ގުޅީ ފަޅުން ގޯތި ލިބުނު 843 ފަރާތަކަށް ރަޖިސްޓްރީ ދޫކޮށްފި

ގުޅީ ފަޅުން ގޯތި ލިބުނު 843 ފަރާތަކަށް ރަޖިސްޓްރީ ހަވާލުކޮށްފިއެވެ.

މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗަރ އިން އެކްސްގައި ކުރި ޕޯސްޓެއްގައި ވަނީ ގެދޮރުވެރިޔާ ސްކީމްގެދަށުން ގުޅިފަޅުން ގޯތި ލިބިފައިވާ ފަރާތްތަކަށް ރަޖިސްޓްރީ ދޫކޮށްފައިވާ އަދަދު ހާމަކޮށްފައެވެ.

މިނިސްޓްރީން އެކްސްގައި ކޮށްފައިވާ މެސެޖްގައި ވަނީ، ގެދޮރުވެރިޔާ ސްކީމްގެދަށުން ގުޅިފަޅުން ގޯތި ލިބިފައިވާ ފަރާތްތަކަށް ރަޖިސްޓްރީ ދޫކުރުުގެ ތެރެެއިން މިހާތަނަށް 843 ފަރާތަކަށް ގޯތީގެ ރަޖިސްޓްރީ ދޫކޮށްފައިވާ ކަމަށެވެ.

ރަޖިސްޓްރީ ދޫކުރުމުގެ މަސައްކަތް ކުރިއަށްދަނީ މިނިސްޓްރީ ކުރިން ހިންގި އިމާރާތުގެ ބިމުގައި ކަމަށްވެސް ބުނެފައިވެއެވެ.

އެގޮތުން މިހާތަނަށް 843 ފަރާތަކަށް ގޯތީގެ ރަޖިސްޓްރީ ދޫކޮށްފައިވާ މިނިސްޓްރީން ވަނީ ބުނެފައެވެ.

ކުރީ ސަރުކާރުން ގުޅީފަޅުން 150 ހެކްޓަރުގެ ބިން ހިއްކައި، މާލޭ ރައްޔިތުންނަށް ގޯތި ދީ ރަޖިސްޓްރީ ހަވާލުކޮށްފައި ވަނިކޮށް، މި ސަރުކާރުން ވަނީ އެތަނުގެ ލޭންޑް ޔޫސް ޕްލޭންއަށް ބަދަލުގެނެސް ގޯތި ލިބޭ ތަންތަން އަލުން ކަނޑައަޅާފައެވެ.

ގުޅީފަޅުން ގޯތި ލިބިފައިވާ މީހުންގެ ގޯތިތައް، މިހާރު ހިއްކާފައިވާ ސަރަހައްދުން ލިބޭ ގޮތަށް ބަދަލުކޮށް އައު ލޭންޑް ޔޫސް ޕްލޭން އާންމުކޮށްފައިވަނީ މެއި މަހުގެ 18 ވަނަ ދުވަހުއެވެ.

ގުޅީފަޅުގެ ލޭންޑް ޔޫސް ޕްލޭނަށް ބަދަލުގެނެސް، އައު ޕްލޭނެއް އެކުލަވާލުމާ ގުޅިގެން، ބިންވެރިޔާ ސްކީމްގެ ދަށުން ގުޅީފަޅުން ބަންޑާރަ ގޯތި ލިބިފައިވާ ފަރާތްތަކުގެ މެދުގައި ގުރުއަތުލުން ބާއްވާފައި ވަނީ މެއި މަހުގެ 30 ދުވަހު އުސްފަސްގަނޑުގައެވެ. މި ބަދަލާ ގުޅިގެން ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓްރީ" ބާޠިލުވެ، ކުރިން ސޮއިކޮށްފައިވާ ބަންޑާރަ ގޯތީގެ އެއްބަސްވުން ވަނީ ބާތިލްވެފައެވެ.

އައު ރަޖިސްޓްރީ ދޫކުރުމުގެ މަސައްކަތް މިނިސްޓްރީން ކުރަމުންދާއިރު، ރަޖިސްޓްރީގައި ސޮއިކުރުމުގެ އެޕޮއިންޓްމަންޓަށް ހާޒިރުވާއިރު، ގޯތި ލިބިފައިވާ ފަރާތުގެ އައިޑީ ކާޑުގެ އަސްލު، ޕަވާ އޮފް އެޓާނީގެ ދަށުން ނަމަ އެޓާނީގެ އަސްލު އަދި އައިޑީ ކާޑުގެ އަސްލު، އަދި ކުރިން ލިބިފައިވާ އެއްބަސްވުމާއި ރަޖިސްޓަރީގެ އަސްލު ގެންދަން ޖެހެއެވެ.

އެޕޮއިންޓްމަންޓްގެ ގަޑިއަށް ފަސް މިނެޓަށް ވުރެ ގިނައިރު ފަސްވެއްޖެނަމަ ނުވަތަ ލިޔެކިޔުންތައް ފުރިހަމަ ނުވާނަމަ އެޕޮއިންޓްމަންޓް ކެންސަލްވާނެއެވެ. އެޕޮއިންޓްމަންޓްގެ ތަފްސީލު "ހިޔާވެހި ޕޯޓަލް" އާއި އެސްއެމްއެސް މެދުވެރިކޮށް މިނިސްޓްރީން އަންގާނެ ކަމަށް ކުރިން މިނިސްޓްރީން ވަނީ ބުނެފައެވެ.