ދިރާގު ފިންޓެކް ޕްރައިވެޓް ލިމިޓެޑަށް ޕޭމަންޓް ހިދުމަތް ދިނުމުގެ ލައިސަންސް މަރުކަޒީ ބޭންކް، އެމްއެމްއޭއިން އިއްޔެ ދޫކޮށްފި އެވެ.
މިކަމާ ގުޅިގެން އެމްއެމްއޭއިން ބުނީ، ގައުމީ ޕޭމަންޓް ސިސްޓަމްގެ ގާނޫނުގެ ދަށުން، ރާއްޖޭގައި އިލެކްޓްރޯނިކް މަނީ އިޝޫކުރުމުގެ ހިދުމަތް ދިނުމަށްޓަކައި ދިރާގު ފިންޓެކަށް ލައިސަންސް ދޫކޮށްފައިވާ ކަމަށެވެ.
އަދި އެއާއެކު ދިވެހިރާއްޖޭގެ ގުޅުން ޕަބްލިކް ލިމިޓެޑް އިން މިހާރު ދެމުން އަންނަ އިލެކްޓްރޯނިކް މަނީ އިޝޫކުރުމުގެ ޚިދުމަތް ދިރާގު ފިންޓެކް ޕްރައިވެޓް ލިމިޓެޑްގެ ދަށަށް ބަދަލުކުރެވިގެން ދާނެ ކަމަށް އެ އޮތޯރިޓީން ބުނެފައިވެ އެވެ.
ޑިޖިޓަލް ވޮލެޓުގެ ހިދުމަތް މިހާރުވެސް ދެމުން އަންނަ ދިރާގުން، ދިރާގު ފިންޓެކްގެ ނަމުގައި ސަބްސިޑަރީ ކުންފުންޏެއް އުފެއްދީ މިދިޔަ އަހަރުގެ ޑިސެމްބަރު 31 ގަ އެވެ.
