ތިމާވެއްޓާއި ގުޅުން ހުރި މަސައްކަތްތައް ކުރުމަށް އެހީތެރިކަން ފޯރުކޮށްދިނުމަށް ފަށާފައިވާ 'އެންދެރި ޕްރޮޖެކްޓު' ގެ ދަށުން ލ. އަތޮޅުގައ މިހާރު ކުރަމުންދާ ގުދުރަތީ ރައުސްމާލު ހިސާބުކިތާބުކުރުމުގެ މަސައްކަތް މުޅި ރާއްޖެއަށް ފުޅާ ކުރުމަށް ނިންމާފައިވާ ކަމަށް އެންވަޔަރަމެންޓް މިނިސްޓަރު ތޯރިގް އިބްރާހީމް ވިދާޅުވެއްޖެ އެވެ.
މިނިސްޓަރު މިގޮތަށް ވިދާޅުވީ އެންދެރި ސްމޯލް ގްރާންޓްސް 2024 ހަވާލުކުރުމަށް ލ. ފޮނަދޫގައި މިއަދު ބޭއްވުނު ރަސްމިއްޔާތުގައި ވާހަކަދައްކަވަމުން ނެވެ. އެންދެރި ޕްރޮޖެކްޓުގެ މަސައްކަތް މިހާރު ކުރެވެމުންދަނީ ހަމައެކަނި ލ. އަތޮޅުގަ އެވެ.
ގުދުރަތީ މުއްސަނދިކަން ވަޒަން ކުރުމުގެ މުހިއްމުކަމާ ގުޅިގެން ވާހަކަ ދައްކަވަމުން މިނިސްޓަރު ވިދާޅުވީ ބޭރުގެ ގިނަ ގައުމުތަކުގައި އެ ބައެއްގެ މުހިންމު ގުދުރަތީ ވަސީލަތްތަކުގެ އަގު ވަޒަން ކުރެވިފައިވާކަމަށެވެ. ނަމަވެސް ރާއްޖޭގެ އެންމެ މުހިއްމު ވަސީލަތްތައް ކަމަށްވާ ފަރުތަކާއި، ޗަސްބިންތަކާއި، މޫދުވިނައިގެ މާހައުލީ ނިޒާމުތައް އޮތީ ވަޒަން ނުކުރެވި ކަމަށެވެ.
އެހެންކަމުން ލ. އަތޮޅުގައި ކުރަމުންދާ މަސައްކަތް ނިމުމުން މުޅި ރާއްޖެއަށް އެ މަސައްކަތް ފުޅާ ކުރައްވާނެ ކަމަށް މިނިސްޓަރު ވިދާޅުވި އެވެ. .
އެންދެރި މަޝްރޫއުގެ ދަށުން ހިންގާ މި މަސައްކަތް ކުރުމަށް ހަވާލުކޮށްފައިވަނީ އޮސްޓްރޭލިއާގެ ޔުނިވަރސިޓީ އޮފް ނިއު ސައުތް ވޭލްސްއާއެވެ. މި މަސައްކަތުގެ ތެރެއިން ލ. އަތޮޅުގެ މުރަކަ ފަރުތަކާއި، މޫދު ވިނައާއި، ޗަސްބިންތަކުގެ މިންވަރާ ފެންވަރު ބެލުމުގެ ދިރާސާތަކެއް މި އަހަރު ތެރޭގައި ކޮށްފައިވެ އެވެ. އެ ދިރާސާތަކުގެ ނަތީޖާ އާންމު ކުރުމަށާއި އެ ކަމާއި ގުޅިގެން ކަމާބެހޭ މުއައްސަސާތަކަށް ދޭން ޖެހޭ ތަމްރީން ދިނުމަށްޓަކައި ޔޫއެންއެސްޑަބްލިއު ގެ ޓީމެއް އަންނަ ނޮވެމްބަރު މަހު ރާއްޖެއަށް ޒިޔާރަތްކުރުމަށް ވަނީ ހަމަޖެހިފަ އެވެ.
