ހަވީރީގޯޅީގެ އެކި ސަރަހައްދުތަކަށް ކުނި އަޅާފައިވާތީ އެކަން ކުރި ފަރާތްތައް ހޯދަނީ

މާލޭގެ ހަވީރީގޯޅީގެ އެކި ސަރަހައްދުތަކަށް ގިނަ އަދަދެއްގެ ކުނި އަޅާފައިވާ މައްސަލައެއް ފެންމަތިވެ، އެކަން ކުރި ބަޔަކު ހޯދުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.

މާލެ ސިޓީ ކައުންސިލުން މައުލޫމާތު ދޭ ގޮތުގައި، ހަވީރީގޯޅީގެ އެކި ދިމާތަކަށް ކުނި އަޅާފައި ހުރިކަން ފާހަގަކުރެވިފައިވަނީ މިއަދުގެ ވަގުތެއްގައެވެ. މިގޮތަށް މަގުމައްޗަށް ކުނި އެޅުމަކީ މާލޭގެ ސާފުތާހިރުކަން ގެއްލި، އާންމުންނަށް އުނދަގޫވާ ކަމަކަށްވާތީ، އެ ކުނިތައް އެޅި ފަރާތްތައް ދެނެގަތުމަށް ކައުންސިލުން މިހާރު ދަނީ ހާއްސަ މަސައްކަތްތަކެއް ކުރަމުންނެވެ.

މިކަމާ ގުޅިގެން މާލެ ސިޓީ ކައުންސިލުން ވަނީ އާންމުންގެ އެހީތެރިކަމަށް އެދިފައެވެ. އެގޮތުން މާލެ ސިޓީގެ މަގުތަކަށް ކުނި އަޅާ ފަރާތްތައް ފާހަގަކުރެވޭނަމަ، އެކަމުގެ ފޮޓޯ ނުވަތަ ވީޑިއޯ ކައުންސިލްގެ ހޮޓްލައިން ނަންބަރު 9341144 އަށް ފޮނުއްވައިދެއްވުމަށް ކައުންސިލުން އިލްތިމާސްކުރެއެވެ.

މާލެ ސިޓީއަކީ އެންމެނަށް އުޅެވޭނެ ސާފުތާހިރު ތަނަކަށް ހެދުމަށްޓަކައި ހުރިހާ ރައްޔިތުންގެ އެއްބާރުލުން ބޭނުންވާކަން ފާހަގަކޮށް، ކައުންސިލުން ބުނީ މަގުމައްޗަށް ކުނި ނޭޅުމަށާއި، ކަނޑައެޅިފައިވާ އުސޫލުތަކުގެ މަތިން ކުނި އުކާލުމަށް ހުރިހާ ފަރާތްތަކަށް ނަސޭހަތްތެރިވާ ކަމަށެވެ.

މާލޭގެ މަގުތައް ސާފުކޮށް ބޭއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުންނާއި މާލެ ސިޓީ ކައުންސިލުން ހާއްސަ އިސްކަމެއް ދެއްވައިގެން ކުރިއަށްގެންދަވާ މަސައްކަތެކެވެ.