ރައީސް ދެއްވީ ލިޔުން ލިބި، ފްލެޓް ނުލިބޭ މީހުންނަށް ފްލެޓް ދެއްވާނެކަމުގެ ޔަގީންކަން

ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ސަރުކާރުގައި ހިޔާ ފްލެޓް ސަރަހައްދުން ފްލެޓް ލިބުނުކަމުގެ ލިޔުން ދޫކޮށްފައިވާ މީހުންެގެ ތެރެއިން ފްލެޓް ނުލިބުނު މީހުންނަށް މިސަރުކާރުން ފްލެޓް ދެއްވާނެކަމުގެ ޔަގީންކަން ރައީސް ޑރ. މުހައްމަދު މުއިއްޒުދެއްވައިފިއެވެ.

ރައީސް މިފަަދަ ޔަގީންކަމެއްދެއްވީ ސަރުކާރުން ކުރިއަަށްގެންދާ "ރައީސްގެ ޖަވާބު" ސިލްސިލާގެ ޕްރޮގުރާމްގެ ތެރެއިން، މީހަކު ކުރި ސުވާލަކަށް ޖަވާބުދެއްވަމުންނެވެ.

"ރައީސްގެ ޖަވާބު" ޕްރޮގުރާމްގައި، ގދ. ގައްދޫ، މާފެހި، މުޙައްމަދު ޝުހައިލް ވަނީ ރައީސް ޑރ. މުއިއްޒު ހައުސިންގ މިނިސްޓަރަކަށް ހުންނެވިއިރު ހިޔާ ސަރަހައްދުން ފްލެޓް ލިބުނު ކަމުގެ ލިޔުން ހަވާލުކޮށްފައި ތިބި މީހުންގެ ތެރެއިން ފްލެޓް ނުލިބޭ މީހުންނަށް ފްލެޓް ހޯއްދައިވައިދެއްވާނެ ކަމަށް ރައީސް ވައުދުވެވަޑައިގެންނެވި ކަމަށް ބުނެ، އެކަމާ ގުޅޭ ގޮތުން ސުވާލުކޮށްފައެވެ.

އެ ސުވާލަށް ޖަވާހު ދެއްވަމުން ރައީސް ވިދާޅުވީ ހިޔާ ފްލެޓްގެ ލިބުނުކަމުގެ ލިޔުން ލިބުނު މީހުންގެ ތެރެއިން ފްލެޓް ނުލިބޭ މީހުންނަށް ސަރުކާރުން ފަށާ ފުރަތަމަ ސޯޝަލް ހައުސިން މަޝްރޫއުގެ ތެރެއިން ފްލެޓް ލިބޭނެ ކަމަށެވެ. ރިޔާސީ އިންތިހާބުގެ ކެމްޕެއިންގައިވެސް ރައީސް މުއިއްޒު ވަނީ ހިޔާ ފްލެޓް ލިބުނުކަމުގެ ލިޔުން ލިބުނު، ނަމަވެސް ފްލެޓް ނުލިބުނު މީހުންނަށް އެމަނިކުފާނުގެ ވެރިކަމުގައި ފްލެޓް ދެއްވާނެކަމަށް ވައުދުވެވަޑައިގެންފައެވެ.

ރައީސް ދެވަނަ ފަހަރަށް މިފަދައިން ވިދާޅުވެފައިވާއިރު ރިޔާސީ ވައުދުފުޅާ އެއް ގޮތަށް ހުޅުމާލޭ ހިޔާ ޓަވަރުތަކުގައި އިތުރު ލިފްޓް ހަރުކުރުމުގެ މަސައްކަތްތައް ވެސް ވަނީ ފަށާފައެވެ. މީގެ އިތުރުން ވައުދުވެވަޑައިގަތް ގޮތަށް ފްލެޓުތަކުގެ ކުލި ވަނީ ކުޑަކޮށްފައެވެ.