ނުރައްކާތެރި ހާދިސާތަކަށް ހޭލުންތެރިވުމަކީ ޤައުމީ އަދި އިންސާނީ ވާޖިބެއް: ރައީސް

ދެ ތުއްތު ކުދިން ނިޔާވި ހިތާމަވެރި ހާދިސާތަކާ ގުޅިގެން، ނުރައްކާތެރި ހާދިސާތަކަށް ހޭލުންތެރިވުމަކީ ޤައުމީ އަދި އިންސާނީ ވާޖިބެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ، މިއަދު އެކްސްގައި ހިއްސާކުރެއްވި ޕޯސްޓެއްގައެވެ.

ރައީސްގެ ޕޯސްޓްގައި ވިދާޅުވެފައިވަނީ، މީގެ ދެ ދުވަސް ކުރިން ހިނގި މަގުމަތީ އެކްސިޑެންޓެއްގައި ޒަޚަމްވި ކުޑަ ކުއްޖަކު ނިޔާވި ޚަބަރާއި، މިއަދު އިމާރާތަކުން ވެއްޓިގެން ތުއްތު ކުއްޖަކު ނިޔާވި ޚަބަރުން، މުޅި ޤައުމަށް ވެސް ނުތަނަވަސް އަދި ހިތާމަވެރި އިޙްސާސްތަކެއް ކޮށްފި ކަމަށެވެ. ނިޔާވި މި ދެ މަޢުޞޫމް ކުދިންގެ ޢާއިލާތަކަށް ތަޢުޒިޔާ ދަންނަވާ ކަމަށާއި، ދެ މަރްޙޫމުން ސުވަރުގޭގެ މަތިވެރި ނިޢުމަތްތަކާއި ފާގަތިކަމުގައި ލެހެއްޓެވުން އެދި ދުޢާ ކުރައްވާ ކަމަށް ވެސް ރައީސް ވިދާޅުވިއެވެ.

ރައީސް ވިދާޅުވި ގޮތުގައި، މަގުމައްޗާއި އުސް އިމާރާތްތަކުގައި ހިނގާ ކުއްލި ނުރައްކާތެރި އެކްސިޑެންޓްތަކާ މެދު ޢާއްމު ހޭލުންތެރިކަން އިތުރުކުރުމަކީ، މުޅި މުޖްތަމަޢު ގުޅިގެން ކުރަން ޖެހިފައިވާ ޤައުމީ އަދި އިންސާނީ މަސައްކަތެކެވެ. ވަކިން ޚާއްޞަކޮށް، އުސް އިމާރާތްތަކުގެ ކުޑަދޮރު، ބެލްކަނި، ރެއިލިންގ ފަދަ ތަންތަނުގެ ސަލާމަތީ ކަންކަން ކަށަވަރުކުރުން ވަރަށް މުހިންމު ކަމަށް ރައީސް ފާހަގަކުރެއްވިއެވެ.

މީގެ އިތުރުން، ނަފްސާނީ ގޮތުން ނުވަތަ ނުކުޅެދުންތެރިކަން ހުންނަ ފަރާތްތަކާއި ތުއްތު ކުދިން ބެލެހެއްޓުމުގައި، ޢާއިލާތަކާއި އިމާރާތްތައް ބަލަހައްޓާ ފަރާތްތައް ގުޅިގެން ޒިންމާދާރު ފިޔަވަޅުތަކެއް އެޅުން ލާޒިމު ކަމަށް ރައީސް ވިދާޅުވިއެވެ.

ރައީސް ވަނީ، ސަރުކާރާއި ކުންފުނިތަކާއި މަދަނީ ޖަމުޢިއްޔާތަކާއި އެންމެހައި ފަރުދުން ގުޅިގެން، ޚާއްޞަ އިސްކަމެއް ދީގެން، މަގުމައްޗާއި އިމާރާތްތަކުގެ ސަލާމަތް ޔަޤީންކޮށް، ހޭލުންތެރިކަން އިތުރުކުރުމުގެ ޕްރޮގްރާމްތައް ރަނގަޅަށް އިންތިޒާމުކޮށްގެން ކުރިއަށް ގެންދެވުމަށް ވެސް ގޮވާލައްވާފައެވެ.

ރައީސްގެ ޕޯސްޓް ނިންމަވާލައްވާފައިވަނީ، ދިވެހި މުޖްތަމަޢާއި ޢާއިލާތަކަށް ސަލާމަތާއި އަމާންކަން މާތްﷲ މިންވަރުކުރެއްވުން އެދި ދުޢާ ކުރައްވަމުންނެވެ.