ރައްޔިތުން އެމްޑީޕީއަށް އިތުބާރުކުރަނީ ހާމަކަން ބޮޑުކަމާއި ތެދުވެރިކަމުގެ ސަބަބުން: ރައީސް ނަޝީދު

ރައްޔިތުން އެމްޑީޕީއަށް އިތުބާރުކުރަނީ ހާމަކަން ބޮޑުކަމާއި ތެދުވެރިކަމުގެ ސަބަބުން ކަމަށް ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ އިދިކޮޅު ފަރާތްތަކުން އަބަދުވެސް މަސައްކަތް ކުރަނީ އެފަރާތްތަކަކީ ގައުމީ ލޯތްބާއި އިސްލާމީ ސިފަތަކެއް ލިބިގެންވާ ބައެއްގެ ގޮތުގައި ދެއްކުމަށް ކަމަށް ރައީސް ނަޝީދުގެ ޕޯސްޓްގައި ވަނީ ބުނެފައެވެ.

އެމްޑީޕީ އަކީ އަކީ އިސްލާމްދީނާއި ގައުމިއްޔަތާ ބީރައްޓެހި ބައެއްގެ ގޮތުގައި ވާދަވެރި ފަރާތްތަކުން ތުހުމަތު ކުރާ ކަމަށްވެސް ރައީސް ނަޝީދު ވިދާޅުވިއެވެ.

މިކަމުގެ ހެއްކެއްގެ ގޮތުން އެމްޑީޕީގެ ވެރިކަމުގައި ދައުލަތުގެ މުދާ ވިއްކުމާއި، ބައެއް ހިދުމަތްތައް އަމިއްލަ ފަރާތްތަކާ ހަވާލުކުރުމަށް ގެންގުޅުނު ސިޔާސަތުތަކަށް އެފަރާތްތަކުން އިޝާރާތް ކުރި ނަމަވެސް، ވެރިކަމާ ހަވާލުވުމަށްފަހު، އެފަރާތްތަކުން ކުރިން ދީނާއި ގައުމިއްޔަތާ ހިލާފު ކަންތައްތަކެއްގެ ގޮތުގައި ސިފަކުރި ސިޔާސަތުތަކުގެ އެހީތެރިކަމާ ނުލައި، ދިވެހި ރައްޔިތުން ބޭނުންވާ އަދި ރައްޔިތުންނަށް ހައްގުވާ ތަނަވަސްކަމާއި ކުރިއެރުން ހޯދައިދިނުމުގައި އެފަރާތްތައް ނުކުޅެދިފައިވާ ކަމަށް ރައީސް ނަޝީދު ވަނީ ވިދާޅުވެފައެވެ.

ރައީސް ނަޝީދު މިފަދައިން ވިދާޅުވެފައި މިވަނީ މިސަރުކާރުން ރަސްމާލޭގައި ދުބާއީގެ އީގަލް ހިލްސް އާއި އެކު 20 ބިލިއަން ޑޮލަރުގެ އިންވެސްޓްމެންޓެއް ހިންގަން ނިންމައި އެކަމުގެ އެއްބަސްވުމުގައި ސޮއިކޮށްފައިވާ ދަނޑިވަޅެއްގައެވެ.

ރަސްމާލެ މަޝްރޫއުގެ ތެރެއިން 500 ހެކްޓަރު އީގަލް ހިލްސްއަށް ދިނީ މަތީ ފަންތީގެ ހޮޓާތަކާއި ޓޫރިސްޓް ވިލާތައް ހިމެނޭ ގޮތުން ވޯޓާ ފްރަންޓް މެރީނާއެއް ތަރައްގީ ކުރުމަށެވެ.

މިކަމާއި ގުޅިގެން ގިނަ ބައެއްގެ ފާޑު ކިޔުންތައް ވަނީ މިސަރުކާރަށް އަމާޒުވެފައެވެ.