އިސްލާމް ދީން ނޫން އެހެން ދީނެއް އޮންނަން ފެނޭތޯ ސުވާލްކޮށްފައެއް ނުވާނެ: އެޗްއާރުސީޢެމް

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީޢެމް) އިން ކުރިއަށްގެންދާ އެއްވެސް ދިރާސާއަކަށް ހަދާ ސާވޭއެއްގައި ރާއްޖޭގައި އިސްލާމްދީން ފިޔަވައި އެހެން ދީނެއް އޮންނަން ފެނޭތޯ ސުވާލުކޮށްފައިނުވާނެ ކަމަށް އެކޮމިޝަނުން އިން ބުނެފިއެވެ.

އެޗްއާރްސީއެމްއިން ކުރިއަށްގެންދާ ދިރާސާއެއްގެ ސާވޭގައި ރާއްޖޭގައި އިސްލާމްދީން ފިޔަވައި އެހެން ދީންތަކަށް ފުރުސަތު ދިނުމާމެދު ފެންނަ ގޮތެއް އޮޅުންފިލުވުމަށް ސުވާލުކުރާ ކަމުގެ ތުހުމަތު މީސްމީޑިޔާގައި އާއްމުވުމާ ގުޅިގެން އިއްޔެ އެ ކޮމިޝަނުންވަނީ ބަޔާނެއް ނެރެފައެވެ.

ކޮމިޝަނުން ނެރުނު ބަޔަނުގައި ބުނެފައިވަނީ ކޮމިޝަނުން ކުރިއަށްގެންދިޔަ އެއްވެސް ދިރާސާއެއްގައި ރާއްޖޭގައި އިސްލާމްދީން ފިޔަވައި އިތުރު ދީނެއް އޮންނަން ފެނޭތޯ ސުވާލުކޮށްފައިނުވާނެ ކަމަށާއި، އެފަދަ ސުވާލެއް ދިރާސާއެއްގައި ހިމެނިކަމަށް ދެކެވޭ ވާހައަކީ ހަގީގަތާ ހިލާފު ވާހަކައެއް ކަމަށެވެ.

އެ ކޮމިޝަނުން އިތުރަށް ބުނީ ކޮމިޝަނުގެ މަސައްކަތްތައް ބައްޓަންކޮށްފަައިވަނީ އިސްލާމީ ޝަރީއަތާއި ދިވެހިރާއްޖޭގެ ގާނޫނުއަސާސީއާއި ރާއްޖޭގައި އަމަލުކުރަމުންދާ ގާނޫނުތަކާއި، ރާއްޖެއިން ސޮއިކޮށްފައިވާ ބައިނަލްއަގުވާމީ މުއާހަދާތަކާ އެއްގޮތްވާ ގޮތުގެ މަތިން ކަމަށެވެ.

އަދި އިސްލާމީ ޝަރީއަތާއި ގާނޫނުއަސާސީން މަނާކޮށްފައި އޮތް އެއްވެސް ކަމެއް ހުއްދަކުރުމަށް ނުވަތަ އެފަދަ ކަމެއް ކުރުމަށް ހިތްވަރު ލިބޭނެ އެއްވެސް ވާހަކައެއް އެ ކޮމިޝަނުގެ ދިރާސާއެއްގައި ބަޔާންކޮށްފައިނުވާނެ ކަމުގައިވެސް އެޗްއާރްސީއެމުން ވަނީ ބުނެފައެވެ.

އިސްލާމީ ޝަރީއަތާއި ގާނޫނުއަސާސީއާއި ގާނޫނުތަކުގެ އިތުރަށް ރާއްޖެއިން ސޮއިކޮށް އިގުރާރުވެފައިވާ ބައިނަލްއަގުވާމީ މުއާހަދާތަކުގެ އިންތަކުގެ ތެރޭގައި ކޮމިޝަނުގެ މަސައްކަތްތައް ހިފަހައްޓާނެ ކަމުގެ ޔަގީންކަން ދިނުމާއެކު، އެ ކޮމިޝަނުން ބުނެފައިވަނީ ހުރިހާ ކަމެއްގައި އެ ކޮމިޝަނުން އިސްކުރާނީ އިސްލާމީ ޝަރީއަތާއި، ދިވެހި ދައުލަތުގެ ގާނޫނުއަސާސީއާއި ދިވެހި ދައުލަތާއި ރައްޔިތުންގެ މަސްލަހަތުތައް ކަމަށެވެ.