މެލޭޝިޔާގެ ކުރީގެ ބޮޑުވަޒީރުގެ އަނބިކަނބަލުން އަވަހާރަވުމާއި ގުޅިގެން ރައީސް ތައުޒިޔާ ވިދާޅުވެއްޖެ

މެލޭޝިޔާގެ ކުރީގެ ބޮޑުވަޒީރު، ހިޒް އެކްސެލެންސީ ޓުން ޑޮކްޓަރ މަހާތީރު މުހައްމަދުގެ ލޯބިފުޅުވާ އަނބިކަނބަލުން، ޓުން ޑޮކްޓަރ ސިތީ ހަސްމާ މުހައްމަދު ޢަލީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެމަނިކުފާނަށް ތަޢުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި، އެކަމަނާ އަވަހާރަވުމުގެ ފުން ހިތާމައިގައި ބައިވެރިވެވަޑައިގަންނަވާކަން ހާމަކުރެއްވިއެވެ. މެލޭޝިޔާގެ ފުރަތަމަ އަންހެން ޑޮކްޓަރުންގެ ތެރޭގައި ހިމެނިވަޑައިގެން، މައިންގެ ސިއްހަތާއި ރަށްފުށުގެ އަންހެނުން ކުރިއެރުވުމަށް އެކަމަނާ ކޮށްދެއްވި އަގުހުރި ޚިދުމަތްތަކަކީ އިޙްތިރާމާއެކު ފާހަގަކުރެވޭނެ، އަދި އޭގެ ފައިދާ ދެމިއޮންނާނެ ހިދުމަތްތަކެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ.

މީގެއިތުރުން، އަންހެނުންނާއި ފިރިހެނުންގެ ހަމަހަމަކަމަށާއި އާއިލީ ފުދުންތެރިކަމަށް އެކަމަނާ އިސްކަންދެއްވައި ކުރެއްވި މަސައްކަތްޕުޅުތަކަކީ، މުޖުތަމަޢަށް ހިދުމަތްކުރުމަށާއި އަންނަން އޮތް ޖީލުތައް ބާރުވެރިކުރުވުމަށް އެކަމަނާ ގެންގުޅުއްވި ހަރުދަނާ ސިޔާސަތުތަކެއްގެ ހެއްކެއްކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ދިވެހި ސަރުކާރާއި ރައްޔިތުންގެ ނަމުގައި، ރައީސުލްޖުމްހޫރިއްޔާ ވަނީ ޓުން ޑޮކްޓަރ މަހާތީރު މުހައްމަދަށާއި އެމަނިކުފާނުގެ އާއިލާއަށް ނުހަނު އިހްލާސްތެރިކަމާއެކު ތަޢުޒިޔާ ދަންނަވާފައެވެ. އަދި މި ބޮޑު ހިތާމައިގެ ވަގުތުގައި އާއިލާއަށް ކެތްތެރިކަން މިންވަރުކުރެއްވުން އެދިވަޑައިގަތެވެ.

އެކަމަނާގެ ދިރިއުޅުއްވުމާއި، ޚިދުމަތްތަކާއި، ދޫކުރެއްވި ރީތި ނަމޫނާތަކުން އާއިލާއަށާއި މެލޭޝިޔާގެ އެތައް ރައްޔިތުންނަކަށް ތަސައްލީއެއް ލިބޭނެކަމަށް އުއްމީދުކުރައްވާކަމަށް ވިދާޅުވިއެވެ. ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ، މާތްﷲ އެކަމަނާގެ ހެޔޮ އަމަލުތައް ގަބޫލުކުރައްވައި، ސުވަރުގޭގެ ދާއިމީ ނިޢުމަތް މިންވަރުކުރެއްވުން އެދި ދުޢާކުރައްވަމުންނެވެ.