ޔޫރަޕުގެ އެކިގައުމުތަކަށް ނިސްބަތްވާ 7 ފްލައިޓަކަށް އެއްފަހަރާ ބޮން އަޅާނެ ކަމުގެ އިންޒާރާއެކު އެތަކެއް ގެއްލުމެއް!

ޔޫރަޕުގެ އެކި ގައުމުތަކުގެ މެދުގައި ދަތުރުކުރަމުންދިޔަ ވިޔަފާރި އުސޫލުން ޕެސެންޖަރުން އުފުލާ ހަތް ބޯޓަކަށް އެއްފަހަރާ ބޮމުގެ އިންޒާރު ދިނުމާ ގުޅިގެން ސެކިއުރިޓީ ފަރާތްތަކުން ވަނީ ޚާއްޞަ ފިޔަވަޅުތަކެއް އަޅާފައިވާ ކަމަށް ރިޕޯރޓްތައްބުނެފި އެވެ.

މި ހާދިސާއާ ގުޅިގެން ބައެއް ބޯޓުތައް ބަލައިފާސްކުރެވުނުއިރު، އަނެއްބައި ބޯޓުތަކުގެ ދަތުރުތައް ވަނީ އެހެން މިސްރާބުތަކަށް ބަދަލުކުރެވިފައެވެ.

ރޭވިގެން ދެވިފައިވާ މި އިންޒާރުތަކަކީ ނުރައްކާތެރި ނިޔަތެއްގައި ދެވިފައިވާ ދޮގު އިންޒާރުތަކެއް ކަމަށް ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ.

މި ހާދިސާއާ ގުޅިގެން ސެކިއުރިޓީ ކަންކަން ބަލަހައްޓާ އިދާރާތަކުން ވަނީ ގުޅިގެން، ގިނަ ގައުމުތަކެއް ހިމެނޭ ގޮތަށް ބޮޑު ތަހުގީގެއް ފަށާފައެވެ. އެއްފަހަރާ ހަތް ބޯޓަކަށް މިފަދަ ނުރައްކާތެރި ދޮގު އިންޒާރުތަކެއް ލިބުމާ ގުޅިގެން، މައްސަލައިގެ ހަގީގަތް ހޯދުމަށާއި ސެކިއުރިޓީ ކަށަވަރުކުރުމަށް ގައުމުތަކުގެ ކަމާބެހޭ އިދާރާތަކުން އަންނަނީ ގުޅިގެން މަސައްކަތް ކުރަމުންނެވެ.

މި އިންޒާރުތަކާ ގުޅިގެން އަޅަންޖެހުނު ސެކިއުރިޓީ ފިޔަވަޅުތަކުގެ ސަބަބުން އެއާލައިންތަކުގެ ދަތުރުތަކަށް ވަނީ ނުހަނު ބޮޑެތި ލަސްވުންތަކެއް ކުރިމަތިވެފައެވެ. ބޯޓުތައް ބަލައިފާސްކުރުމުގެ މަސައްކަތްތަކާއި، ދަތުރުތަކުގެ މިސްރާބު ބަދަލުކުރުމުގެ ސަބަބުން އެއާލައިންތަކުގެ ތާވަލުތަކަށް ބުރޫއަރައި، ވައިގެ ދަތުރުފަތުރުގެ ޚިދުމަތްތަކަށް ވަނީ ބޮޑެތި ދަތިތަކެއް ކުރިމަތިވެފައެވެ.