މޫސުމީ ބަދަލުތަކާ ގުޅޭގޮތުން ކެނެޑާއާއިއެކު މަޝްވަރާކޮށްފި

މޫސުމަށް އަންނަ ބަދަލުތަކާ ގުޅޭގޮތުން ދިވެހިރާއްޖެއާއި ކެނެޑާއާއެކު މަޝްވަރާ ކޮށްފިއެވެ.

މި މަޝްވަރާތައް ކުރިއަށް ގެންގޮސްފައިވަނީ ކެނެޑާއިން ދިވެހިރާއްޖެއަށް ކަނޑައަޅުއްވާފައިވާ ހައި ކޮމިޝަނަރު އެރިކް ވޯލްޝް، މިނިސްޓަރ އޮފް ކްލައިމެޓް ޗޭންޖް އެންވަޔަރަންމަންޓް، އެންޑް އެނާރޖީ ޠާރިޤް އިބްރާހީމް އަރިއަހަށް ކުރެއްވި އިހުތިރާމްގެ ޒިޔާރަތުގައެވެ.

މިއަދު ބޭއްވި މި ބައްދަލުކުރެއްވުމުގައި ހައި ކޮމިޝަނަރު ވޯލްޝް ވިދާޅުވީ ދިވެހިރާއްޖެއާއެކު އޮތް ގުޅުން އިތުރަށް ވަރުގަދަކުރުމަށް ކެނެޑާއިން ގަސްދުކުރާ ކަމަށެވެ. އަދި ޚާއްޞަގޮތެއްގައި މޫސުމަށް އަންނަ ބަދަލުތަކާ ގުޅޭގޮތުން ދެ ޤައުމުގެ މެދުގައި އެއްބާރުލުން އިތުރުކުރުމަށް މަސައްކަތްކުރައްވާނެ ކަމަށް ވިދާޅުވިއެވެ.

މި ބައްދަލުކުރެއްވުމަކީ ވަރަށް އުފާވެރި އަދި ފައިދާހުރި ބައްދަލުކުރެއްވުމެއް ކަމަށާއި ކެނެޑާއާއެކު އޮތް ގުޅުން އިތުރަށް ހަރުދަނާކުރުމަށް މަސައްކަތް ކުރައްވާނެ ކަމަށް މިނިސްޓަރ ވިދާޅުވިއެވެ.

ކުރިއަށް އޮތް ތަނުގައި ދެ ޤައުމުގެ މެދުގައި އިތުރު މަޝްރޫޢުތައް ހިންގުމަށާއި، ގުޅުން އިތުރަށް ބަދަހިކުރުމަށް މަސައްކަތްކުރުމަށްވެސް މި ބައްދަލުކުރުމުގައި ވަނީ އެއްބަސްވެ ވަޑައިގެންފައެވެ.