އިސްލާމީ ގައުމެއްގައި ކުރެވޭނެ އެންމެ މާތް ކަމަކީ މިސްކިތްތައް ބިނާކުރުން ކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ އައްސޭރި ޖަލުގައި ޤާއިމްކުރި މަސްޖިދުލް ޔޫސުފް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ، މިސްކިތެއް ބިނާކުރުމަކީ ވަރަށް މާތް ކަމެއް ކަމަށާއި އިސްލާމްދީން ގަބޫލުކުރާ ޤައުމެއްގަ ކުރެވޭނެ އެންމެ މާތް ކަމަކީ މިސްކިތްތައް ބިނާކުރުން ކަމަށެވެ.
މިސްކިތްތައް ބިނާ ކުރުމުގަ ލިބޭ މާތްކަމާ ގުޅޭގޮތުން ވާހަކަފުޅު ދައްކަވަމުން މިނިސްޓަރ ވަނީ އައްސޭރި ޖަލުގަ މިސްކިތެއް ހުޅުވިގެންދިޔުމުން ޤައިދީން އަދި ޖަލު އޮފިސަރުންނަށް ނަމާދު ކުރުމުގެ އިންތިޒާމް ފަހިވެގެން މިދިޔައީ ރައީސްގެ އެންގެވުމާއެކު ކޮމިޝަނަރ އޮފް ޕްރިޒަންސްގެ ވަރަށް ބޮޑު އިސްނެންގެވުމެއްގެ ދަށުންކަން ފާހަގަ ކުރައްވާފައެވެ.
"މިސްކިތް އެޅުމުގަ ބުރަކޮށް މަސައްކަތް ކޮށްދެއްވި ޤައިދީންނާއި ޖަލު އޮފިސަރުންނަށް ޚާއްސަ ޝުކުރެއް ދަންނަވަން." މިނިސްޓަރ އިހްސާން
މިނިސްޓަރ ވަނީ މިފަދަ މާތް މަސައްކަތްތައް ކުރިއަށް އޮތްތަނުގައިވެސް ފެނިގެންދިޔުމަކީ ކުރައްވާ އުންމީދެއް ކަމަށްވެސް ވިދާޅުވެފައެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަބްދުﷲ ފަޔާޒް އާއި އެޑިއުކޭޝަން މިނިސްޓަރ ޑރ. އިސްމާޢީލް ޝަފީޢު، ބަންޑާރަ ނައިބު އަލްއުސްތާޒް އަޙުމަދު އުޝާމްގެ އިތުރުން ބީއެމްއެލްގެ ޗެއާޕާސަން އަހުމަދު އަލީ ހަބީބު އަދި ކޮމިޝަނަރ އޮފް ޕްރިޒަންސް ޙަސަން ޒަރީރު އާއި އިސް އޮފިސަރުން ބައިވެރިވެވަޑައި ގެންނެވިއެވެ.
މަސްޖިދުލް ޔޫސުފް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަބްދުﷲ ފަޔާޒްއެވެ.
