އެދުމަކީ، މާލޭގެ ކޮންމެ ޒުވާނަކަށްވެސް،، ޔަޤީންކަމާއެކީ، ބޯހިޔާވަހިކަމާއެކު، ރަނގަޅު ދިރިއުޅުމެއްގެ އިތުރަށް ޢިލްމާއެކު ރައްކާތެރިކަން ލިބިގެންދިޔުން ކަމަށް މާލެ ސިޓީ މޭޔަރ އާދަމް އާޒިމް ވިދާޅުވެއްޖެއެވެ.
މިއަދަކީ ބައިނަލްއަޤްވާމީ ޒުވާނުންގެ ދުވަހެވެ. ދުވަހުގެ ޝިއާރަކީ "ފްރޮމް ކްލިކްސް ޓު ޕްރޮގްރެސް: ޔޫތު ޑިޖިޓަލް ޕާތްވޭސް ފޮރ ސަސްޓެއިނަބަލް ޑިވެލޮޕްމަންޓް".
ދުވަހާ ގުޅިގެން މޭޔަރ ދެއްވި ހިތާބުގައި ވަނީ ދުނިޔޭގެ މުސްތަޤްބަލް ބައްޓަންކުރުމުގައި ޒުވާނުން ބޮޑު ދައުރެއް އަދާ ކުރާކަން ހަނދާން ކޮށްދެއްވާފައެވެ.
ޑިޖިޓަލް ޓްރާންސްފޯމޭޝަނާއި ދެމެހެއްޓެނިވި ތަރައްޤީގެ ލަނޑުދަނޑިތަކުގެ މައްޗަށް އަލިއަޅުއްވާލައްވައި، މޭޔަރ ވިދާޅުވީ ދުނިޔޭގެ މި މަޤްޞަދުތަކުގެ ތެރެއިން ކުރިއެރުންތައް ހަލުވިކުރުމަށް ޓަކައި ޒުވާނުންގެ ހަކަތައާއި އިނޮވޭޝަނަކީ ވަރަށް މުހިންމު ކަމެއްކަން މި ޝިޢާރުގައި ފާހަގަކޮށްފައިވާ ކަމަށެވެ. ދިވެހިރާއްޖޭގައި އަބަދުވެސް ޒުވާނުންނަކީ، ޤައުމު ބައްޓަންކުރެވިފައިވާ ބަދަލުތައް ގެނައުމަށް މަގުފަހިކޮށްދޭ، ބަދަލު ގެނައުމުގައި އެންމެ ކުރީ ސަފުގައި ހަރަކާތްތެރިވާ ބައެއް ކަން ފާހަގަ ކުރަށްވާ މޭޔަރ ވިދާޅުވީ މި ޤައުމުގެ މިނިވަންކަމަކީ، އިސްތިޤްލާލަށް މަގުފަހިކޮށްދިން ޒުވާން ޖީލެއްގެ ލީޑަރޝިޕާއި ވިސްނުމުގެ ހެއްކެއް ކަމަށެވެ.
ވޭތުވެދިޔަ އަހަރުތަކުގައި ޒުވާނުން އިސްނަގައިގެން ކުރިއެރުމުގެ މި ރޫޙުގެ ސަބަބުން ތަޢުލީމުގެ ސަޤާފަތެއް އުފެދި، ޔުނިވަރސިޓީތައް ޤާއިމުވެ، ގްރެޖުއޭޓް ލެވެލްއާ ހަމައަށް ހިލޭ ތަޢުލީމު ފޯރުކޮށްދިނުމަށް މަގުފަހިވެގެން ދިޔަ ަކަމަށާއި މިއަދު ލިބިފައިވާ ޑިމޮކްރަސީއާއި ލާމަރުކަޒީ ނިޒާމަކީވެސް ޒުވާނުންގެ ޙަރަކާތްތެރިކަމާއި ޢަޒުމުގެ މޭވާ ކަމަށް މޭޔަރ ވިދާޅުވިއެވެ، ޑިޖިޓަލް ޒަމާނަށް ދަތުރުކުރާއިރު، ޒުވާނުންގެ ދައުރު މިވަނީ އިތުރަށް މުހިންމުވެފައި ކަން ފާހަގަ ކުރަށްވާ މޭޔަރ ވިދާޅުވީ ޑިޖިޓަލް އިނޮވޭޝަންގެ ޒަރިއްޔާއިން ޒުވާނުން ބާރުވެރިކުރުވައި، ކުރިއެރުމާއި ޤާބިލުކަން އިތުރުކޮށްދޭނެ މާހައުލެއް ޤާއިމުކުރުމަކީ ކޮންމެހެން ކުރަންޖެހޭ ކަމެެއް ކަމަށެވެ. މޭޔަރ ވިދާޅުވީ މުސްތަޤްބަލަށް ބަލާއިރު، އެމަނިކުފާނުގެ އެދުމަކީ، މާލޭގެ ކޮންމެ ޒުވާނަކަށްވެސް، ދިރިއުޅުމުގެ ގޮންޖެހުންތަކާ، ޔަޤީންކަމާ އެކީގައި، ބޯހިޔާވަހިކަމާއި، ޞިއްޙަތަށް ފައިދާހުރި ކާބޯތަކެއްޗާއި، ރަނގަޅު ދިރިއުޅުމުގެ ފެންވަރެއް ލިބިފައިވުމުގެ އިތުރަށް ޢިލްމުގެ ތެރެއިން ރައްކާތެރިކަން ލިބިގެންދިޔުން ކަމަށެވެ. މޭޔަރ ވިދާޅުވީ ޒުވާނުންގެ ޚިދުމަތުގެ އަގު ވަޒަންކޮށް، ކުރިމަތިވެފައިވާ ގޮންޖެހުންތަކަށް ޙައްލު ހޯދައިގެންގެން ކަމަށެވެ.
މޭޔަރ އާޒިމް ވަނީ ދުވަހުގެ މުނާސަބަތުގައި، މާލޭގެ ހުރިހާ ޒުވާނުންނަށް ހެޔޮއެދުންތައްފޮނުއްވާފައެވެ.
