަތަށް ވުރެ ކުރިން ކޮމިޝަނުން ޖަވާބު ދެމުންދާކަމަށެވެ.

އެކޮމިޝަނުން ބުނީ އެ ކޮމިޝަނުގައި ޤާއިމުކޮށްފައިވާ ނިޒާމުތަކުގައިވާ މަޢުލޫމާތުތަކަކީ ރައްކާތެރިކަމާއެކު ބެލެހެއްޓޭ މަޢުލޫމާތުތަކެއް ކަމަށެވެ. އަދި އެ މައުލޫމާތުތައް ބޭނުންކުރެވެނީ ހުއްދަ ލިބިފައިވާ ފަރާތްތަކަށް އެކަނި ކަމުގެ ޔަގީންކަން ރައްޔިތުންނަށް ދޭ ކަމަށްވެސް ކޮމިޝަނުން ބުންޏެވެ.

އިލެކްޝަންސް ކޮމިޝަނުން ވަނީ ކޮމިޝަނުން ދެމުންދާ ހިދުމަތްތަކާ ގުޅޭގޮތުން ރައްޔިތުންގެ މެދުގައި ނުތަނަވަސްކަން އުފެދޭ ގޮތަށް އެއްވެސް ފަރާތަކުން މައުލޫމާތު ނުފެތުރުމަށް އިލްތިމާސްކޮށްފައެވެ. މިކަމަކީ އިންތިހާބީ މަރުހަލާގެ އިތުބާރު ދެމެހެއްޓުމަށް މުހިންމު ކަމެއްގެ ކަމުގައި ވެސް އެ ކޮމިޝަނުން ފާހަގަކުރެއެވެ.