މިއަދަށް އިރު އެރިފަހުން މިހާތަނަށް ޣައްޒާއިން 21 މީހުން ޝަހީދު ކޮށްލައިފި

މިއަދަށް އިރު އެރިފަހުން އެކަނިވެސް މިހާތަނަށް ޣައްޒާއިން 21 މީހުން ޝަހީދު ކޮށްލައިފިއެވެ.

އިސްތިއުމާރީ އިސްރާއީލުގެ ޓެރަރިސްޓުން ގެންދަނީ މުޅި ޣައްޒާއަށް ބޮންއަޅަމުންނެވެ.

ވައިގެމަގުން ދެމުންގެންދާ ހަމަލާތަކުގެ އިތުރުން ޓޭންކާއި އެނޫންވެސް ބަރު ހަތިޔާރާއެކު ޣައްޒާގެ އެކި ރަށްތަކަށް ވަދެގަނެ ބޮޑެތި ޖަރީމާތައް ހިންގަމުން އެބަ ގެންދެއެވެ.

އެންމެ ވަރުގަދަ ވައިގެ ހަމަލާތައް މިއަދުގެ މިހާތަނަށް ދީފައިވަނީ ޣައްޒާގެ ދެކުނުގެ ޚާން ޔޫނިސްއަށާއި، ރަފަހަށެވެ.

ޚާން ޔޫނިސްގައި އާންމުން ދިރިއުޅޭ އިމާރާތަށް ރޭގައި ބޮންއަޅައި 13 މީހުން ޝަހީދު ކޮށްލާފައި ވެއެވެ. އޭގެ ތެރޭގައި ކުޑަކުދީންވެސް ހިމެނެއެވެ.

މި ޓެރަރިސްޓު ހަމަލާގައި އެތައްބަޔަކު ޒަޚަމްވިއެވެ.

ޚާން ޔޫނިސްގެ މެދުތެރޭގައި ހުންނަ ރަފަހް ގަރާޖަށް ބޮންއެޅުމުގެ ސަބަބުން 5 މީހުން ޝަހީދުވެ، އިތުރު އެތައްބަޔަކު ޒަޚަމްވިއެވެ.

ރަފަހްގެ އަލްމަވާސީ ސަރަހައްދުގައި ގެދޮރު ހަލާކުވެ މަގުމަތިވެފައިވާ މީހުން ތިބި ފޭލިގެއަކަށް ބޮންއެޅުމުގެ ސަބަބުން އެކަކު ޝަހީދުވެ، ހަތަރު މީހުން ޒަޚަމްވިއެވެ.

ޣައްޒާގެ މެދުތެރެއިން ނުސައިރަތު ރެފިއުޖީ ކޭމްޕަށްވެސް ޓެރަރިސްޓުން ވަރުގަދަ ވައިގެ ހަމަލާތަކެއް ދީފައި ވެއެވެ.

ޣައްޒާގެ އުތުރަށްވެސް އިސްތިއުމާރީ ޓެރަރިސްޓުން ވަރުގަދަ ވައިގެ ހަމަލާތަކެއް ދީފައިވާ ކަމަށާއި، އެތައްބަޔަކު ޝަހީދުވެފައިވާ ކަމަށްވެސް، ޣައްޒާއިން ލިބޭ ޚަބަރުތައް ބުނެއެވެ. ނަމަވެސް، ޝަހީދުވި މީހުންގެ އަދަދުތަކެއް އަދި ސާފުނުވާކަމަށް ބުނެއެވެ.