އެމްއެމްއޭ ރިސާޗް ކޮންފަރެންސްގެ ޕިއަރ ރިވިއުއަރ ޕޫލަށް ކުރިމަތިލުމުގެ މުއްދަތު އިތުރުކޮށްފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކޮށްގެން ބާއްވާ 'އެމްއެމްއޭ ރިސާޗް ކޮންފަރެންސް 2026' އަށް ހުށަހަޅާ ދިރާސީ ކަރުދާސްތައް އިވެލުއޭޓްކޮށް، މުރާޖަޢާކުރުމަށް އެކުލަވައިލާ 'ޕިއަރ ރިވިއުއަރ ޕޫލް' އަށް އެދި ހުށަހެޅުމުގެ މުއްދަތު އެ އޮތޯރިޓީން އިތުރުކޮށްފިއެވެ.

އެމްއެމްއޭއިން އެކްސް ގައި ހިއްސާކުރި މަޢުލޫމާތުގައިވާ ގޮތުން، މި ފުރުސަތު މިހާރު ވަނީ 4 އޮކްޓޫބަރު 2026 ގެ ނިޔަލަށް އިތުރުކުރެވިފައެވެ.

މިކަމަށް ޝައުގުވެރިވާ ފަރާތްތަކަށް، ހާއްސަ ކިއުއާރް ކޯޑު މެދުވެރިކޮށް ނުވަތަ ކޮންފަރެންސްގެ ރަސްމީ ވެބްސައިޓުގައިވާ ފޯމު ފުރިހަމަކުރައްވައިގެން އެޕްލިކޭޝަން ހުށަހެޅުމުގެ ފުރުސަތު ވަނީ ހުޅުވާލެވިފައެވެ.

މި ޕޫލަށް ފުރުޞަތު ހުޅުވާލާފައިވަނީ މެކްރޯ އިކޮނޮމިކްސް، މަނިޓަރީ އިކޮނޮމިކްސް، އިސްލާމިކް ފައިނޭންސް، ޕަބްލިކް ފައިނޭންސް، ފަތުރުވެރިކަން، ބައިނަލްއަޤްވާމީ ވިޔަފާރި އަދި ޑިޖިޓަލް ފައިނޭންސް ފަދަ ދާއިރާތަކުން ފަންނީ ތަޖުރިބާ ލިބިވަޑައިގެންފައިވާ އެކަޑަމިކް ބޭފުޅުންނާއި، ދާރިސުން އަދި އެކި ދާއިރާތަކުގެ މާހިރުންނަށެވެ.

ޕިއަރ ރިވިއުއަރ ޕޫލަށް ހޮވޭ ފަރާތްތަކުގެ މައިގަނޑު މަސްއޫލިއްޔަތަކީ، ކޮންފަރެންސަށް ހުށަހެޅޭ ކަރުދާސްތަކުގެ ފެންވަރާއި، ޞައްޙަކަން އަދި މަޢުޟޫޢުގެ މުހިންމުކަން ވަޒަންކުރައްވައި، މިނިވަން ޢިލްމީ އިވެލުއޭޝަނެއް ފޯރުކޮށްދެއްވުމެވެ.

މި ކޮންފަރެންސްގެ ދިރާސީ ކަރުދާސްތައް މުރާޖަޢާކުރުމަށް ހަމަޖެހިފައިވަނީ، ދިރާސާ ހުށަހެޅި ފަރާތާއި މުރާޖަޢާކުރާ ފަރާތުގެ ވަނަވަރު ސިއްރުކުރެވޭ، ދެފަރާތަށް އެކަކު އަނެކަކު ނޭނގޭ އުސޫލު ކަމަށްވާ ޑަބަލް ބްލައިންޑް ޕިއަރ ރިވިއު އުސޫލުގެ ދަށުންނެވެ.

އެމްއެމްއޭ އިން ހާމަކުރި ގޮތުގައި، ކަނޑައެޅިފައިވާ މިންގަނޑުތަކާ އެއްގޮތަށް ރިވިއުކުރުމުގެ މަރުޙަލާ ފުރިހަމަކުރާ ފަރާތްތަކަށް ސެޓްފިކެޓާއި އުޖޫރަ އާއި އިތުރު ފުރުސަތުތައް ލިބިގެންދާނެއެވެ.