ދިވެހިރާއްޖެއާއި ސައުދީ އަރަބިއްޔާއާއި ދެމެދު ވިޔަފާރިއާއި އިގްތިސާދީ ދާއިރާއިން އެއްބާރުލުން އިތުރުކޮށް، ދެ ގައުމުގެ ގުޅުން ބަދަހިކުރުމަށްޓަކައި އެމްއޯޔޫއެއްގައި ސޮއިކޮށްފިއެވެ.
މިކަމުގެ އެމްއޯޔޫގައި ސޮއިކޮށްފައިވަނީ އިކޮނޮމިކް މިނިސްޓަރު މުހައްމަދު ސައީދު ސައުދީގެ ރިޔާދަށް ކުރެއްވި ރަސްމީ ދަތުރުފުޅުގެ ތެރެއިންނެވެ.
ދިވެހި ސަރުކާރުގެ ފަރާތުން އެ އެމްއޯޔޫގައި ސޮއިކުރެއްވީ މިނިސްޓަރެވެ. ސައުދީ ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ކޮމަރސް އަދި ޖެނެރަލް އޮތޯރިޓީ އޮފް ފޮރިން ޓްރޭޑްގެ ބޯޑު ޗެއާމަން، ޑރ. މާޖިދު ބިން އަބްދުﷲ އަލްގަސަބީއެވެ.
އިކޮނޮމިކް މިނިސްޓްރީން ބުނީ، މި އެމްއޯޔޫގެ ސަބަބުން ދެ ގައުމުގެ ދެމެދުގައި ވިޔަފާރީގެ ގުޅުން ހަރުދަނާކުރެވި ބޯޑަރ ހުރަސްކޮށް ކުރެވޭ ފޮރިން އިންވެސްޓްމެންޓްތައް އިތުރަށް ފުޅާކުރުމަށް މަގުފަހިވެގެންދާނެ ކަމަށެވެ. އަދި ވިޔަފާރިއާއި ފަތުރުވެރިކަން އަދި އިމާރާތްކުރުން ފަދަ މުހިއްމު ދާއިރާތަކުން ދެ ގައުމުގެ މެދުގައި އޮތް ގުޅުން ބަދަހިވެގެންދާނެ ކަމަށްވެސް މިނިސްޓްރީން ބުނެފައިވެއެވެ.
ސައުދީން ރާއްޖޭގެ ތަރައްގީއާއި ކުރިއެރުމަށް ދެމުންދާ އަހައްމިޔަތުކަމާއި ބާއްވާ ގާތް ގުޅުން ފާހަގަކުރައްވައި އިކޮނޮމިކް މިނިސްޓަރު ސައީދު ވަނީ ސައުދީ ސަރުކާރަށް ޝުކުރު އަދާ ކުރައްވާފައެވެ
އަދި ސޮއިކުރެވުނު އެމްއޯޔޫއަކީ ދެ ގައުމުގެ މެދުގައި ޒަމާނުއްސުރެ ގާއިމުކުރެވިފައިވާ ގުޅުމުގެ ރަމްޒު ކަމަށާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިގްތިސާދީ ވިސްނުންފުޅު ހާސިލުކުރުމަށް އިތުރު ބާރެއް ލިބިގެންދިޔަ ކަމަށް ވެސް މިނިސްޓަރު ވަނީ ވިދާޅުވެފައެވެ.
ރާއްޖެއާއި ސައުދީ އަރަބިއްޔާއަކީ ޒަމާނުއްސުރެ ހާރިޖީ އަދި އިގްތިސާދީ ގޮތުން ގާތް ގުޅުމެއް ގާއިމުކުރެވިފައިވާ ދެ ގައުމެވެ.
އެއްބަސްވުމުގެ ސަބަބުން އެ ގުޅުން އިތުރަށް ހަރުދަނާކޮށް، ކުރިއަށް އޮތްތަނުގައި ވިޔަފާރި އާއި އިގްތިސާދީ ދާއިރާއިން އިތުރު މަސައްކަތްތައް ކުރުމަށް މަގުފަހިވެ ވިޔަފާރިތަކަށް އިތުރު ފުރުސަތުތަކެއް ހުޅުވިގެންދާނެ ކަމަށް އިކޮނޮމިކް މިނިސްޓްރީން ގަބޫލުކުރެއެވެ.
