މަޖިލީހުގެ މަސައްކަތްތަކަށް ޚިޔާލު ހޯދާ އިލެކްޓްރޯނިކް ނިޒާމާ ގުޅޭގޮތުން މަޝްވަރާ ބައްދަލުވުމެއް ބާއްވަނީ

ރައްޔިތުންގެ މަޖިލީހުގެ މަސައްކަތްތަކާ ގުޅޭގޮތުން އާންމުންގެ ޚިޔާލު ހޯދުމަށް ހުޅުވާލާ މައްސަލަތަކަށް، ވީހާވެސް ފަސޭހައިން ޚިޔާލު ހުށަހެޅޭނެ މަގު ތަނަވަސްކޮށްދިނުމުގެ ގޮތުން ތަޢާރަފުކުރުމަށް ހަމަޖެހިފައިވާ އައު އިލެކްޓްރޯނިކް ނިޒާމާ ގުޅޭގޮތުން ޚިޔާލު ބަދަލުކުރުމުގެ ޚާއްޞަ ބައްދަލުވުމެއް ބޭއްވުމަށް ރައްޔިތުންގެ މަޖިލީހުގެ އިދާރާއިން ނިންމައިފިއެވެ.

ރައްޔިތުންގެ މަޖިލީހުން މަޢުލޫމާތު ދެއްވާފައިވާ ގޮތުގައި މި ބައްދަލުވުން ބޭއްވުމަށް ހަމަޖެހިފައިވަނީ 5 ނޮވެންބަރު 2026 ވާ ބުރާސްފަތި ދުވަހުގެ ހަވީރު 15:30 ގައި، ރައްޔިތުންގެ މަޖިލީހުގެ އިދާރާގައެވެ.

މި ބައްދަލުވުމުގެ މައިގަނޑު މަޤްޞަދަކީ މަޖިލީހުން ޤާނޫނުތައް ހެދުމާއި، ކޮމިޓީތަކުން ކުރިއަށްގެންދާ މުހިންމު މަސައްކަތްތަކަށް އާންމު ރައްޔިތުންނާއި މަދަނީ ޖަމްޢިއްޔާތަކުގެ ޚިޔާލާއި މަޝްވަރާ މިހާރަށްވުރެ ފުޅާ ދާއިރާއެއްގައި އަދި ޒަމާނީ ވަސީލަތްތައް މެދުވެރިކޮށް ހޯދޭނެ އިންތިޒާމު ހަމަޖެއްސުމެވެ. އެގޮތުން ތަޢާރަފުކުރާ އައު އިލެކްޓްރޯނިކް ޕްލެޓްފޯމަކީ ރައްޔިތުންނަށް ފަސޭހައިން ބޭނުންކުރެވޭނެ، އިތުބާރު ހުރި ނިޒާމަކަށް ހެދުމަށްޓަކައި ކަމާގުޅޭ ފަރާތްތަކުގެ ޚިޔާލު ހޯދުމަށް މަޖިލީހުން ވަނީ ނިންމާފައެވެ.

ރައްޔިތުންގެ މަޖިލީހުގެ އިދާރާއިން ވަނީ މި މުހިންމު ބައްދަލުވުމުގައި ވީހާވެސް ގިނަ ފަރާތްތަކަކުން ބައިވެރިވެވަޑައިގަތުމަށް ދަޢުވަތު އަރުވާފައެވެ. މި ބައްދަލުވުމުގައި ބައިވެރިވެވަޑައިގަތުމަށް ޝައުޤުވެރިވާ ފަރާތްތަކުން 4 ނޮވެންބަރު 2026 ވާ ބުދަ ދުވަހުގެ މެންދުރު 12:00 ގެ ކުރިން ރަޖިސްޓަރީ ކުރަންޖެހެއެވެ.

ރަޖިސްޓަރީ ކުރެއްވުމަށް މަޖިލީހުގެ ފޯމް ލިންކު (https://forms.majlis.gov.mv/public-cso) މެދުވެރިކޮށް ނުވަތަ ރައްޔިތުންގެ މަޖިލީހުގެ އިދާރާގެ ފޯނު ނަންބަރު 3032655 އަށް ގުޅުއްވައިގެން ކުރިއަށް ގެންދެވޭނެ ކަމަށް އެ އިދާރާއިން ވިދާޅުވެއެވެ.