ރާއްޖޭގައި ފަށާފައިވާ ބަންކަރިންގެ ޚިދުމަތުގެ ތެރެއިން، ވޯޓަރ ބަންކަރިންނަށް ބޭނުންވާ ފެން ބާޖު ބާލައި ބޭނުންކުރަން ފަށައިފި އެވެ.
މި ބާޖުގެ މަސައްކަތް ނިންމާ އެމްޕީއެލް އިން ބޭނުންކުރަން ފެށީ މިއަދު އެވެ. އެގޮތުން ބާޖު މޫދަށް ބާލާފައި ވަނީ ތިލަފުށިންނެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިގްތިސާދީ އެޖެންޑާގެ ދަށުން ރާއްޖޭގައި ބަންކަރިންގެ ޚިދުމަތް އަލަށް ތައާރަފްކުރީ ސެޕްޓެމްބަރު މަހުގެ 19 ވަނަ ދުވަހުގަ އެވެ. އެ ޚިދުމަތް އެންމެ ފުރަތަމަ ފަށާފައި ވަނީ ހއ. އަތޮޅުގަ އެވެ.
ބަންކަރިންގެ ޚިދުމަތް ފެށިގެން އައި އިރު، ވޯޓަރ ބަންކަރިންގެ ޚިދުމަތް ވެސް އެ ސަރަހައްދުން ދީފައިވެ އެވެ. އެގޮތުން މިދިޔަ އޮކްޓޯބަރު މަހު ރާއްޖެ އައި ޕެނަމާގެ ބޯޓަކީ ޚިދުމަތް ހޯދި ފުރަތަމަ ބޯޓެވެ.
މި ޚިދުމަތަށް ޚާއްސަ ބާޖެއް މިއަދު ބޭނުންކުރަން ފެށި އިރު އެކަމާ ގުޅޭގޮތުން އެމްޕީއެލްގެ ސީއީއޯ އަދި މެނޭޖިންގ ޑިރެކްޓަރ މުހަންމަދު ވަޖީހު އިބްރާހިމް ވިދާޅުވީ، ޚިދުމަތް ފެށިގެން އައި އިރުއެ ޚިދުމަތް ދީފައި ވަނީ އެންމެ އެކަށީގެންވާ ގޮތުގައި ނޫން ކަމަށެވެ. އެކަމަކު އެ ދުވަހުން ފެށިގެން ވެސް މި ޚިދުމަތް ފުރިހަމައަށް ދެވޭނެ މަގެއް ހޯދުމަށް މަސައްކަތް ފަށާފައިވާ ކަމަށާއި، މިއަދު މި ފެންނަނީ އެކަމުގެ ނަތީޖާ ކަމަށެވެ.
އަޅުގަނޑުމެން ފެނުގެ ބަންކަރިން ޚިދުމަތް ދޭން ފެށި އިރުގައި، އަޅުގަނޑުމްނަށް ވަނީ އެކަމަށް ބޭނުންވާ ހުރިހާ އިކުއިޕްމަންޓެއް ނުހޯދި. އެއީ މީގެން ކޮންމެ ކަމަކީ ބޮޑު ޚަރަދަކަށް ވެފައި އެކަމަށް ތައްޔާރުވާން ވަގުތު ބޭނުންވާތީ. މި ވޭތުވެދިޔަ ދޮޅުމަހު ބަންކަރިުން ޚިދުމަތް ދިނީ ލޭންޑިންގ ކްރާފްޓެއްގައި ޕްލާސްޓިކް ހަން ބަހައްޓައިގެން. ފުރަތަމަ ދުވަހުން ފެށިގެން ޒަމާނީ ފެން ބާޖެއް ތައްޔާރުކުރުމުގެ މަސައްކަތް ފެށިން.
ވަޖީހު ވިދާޅުވިގޮތުގައި އެމްޕީއެލް އިން ތައްޔާރުކޮށް ބޭނުންކުރަން، އެ ފެށި ފެން ބާޖަކީ ދުނިޔޭގެ އެހެން ގައުމުތަކުގައި ވެސް ފެނުގެ ބަންކަރިން ޚިދުމަތް ދޭ ފެންވަރުގެ ބާޖެކެވެ. އަދި އެ ބާޖުގައި އެއްފަހަރާ 200 ޓަނުގެ ފެން ރައްކާކުރެވޭނެ ކަން އޭނާ ފާހަގަކުރެއްވި އެވެ.
ވަޖީހު ވިދާޅުވިގޮތުގައި އަންނަ ހަފްތާގެ ތެރޭގައި އެ ބާޖު އިހަވަންދިއްޕޮޅަށް ފޮނުވާނެ އެވެ. އަދި އަންނަ ހަފްތާއިން ފެށިގެން އޭގެ ބޭނުން ވެސް ކުރަން ފަށާނެ ކަމަށާއި، މިކަމުގެ ނަތީޖާ އަށް ބަލާފައި މިކަން ފުޅާކުރާނެ ކަމަށް ވެސް ވަޖީހު ވިދާޅުވި އެވެ.
