ސީ ޕްލޭންތަކުން ރޭނގަޑުގެ ދަތުރުތަކަށް ތައްޔާރުވަނީ!

މޯލްޑިވިއަނުން އަލަށް ގެންނަ ސީޕްލޭން ބޯޓުތަކާއެކު ރޭގަނޑު ދަތުރުކުރުމުގެ ފުރުޞަތު ހުޅުވިގެންދާނެކަމަށް އެ ކުންފުނިން ހާމަކުރައްވަިއފި އެވެ.

މޯލްޑިވިއަންގެ ސީޕްލޭންތަކާއި ގުޅޭ ގޮތުން އިތުރަށް ތަރައްގީ ކުރުމުގެ މަޝްރޫއަށް އަލި އަޅުވާލައްވައި ވާހަކަފުޅު ދައްކަވަމުން އެކުންފުނީގެ ޑެޕިއުޓީ މެނޭޖިންގ ޑިރެކްޓަރ އަލީ ސަލީމް ވިދާޅުވީ މޯލްޑިވިއަނުން އަލަށް ގެންނަ ސީޕްލޭން ބޯޓުތަކާއެކު ރޭގަނޑު ދަތުރުކުރުމުގެ ފުރުޞަތު ހުޅުވިގެންދާނެކަމަށެވެ.

މޯލްޑިވިއަންގެ ސީޕްލޭން ފްލީޓްގައި މިވަގުތު 11 ބޯޓު އެބައޮތެވެ. އަދި ސީޕްލޭންގެ ފްލީޓް ބޮޑުކުރުމަށް އެ ކުންފުނިން ދަނީ މަސައްކަތްކުރަމުނެވެ.

ރާއްޖޭގެ ރިސޯޓަކުގެ އިތުރުން ބައެެއް ރަށްރަށަށް މޯލްޑިވިއަންގެ ސީ ޕްލޭންގެ ދަތުރުތައް ފަށާފައިވާއިރު މި ދަތުރުތަކަކީ މޯލްޑިވިއަން އަށް ވަރަށް ބޮޑު މަންފާއެއް ވަމުން އަންނަ ދަތުރެުތަކެއްގެ ގޮތުގައި ވަނީ ފާހަގަކުރެވިފަ އެވެ.

މިމަހުގެ 11 ވަނަ ދުވަހު މޯލްޑިވިއަނުން ވަނީ ކެނެޑާގެ ކުންފުންޏަކާއެކު 2 ސީޕްލޭން ގަތުމުގެ އެއްބަސްވުމުގައި ސޮއިކޮށްފައެވެ. އެއީ ޑީ.އެޗް.ސީ-6 ޓްވިން އޮޓަރ ކްލަސިކް 300-ޖީ މަރުކާގެ 2 ބޯޓެވެ.

އަލީ ސަލީމް ވިދާޅުވީ، މި ބޯޓުތަކަކީ އެންމެ ފަހުގެ ޓެކްނޮލޮޖީގެ ޒަމާނީ އެއަރކްރާފްޓް ތަކެއްކަމަށެވެ. މި ބޯޓުތަކާއެކު ސީޕްލޭން ދަތުރުތައް ރޭގަނޑު ކުރުމުގެ ފުރުޞަތު ފަހިވެގެންދާނެކަމަށް އޭނާ ވިދާޅުވިއެވެ.

މިއަހަރުގެ ފެބްރުވަރީ މަހުގެ ތެރޭގައި ވަނީ ދެކުނުގެ 4 އަތޮޅު ވައިގެމަގުން ގުޅުވާލާފައެވެ. މި ބޯޓުތަކަކީ ވީލްބޭސްކޮށް ބޭނުންކުރެވޭ ބޯތުތަކަކަށްވުމުގެ ސަބަބުން މިއީ އެ ކުންފުނީގެ އޮޕަރޭޝަންތަކަށް ލިބިގެންދާނެ ބޮޑު ފަސޭހައަކާއި ކުރިއެރުމަކަށް ވެގެންދާނެކަމަށް މޯލްޑިވިއަނުން ވިދާޅުވެއެވެ.