އެންޓި ޓޯޗަރ ގާނޫނު މިސަރުކާރުން ތަންފީޒު ކުރާނެ: މުހުތާޒް

ރައީސުލްޖުމްހޫރިޔާ ޑޮކްޓަރ މުހައްމަދު މުއިއްޒުގެ ސަރުކާރުން އެންޓި ޓޯޗަރ ގާނޫނު ތަންފީޒު ކުރާނެ ކަމަށް ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިން ވިދާޅުވެއްޖެއެވެ.

އެންޓި ޓޯޗަރ ގާނޫނު ފާސް ކުރެވުނީ 2013 ވަނަ އަހަރުކަން ފާހަގަ ކުރަށްވާ މުހުތާޒް އެކްސްގައި ކުރެއްވި ޕޯސްޓެއްގައި ވިދާޅުވީ މިހާތަނަށް އެއްވެސް ސަރުކާރަކުން އެގާނޫނު ތަންފީޒް ކުރުމަށް އެދެވޭ މަސައްކަތެއް ކުރިތަން ފެނިފައި ނުވާކަމަށެވެ. ވިދާޅުވީ ލާއިންސާނީ އަނިޔާދޭ ޖަލު އޮފިސަރުންނަށް ދީފައިވަނީ މަގާމުގެ ކުރިއެރުން ކަމަށެވެ. މުހުތާޒް ވިދާޅުވީ އެކަން ރައީސް މުއިއްޒުގެ ސަރުކާރުން ހުއްޓުވާނެ ކަމަށެވެ.

ފާހަގަކޮށްލެވޭ ގޮތުގައި ފުލުހުން ދާދި ފަހުން ބޭއްވި ނޫސްވެރިންގެ ބައްދަލުވުމުގައި ވަނީ ޖަލުން ތަކުރާރުކޮށް ފޯނުތަކާ މަސްތުވާތަކެތި ފެންނަމުންދާ މައްސަލައާ ގުޅިގެން ކުރެވުނު ތަހުގީގަށް އެފަދަ އަމަލުތަކުގައި، ކަރެކްޝަންގެ 18 މުވައްޒަފަކު ހިމެނޭކަން ހާމަ ކޮށްފައެވެ. އެ ބައްދަލުކުރެއްވުމުގައި އެސިސްޓެންޓް ކޮމިޝަނަރ އޮފް ޕޮލިސް، އަބްދުﷲ ޝަރީފް ވިދާޅުވީ އެފަރާތްތަކުގެ އެކައުންޓަށް އާދަޔާ ހިލާފަށް ފައިސާ ޖަމާވެފައިވާކަން ފާހަގަ ކުރެވިފައިވާ ކަމަށާއި ބައެއް މުވައްޒަފުންގެ އެކައުންޓަށް 24 މިލިއަނުން ފައިސާ ޖަމާވެފައި އެބަހުރި ކަމަށެވެ. އަބްދުﷲ ޝަރީފް ވިދާޅުވީ މިހާހިސާބަށް ކުރެވުނު ތަހުގީގުން 2023 ވަނަ އަހަރުގެ ޖެނުއަރީ މަހުން ފެށިގެން މިހާތަނަށް މި 18 މުވައްޒަފުންގެ އެކައުންޓަށް 73 މިލިއަން 6 ލައްކަ ރުފިޔާ ޖަމާވެފައިވާ ކަމަށެވެ. މާފުށީ ޖަލުގައި އޮޕަރޭޝަނެއް ފަށާފައިވާކަން ހަމަ ކުރަށްވާ އަބްދުﷲ ޝަރީފް ވިދާޅުވީ، މިހާތަނަށް ބައެއް މުވައްޒަފުންވެސް ހައްޔަރުކޮށްފައި ކަމަށެވެ. އަދި އެ ފައިސާ އެ މުވައްޒަފުންގެ އެކައުންޓަށް ޖަމާކޮށްދިން ފަރާތްތަކަކީ ކޮބައިތޯ ބަލާ އެފަރާތްތަކާ މެދުވެސް ފިޔަވަޅު އަޅާނެ ކަމަށް ވިދާޅުވިއެވެ.