ސްޓޭޓްފާމާގެ ބޭސްތަކުގެ މައުލޫމާތު ލިބޭ ހާއްސަ ޕޯޓަލްއެއް ލޯންޗުކުރަނީ

ސްޓޭޓްފާމާގެ ފާމަސީތަކުން ލިބެން ހުންނަ ހުރިހާ ބޭހެއްގެ މައުލޫމާތާއި، އެ ބޭސްތައް ލިބެން ހުންނަ ފާމަސީތައް ފަސޭހަކަމާއެކު ބަލާލެވޭނެ ހާއްސަ ޕޯޓަލްއެއް އަންނަ ސެޕްޓެމްބަރު މަހުގެ ތެރޭގައި އިފްތިތާހު ކުރުމަށް އެ ކުންފުނިން ނިންމައިފިއެވެ.

މި ޕޯޓަލް ފަރުމާކުރެވެމުންދަނީ ކޮންމެ ތާކު ހުރެގެންވެސް ރައްޔިތުންނަށް ބޭނުންވާ ބޭސް ލިބެން ހުންނަ ފާމަސީތަކާއި، އެ ބޭސްތަކުގެ އަގުތައް ވަގުތުން ބަލާލެވޭނެ ގޮތަށެވެ. މިއީ ބޭސް ހޯދުމުގައި ރައްޔިތުންނަށް ދިމާވާ ދަތިތަކަށް ލުޔެއް ހޯދައިދިނުމުގެ މަގްސަދުގައި ކުރިއަށްގެންދާ މުހިންމު މަސައްކަތެކެވެ.

ސްޓޭޓްފާމާ އިން ހާމަކުރި ގޮތުގައި، މި މަސައްކަތަކީ ރައްޔިތުން އުފުލަމުންދާ ތަކުލީފުތައް ދެނެގަނެ، އެކަމަށް ދާއިމީ ހައްލެއް ހޯދުމަށް ކުރާ މަސައްކަތުގެ ބައެކެވެ. ޚާއްސަކޮށް ބޭސް ލިބެން ހުންނަ ފާމަސީތައް ސީދާކޮށް އެނގެން ނެތުމަކީ ގިނަ ބަޔަކު ކަންބޮޑުވުން ފާޅުކުރަމުންދާ މައްސަލައަކަށް ވާތީ، މި ޕޯޓަލްއާއެކު އެކަމަށް ބޮޑު ލުޔެއް ލިބިގެންދާނެ ކަމަށް އެ ކުންފުނިން އުންމީދު ކުރެއެވެ.

މި އައު ނިޒާމުގެ ސަބަބުން ބޭސް ހޯދުމަށް އެއް ފާމަސީން އަނެއް ފާމަސީއަށް ހިނގަންޖެހޭ ޖެހުމަށް ނިމުމެއް އައިސް، ޑިޖިޓަލްކޮށް ހުރިހާ މައުލޫމާތެއް އިނގިލި ކުރިއަށް ލިބިގެންދާނެއެވެ. މީގެ އިތުރުން، މި ޕޯޓަލް މެދުވެރިކޮށް ބޭހުގެ ސްޓޮކް ހުރި މިންވަރުވެސް ކަސްޓަމަރުންނަށް ވަގުތުން ބަލައިލެވޭނެ އިންތިޒާމު ހަމަޖެހިގެންދާނެއެވެ.