ފުލުހުންގެ ފަންނީ ގާބިލުކަން އިތުރުކުރުމަށް ބަންގްލަދޭޝްއާއެކު މަޝްވަރާކޮށްފި

ދިވެހި ފުލުހުންގެ ފަންނީ ހުނަރާއި ގާބިލުކަން އިތުރުކުރުމަށް ބޭނުންވާ ތަމްރީނު ފުރުސަތުތައް ހޯދުމާ ގުޅޭގޮތުން، ބަންގްލަދޭޝް ސަރުކާރާއެކު މުހިންމު މަޝްވަރާތަކެއް ކުރިއަށް ގެންގޮސްފިއެވެ.

މި މަޝްވަރާތައް ކުރިއަށްދިޔައީ ބަންގްލަދޭޝްއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ޑރ. އެމް.ޑީ. ނަޒްމުލް އިސްލާމް، ކޮމިޝަނަރ އޮފް ޕޮލިސް އަހުމަދު މުހައްމަދުގެ އަރިހަށް ކުރެއްވި އިހުތިރާމުގެ ޒިޔާރަތުގައެވެ.

ފުލުހުންގެ މައި އިދާރާ ގައި ބޭއްވި މި ބައްދަލުކުރެއްވުމުގައި، ދެ ގައުމުގެ ދެމެދުގައި އޮތް ޒަމާންވީ އެކުވެރި ގުޅުމާއި، އެކި ދާއިރާތަކުން ލިބެމުންދާ އެއްބާރުލުން ފާހަގަކުރައްވައި ކޮމިޝަނަރ އޮފް ޕޮލިސް ވަނީ ޝުކުރު އަދާކުރައްވާފައެވެ.

މީގެއިތުރުން، ދެ ގައުމުގެ ފުލުހުންގެ މުއައްސަސާގެ މެދުގައި އޮތް ގުޅުން އިތުރަށް ހަރުދަނާކުރުމާ ގުޅޭގޮތުންނާއި، ބަންގްލަދޭޝްގެ އެހީތެރިކަމާއެކު ދިވެހި ފުލުހުންނަށް ބޭނުންވާ ފަންނީ ތަމްރީނުތައް ފަހިކޮށްދިނުމާ ގުޅޭގޮތުން ދެ ބޭފުޅުން ވަނީ ފުޅާ ދާއިރާއެއްގައި ހިޔާލު ބަދަލުކުރައްވާފައެވެ.