ރާއްޖެއަށް މަސްތުވާތަކެތި އެތެރެކުރި ނޭޕާލްގެ 2 މީހުން ހައްޔަރުކޮށްފި

ހަށިގަނޑުގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކޮށް، ޓްރެފިކްކުރަން އުޅުނު ކަމުގެ ތުހުމަތުގައި ދެ ބިދޭސީއަކު ހައްޔަރުކޮށްފިއެވެ.

މި މައްސަލައާ ގުޅިގެން ފުލުހުން ހައްޔަރުކޮށްފައިވަނީ ނޭޕާލަށް ނިސްބަތްވާ ނިއްކަ ތަމަންގް (47 އަހަރު) އަދި އީތްރާނީ ގަލެ (40 އަހަރު) އެވެ.

ފުލުހުން ބުނީ މި ދެ މީހުން ހައްޔަރުކޮށްފައިވަނީ ރާއްޖެއަށް އެތެރެވިއިރު ހަށިގަނޑުގެ އެތެރޭގައި މަސްތުވާތަކެތި ފޮރުވައިގެން ގެނައި ކަމަށް ޝައްކުކުރެވިގެން، ކަސްޓަމްސް އިން އެ މީހުން ފުލުހުންނާ ހަވާލުކުރުމާ ގުޅިގެންނެވެ. އެގޮތުން ޑްރަގް އެންފޯސްމަންޓުން މި ދެ މީހުން ހައްޔަރުކޮށްފައިވަނީ މި ހިނގާ މަހުގެ 25 ވަނަ ދުވަހުއެވެ.

އެ މީހުންގެ ހަށިގަނޑު ބަލައިފާސްކުރުމުގެ ތެރޭގައި މަސްތުވާތަކެތި ކަމަށް ޝައްކުކުރެވޭ 142 ބުލެޓް ފެނިފައިވެއެވެ. އަދި މި ތަކެތީގެ ވަގުތީ ބަރުދަނުގައި 1.5 ކިލޯ ހުރި ކަމަށް ފުލުހުން މަޢުލޫމާތު ދެއެވެ.

މި މައްސަލައާ ގުޅިގެން އެ ދެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ދެ މީހުންގެ ބަންދަށްވެސް ވަނީ 30 ދުވަހުގެ މުއްދަތެއް ދީފައެވެ.