ލޯނާއި އިންޓްރަސްޓަށް 1 ބިލިއަން ރުފިޔާ ދައްކައިފި

އަހަރުގެ މިހާތަނަށް ލޯނު ދައްކަން ދައުލަތުން އެއް ބިލިއަން ރުފިޔާ ދައްކާފައިވާކަމަށް މާލީ ވުޒާރާ އިން ބުނެފިއެވެ.

މާލީ ވުޒާރާ އިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި އަހަރުގެ މިހާތަނަށް ލޯނުތަކުގެ ރީޕޭމެންޓަށް ސަރުކާރުން 636 މިލިއަން ރުފިޔާ ދައްކާފައިވެއެވެ.

ފައިނޭންސިންގ ކޯސްޓް ނުވަތަ އިންޓަރެސްޓްގެ ގޮތުގައި 412 މިލިއަން ރުފިޔާ ވަނީ ދައްކާފައެވެ.

މި އަހަރުގެ ތެރޭގައި ދައުލަތުގެ ދަރަންޏާއި ފައިނޭންސިންގ އިލްތިޒާމުތައް އަދާކުރުމަށް ޖުމްލަ 18 ބިލިއަން ރުފިޔާ ހޭދަކުރަންޖެހެއެވެ. މީގެ ތެރެއިން އެންމެ ބޮޑު ހޭދައެއް ކުރަންޖެހެނީ އަންނަ މަހު މުއްދަތު ހަމަވާ ސުކޫކަށެވެ. އެގޮތުން ސުކޫކުގެ ޕޭމަންޓަށް ގާތްގަނޑަކަށް 9.2 ބިލިއަން ރުފިޔާ ދައްކަންޖެހޭނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދިފަހުން ބޭއްވެވި ނޫސްވެރިންގެ ބައްދަލުވުމެއްގައި ވިދާޅުވީ، 500 މިލިއަން ޑޮލަރުގެ ސުކޫކު، އެ ފައިސާ ދައްކަންޖެހޭ ތާރީޚު ކަމަށްވާ އޭޕްރީލް މަހުގެ 8 ވަނަ ދުވަހު އަދާކުރުމަށް ސަރުކާރުން ނިންމަވާފައިވާ ކަމަށެވެ.

ރައީސް އިތުރަށް ހާމަކުރެއްވި ގޮތުގައި، މި ފައިސާ ދެއްކުމަށްޓަކައި މިހާރުވެސް 650 މިލިއަން ޑޮލަރަށްވުރެ ގިނަ ފައިސާ ވަނީ ރައްކާކުރެވިފައެވެ. އެހެންކަމުން، ސުކޫކަށް ދައްކަންޖެހޭ 500 މިލިއަން ޑޮލަރު އަދާކުރުމަށްފަހުވެސް، ދައުލަތުގެ ފައިސާގެ ތެރެއިން 150 މިލިއަން ޑޮލަރަށްވުރެ ގިނަ އަދަދެއް ބާކީ ހުންނާނެކަން އެމަނިކުފާނު ފާހަގަކުރެއްވިއެވެ.