ރާއްޖޭގެ ބޮޑު ސަރަހައްދަކަށް މޫސުން ގޯސްވެ، ހއ. އިން ގދ. އަތޮޅަށް ހުދު ސަމާލު ނެރެފި

ރާއްޖޭގެ މޫސުން ގޯސްވެ، ގައުމުގެ ބޮޑު ސަރަހައްދަކަށް މޫސުމާ ބެހޭ ގައުމީ އިދާރާ (މެޓް) އިން ހުދު ސަމާލު ނެރެފިއެވެ.

މެޓް އޮފީހުން މިފަހަރު ހުދު ސަމާލު ނެރެފައިވަނީ ރާއްޖޭގެ އެންމެ އުތުރުން ހއ. އަތޮޅުން ފެށިގެން ދެކުނުގެ ގދ. އަތޮޅާ ހަމައަށެވެ. މި ސަމާލު ނެރެފައިވަނީ މިއަދު މެންދުރުފަހު 15:00 އިން ފެށިގެން މިރޭ 21:00 ގެ ނިޔަލަށެވެ.

މޫސުމާ ބެހޭ ގައުމީ އިދާރާއިން ހާމަކޮށްފައިވާ ގޮތުގައި، މި މުއްދަތުގެ ތެރޭގައި އެ ސަރަހައްދުތަކަށް ބޯކޮށް ވާރޭވެހުމާއެކު ގުގުރާނެ ކަމަށް ވަނީ ލަފާކުރެވިފައެވެ. އަދި ވިލާގަނޑުގައި ވައިގަދަވުމުގެ ފުރުސަތު ވެސް އޮތް ކަމަށް މެޓް އޮފީހުން މައުލޫމާތު ދެއެވެ.

މެޓް އޮފީހުން މި ސަރަހައްދުތަކަށް ހުދު ސަމާލު ނެރެފައިވާއިރު، މިއަދު ހެނދުނު 8:45 އިން ފެށިގެން މެންދުރުފަހު 14:45 އާ ހަމައަށް ވެސް މެޓުން ވަނީ ކ. އަތޮޅުން ފެށިގެން ތ. އަތޮޅާ ހަމައަށް ހުދު ސަމާލު ނެރެފައެވެ. އެހެންކަމުން މުޅި ރާއްޖޭގެ އެކި ހިސާބުތަކަށް މިއަދު މޫސުން ވަރަށް ބޮޑަށް ގޯސްވެފައިވާކަން ފާހަގަކުރެވެއެވެ.

ރާއްޖެއަށް މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ބާރު ގަދަވުމުގެ ސަބަބުން ކުރަމުންދާ ވިއްސާރައެކެވެ. އާންމުކޮށް މި ދުވަސްވަރަކީ ރާއްޖޭގެ އެކި ކަންކޮޅުތަކަށް ވިއްސާރަވެ، ކަނޑުތައް ގަދަވާ ދުވަސްވަރެކެވެ. މޫސުން ގޯސްވުމުގެ ސަބަބުން ބައެއް ރަށްރަށުގައި ފެންބޮޑުވުމާއި، ރުއްގަސް ވެއްޓުމާއި، އަދި ކަނޑުދަތުރުފަތުރަށް ބުރޫއެރުން ފަދަ ހާދިސާތައް ކުރިމަތިވުމަކީ އެކަށީގެންވާ ކަމެކެވެ.

މި ދުވަސްވަރު ކަނޑުދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ. ވަކިން ހާއްސަކޮށް، ކުދި އަދި މެދުފަންތީގެ އުޅަނދުފަހަރުގައި ދަތުރުކުރާ ފަރާތްތަކުން ދަތުރަށް ފުރުމުގެ ކުރިން އެންމެ ފަހުގެ މޫސުމީ މައުލޫމާތު ހޯދުމަށާއި، ސަލާމަތީ އާލާތްތައް ފުރިހަމައަށް ހުރިތޯ ޔަގީންކުރުމަށް އެމްއެންޑީއެފް ކޯސްޓްގާޑުން ވެސް އަންގައެވެ. މީގެއިތުރުން، ބޯކޮށް ވާރޭވެހި ފެންބޮޑުވެދާނެ ކަމަށްޓަކައި ގެދޮރަށް ފެން ނުވަންނާނެހެން ވެލިބަސްތާ ޖެހުމާއި، އަގުބޮޑެތި މުދާތައް ރައްކާތެރި ތަންތަނަށް ބަދަލުކުރުމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވެސް އިރުޝާދު އަރުވައެވެ.