ރާއްޖޭގައި އެޗްއައިވީ ޖެހިފައިވާ 52 މީހަކު އެބަތިބި: ހެލްތު މިނިސްޓްރީ

ރާއްޖޭގައި އެޗްއައިވީ ޖެހިފައިވާ 52 މީހުން މިވަގުތު އެބަތިބި ކަމަށް ހެލްތު މިނިސްޓަރ ގީލާ އަލީ ވިދާޅުވެއްޖެއެވެ.

މީޑިއާ ޕްރޮގްރާމެއްގައި ވާހަކަދައްކަވަމުން މިނިސްޓަރު ވިދާޅުވީ، ރާއްޖެއިން އެންމެ ފުރަތަމަ އެޗްއައިވީ ފެނިފައިވަނީ 1991 ވަނަ އަހަރު ކަމަށެވެ.

1991 ވަނަ އަހަރުން ފެށިގެން މިއަދާ ހަމައަށް މި ބަލި ޖެހިގެން ޖުމްލަ 76 މީހަކު ރިޕޯޓުކޮށްފައިވާއިރު، އޭގެ ތެރެއިން މިހާރު ދުނިޔޭގައި ތިބީ 52 މީހުން ކަމަށް އެކަމަނާ ވިދާޅުވިއެވެ.

މީގެއިތުރުން، އެޗްއައިވީން ރައްކާތެރިވުމަށްޓަކައި މުޖުތަމަޢު ހޭލުންތެރިކުރުވުމަށް ކުރެވުނު މަސައްކަތްތަކުން އެދެވޭ ނަތީޖާއެއް ހާސިލުކުރެވިފައިވާ ކަމަށާއި، މި ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް މިހާރު އާންމުން ވަރަށް ބޮޑަށް އަހުލުވެރިވެފައިވާ ކަމަށްވެސް މިނިސްޓަރު ވިދާޅުވިއެވެ.

ހަމައެއާއެކު، އެޗްއައިވީ ޖެހިފައިވާ ފަރާތްތަކަށް ބޭނުންވާ ޞިއްޙީ ފަރުވާއާއި، އެ ފަރާތްތަކުގެ ޢާއިލާތަކަށް ބޭނުންވާ ނަފްސާނީ އެހީތެރިކަމާއި ކައުންސެލިންގ އަދި އެހެނިހެން އެހީތެރިކަން ސަރުކާރުން މެދުކެނޑުމެއްނެތި ފޯރުކޮށްދެމުންދާ ކަމުގެ ޔަޤީންކަން ވެސް މިނިސްޓަރު ދެއްވިއެވެ.

މިނިސްޓަރު އިތުރަށް ފާހަގަކުރެއްވި ގޮތުގައި، ދުނިޔޭގެ އެހެން ޤައުމުތަކާ އަޅާބަލާއިރު ރާއްޖޭގައި މި ބަލި ފެތުރިފައިވާ މިންވަރު ނިސްބަތުން ވަރަށް ބޮޑަށް ވެސް ކުޑައެވެ.