ހުނަރުވެރިކަމަށް ބިނާކޮށްފައިވާ ތަޢުލީމާ މެދު މުޖުތަމަޢުގެ ވިސްނުން ބަދަލުކުރުމަކީ މުހިންމު ކަމެއް ކަމަށާއި މި މަސައްކަތްތަކަކީ އަގުހުރި، އިޙްތިރާމް ލިބޭ އަދި މުޖުތަމަޢުއަށް ކޮންމެހެން ބޭނުންވާ މަސައްކަތްތަކެެއް ކަމަށް މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑޮކްޓަރ މަރްޔަމް މާރިޔާ ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި މިނިސްޓަރު ވިދާޅުވީ ޒުވާން ޖީލު ތަޢުލީމީ ދާއިރާއިން ކުރިއެރުވުމަށް މަސައްކަތްކުރަމުންދާއިރު، ތަޢުލީމީ ކާމިޔާބީ ލިބުމަކީ ހަމައެކަނި އެކަޑެމިކް ތަޢުލީމީ ނަތީޖާ ރަނގަޅުވުން ނޫންކަން ހަނދާންކުރުމަކީ މުހިންމު ކަމެއް ކަމަށާއި އަދި އެކި އެކި ހުނަރުވެރި މަސައްކަތްތެރިންނަށް ބިނާވެފައިވާ ވަޒީފާތަކުން ފަހިވާ ފުރުޞަތުތަކަށް އިޙްތިރާމްކޮށް، އެކަންކަމަށް ހިތްވަރުދިނުމަކީ އެކަޑެމިކް ދާއިރާއަށް ދެވޭ އަހައްމިއްޔަތާ އެއްފަދައިން ހުނަރުވެރިކަމަކީ މުހިންމު ކަމެއް ކަމަށެވެ.
މިނިސްޓަރު ވިދާޅުވީ ދިގު މުއްދަތަކަށް އަޅުގަނޑުމެން ވަނީ އެކަޑެމިކް ކާމިޔާބީއަށް އިސްކަންދީ، ހުނަރުވެރި މަސައްކަތްތަކާއި ވަޒީފާތަކުގެ އަގު ވަޒަންނުކޮށް ދޫކޮށްލާފައި ކަމަށާއި އެކަމުގެ ސަބަބުން ސަބަބުން ހުނަރުވެރިކަމަށް ބިނާވެފައިވާ ވަޒީފާތަކަކީ މުހިންމުކަން ކުޑަ ނުވަތަ ފައިދާ ކުޑަ ކަންކަންކަމުގެ ނުބައި ތަޞައްވުރެއް ވަނީ އުފެދިފައި ކަމަށެވެ.
ނަމަވެސް، މިއީ ޙަޤީޤަތާ އެއްގޮތަކަށްވެސް ދިމާވާކަމެއްނޫނެވެ. ކަރަންޓުގެ މަސައްކަތާއި، ފެންވަޔަރު ކުރުމުގެ މަސައްކަތާއި ވަޑާމުގެ މަސައްކަތްތައް ފަދަ ކަންކަމަކީ އަޅުގަނޑުމެންގެ ދިރިއުޅުމަށް ކޮންމެހެން ބޭނުންވާ އަސާސީ ޚިދުމަތްތަކެވެ. މިފަދަ ދާއިރާތަކުން ދެމެހެއްޓެނިވި ގޮތެއްގައި އަދި ރަނގަޅު އާމްދަނީއެއް ލިބޭ ވަޒީފާގެ ފުރުޞަތުތައް ހުޅުވިގެންދެއެވެ.
މިނިސްޓރު ވިދާޅުވީސްޓެލްކޯ އަދި އެމްޓީސީސީ ފަދަ ބޮޑެތި ކުންފުނިތަކާއި އެހެނިހެން ވިޔަފާރިތަކުގެ ކާމިޔާބީ ވެސް ބަރޯސާވަނީ ހުނަރުވެރި މުވައްޒަފުންގެ މައްޗަށް ކަމަށާއި މިފަދަ ވަޒީފާތަކުން މާލީ ރައްކާތެރިކަމުގެ އިތުރުން މުޖުތަމަޢުއަށް ޚިދުމަތްކުރުމުގެ ހިތްހަމަޖެހުންވެސް ލިބިގެންދާނެ ކަމަށެވެ.
ތަޢުލީމީ އަދި އާންމު ވަޒީފާތަކުގެ އިތުރުން، އުފެއްދުންތެރި އަދި ފަންނީ ދާއިރާތަކުގައި ވެސް ގިނަގުނަ ފުރުސަތުތައް ފަހިވެފައިވާ ކަން ފާހަގަ ކުރަށްވަމުން މިނިސްޓަރ މާރިޔާ ވިދާޅުވީ ފެޝަން ޑިޒައިނިންގ، ޑިޖިޓަލް މާކެޓިންގ، ބިއުޓީ ތެރަޕީ، އަދި ކޭޓަރިންގ ފަދަ ދާއިރާތަކުން މީހުންނަށް، އެމީހުންގެ ޝައުޤުވެރިކަން ހުރި ދާއިރާތަކުން މަސައްކަތް ކުރުން ޕްރޮފެޝަނަލް ކެރިއަރއަކަށް ބަދަލުކުރުމުގެ ފުރުސަތު ލިބިގެންދާނެ ކަމަށެވެ.
މައިންބަފައިންގެ ހައިސިއްޔަތުން، ދަރިން އަމިއްލައަށް ޝައުޤުވެރިވާކަންތައް ދެނެގަތުމާއި ތަރައްޤީކުރުމުގައި އެހީތެރިވެދިނުމަކީ އަގުހުރި ކަމެއް ކަމަށާއި އެކި ހުނަރުތަކާއި މަސައްކަތްތައް ތަޖުރިބާކުރުމަށް ދަރިންނަށް ހިތްވަރުދިނުމަކީ މުހިންމު ކަމެއް ކަމަށް މިނިސްޓަރ ފާހަގަ ކުރެއްވިއެވެ. އަދި މިފަދަ ކަންތައްތަކުން ހިތްހަމަޖެހުން ލިބޭ އަދި ދެމެހެއްޓެނިވި ވަޒީފާތަކަށް މަގުފަހިކުރެވިދާނެ ކަމަށް މިނިސްޓަރު މާރިޔާ ވިދާޅުވިއެވެ.
ޒުވާނުންނަށް ދަންނަވަމެވެ. ކޮންވެންޝަނަލް ތަޢުލީމީ މަގުތަކުން ތިޔަކުދިންނަށް ކުރިއަށްނުދެވޭ ކަމުގައިވިޔަސް ހިތްވަރު ދޫކޯށްލައިގެން ނުވާނެއެވެ. މާކެޓްގައި ޒުވާނުންގެ ހުނަރުތަކަށް ޑިމާންޑް އެބައޮތެވެ. އަދި ހުނަރުވެރި މަސައްކަތްތަކާއި އުފެއްދުންތެރި ސިނާޢަތްތަކުގައި ގިނަ ފުރުސަތުތަކެއް ހުޅުވެމުން އެބަދެއެވެ. މިނިސްޓަރު ވިދާޅުވިއެވެ.
މިނިސްޓރުގެ ޕޯޓުގައި ހުނަރުވެރިކަމަށް ބިނާކޮށްފައިވާ ތަޢުލީމާ މެދު މުޖުތަމަޢުގެ ވިސްނުން ބަދަލުކުރުމަކީ މުހިންމު ކަމެއް ކަން ފާހަގަ ކުރަށްވަމުން މިނިސްޓަރު ވިދާޅުވީ މި މަސައްކަތްތަކަކީ އަގުހުރި، އިޙްތިރާމް ލިބޭ އަދި މުޖުތަމަޢުއަށް ކޮންމެހެން ބޭނުންވާ މަސައްކަތްތަކެއް ކަމަށެވެ. އަދި މިފަދަ މަސައްކަތްތަކަށް ޒުވާނުންދިއުމަށް ބާރުއެޅައި އެހީތެރިވެދިނުމުން، ކޮންމެ ފަރުދަކަށްވެސް އެމީހެއްގެ ކުޅަދާނަކަންހުރި ވަކި ޚާއްޞަ ކަމެއްގައި ކާމިޔާބީ މަގުފަހިވެގެންދާނެ ކަމަށް މިނިސްޓަރު ވިދާޅުވިއެވެ.
