ދެ ދައުރުގެ ޚިދުމަތް – އަސާސީ ޙައްޤުތަކާއި ލާމަރުކަޒީ ކުރިއެރުން އިސްކުރިން: ރައީސް ޞާލިޙް

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް ވެރިކަން ކުރުމުގެ ފުރުސަތު ލިބުނު ދެ ދައުރުގައިވެސް އިސްކަންދިނީ ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދީ، ލާމަރުކަޒީ ނިޒާމު ބާރުވެރިކުރުވުމަށް ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިރޭ ކުރިއަށްދާ އެމްޑީޕީގެ 5 ވަނަ ކޮންގްރެސްގައި ވާހަކަފުޅު ދައްކަވަމުންނެވެ.

ކޮންގްރެސްގެ ބައިވެރިންނާ މުޚާޠަބު ކުރައްވަމުން ރައީސް ޞާލިޙް ވިދާޅުވީ، މިއަދު އެމްޑީޕީން އަމިއްލަ ނަފްސާ މެދު ވިސްނައި، ހެދުނު ގޯސްތަކުން ފިލާވަޅު ލިބިގަންނަން ޖެހޭ ކަމަށެވެ. އެގޮތުން ލީޑަޝިޕެއްގެ ޒިންމާއަކީ ހަމައެކަނި ކާމިޔާބީ ފާހަގަކުރުން ނޫން ކަމަށާއި، ގޯސްތައް ގަބޫލުކޮށް ކުރިއަށް ދިޔުން ކަމަށް ވިދާޅުވިއެވެ. އެމްޑީޕީގެ ވެރިކަމުގައި ކޮވިޑް-19 ފަދަ ދަތި އުނދަގޫ ހާލަތްތަކުގައިވެސް ރައްޔިތުންނަށް އިސްކަންދީ، ޞިއްޙަތާއި، ތަޢުލީމާއި، ބޯހިޔާވަހިކަމާއި، ދަތުރުފަތުރު އަދި ފެނާއި ނަރުދަމާގެ ޚިދުމަތް މުޅި ރާއްޖެއަށް ފުޅާކުރެވުނު ކަމަށް އެމަނިކުފާނު ފާހަގަކުރެއްވިއެވެ. ރަށްފުށުގެ ތަރައްޤީއަށް ކުރި މި ޚަރަދުތަކަށް ބައެއް ފަރާތްތަކުން ފާޑުކީ ނަމަވެސް، އެއީ އިންވެސްޓްމަންޓްތަކުގެ އަސްލު ބިންގާ ކަމުގައި ވިދާޅުވިއެވެ.

މިހާރުގެ ސިޔާސީ އަދި އިޤްތިޞާދީ ހާލަތަށް އަލިއަޅުއްވާލައްވަމުން ރައީސް ސާލިހް ވިދާޅުވީ، މިއަދު ޤައުމުގައި ޑިމޮކްރެޓިކް ހަމަތައް ގެއްލި، ރައްޔިތުންގެ މަޖިލީހަކީ ރައީސް އޮފީހުގެ ޑިޕާޓްމަންޓެއްގެ ގޮތުގައި ހަމައެކަނި "ތައްގަނޑު ޖަހާ" ތަނަކަށް ބަދަލުވެފައިވާ ކަމަށެވެ. އަދި ތަކެތީގެ އަގު އިންތިހާއަށް އުފުލި، މަސްވެރިންނާއި، ދަނޑުވެރިން އަދި ވިޔަފާރިވެރިން މާޔޫސްވެ، ޓޫރިޒަމް އިންޑަސްޓްރީއަށް ބޮޑެތި ގެއްލުންތައް ވަމުންދާ ކަމަށްވެސް ވިދާޅުވިއެވެ.

ޚާއްޞަކޮށް ރަސްމާލެ މަޝްރޫޢަށް ފާޑުވިދާޅުވަމުން، ފުށިދިއްގަރު ފަޅުން ގާތްގަނޑަކަށް 700 މިލިއަން ޑޮލަރު ޚަރަދުކޮށްގެން ހިއްކާ ބިމުގެ ތެރެއިން މާލޭގެ ދެބައިކުޅަ އެއްބައިވަރު (500 ހެކްޓަރު) ބޭރު ބަޔަކަށް ހިލޭ ދޭ ގޮތަށް އޮތް އޮތުމާމެދު ސުވާލު އުފެއްދެވިއެވެ. މިފަދަ ސިއްރު އެއްބަސްވުންތައް ހާމަކުރުމަށް ގޮވާލައްވަމުން، އީގަލް ހިލްސްއާ އެކު ވެފައިވާ އެއްބަސްވުން ހާމަކުރުމަށް އެމަނިކުފާނު ގޮވާލެއްވިއެވެ.

މީގެއިތުރުން، ކުރީ ސަރުކާރުން ފަޅުތައް ދޫކުރީ ހިލޭ ކަމަށް ބުނެ މި ސަރުކާރުން ދައްކާ ވާހަކަތައް ދޮގުކުރައްވަމުން ރައީސް ޞާލިޙް ވިދާޅުވީ، ޅ. ފޮއްތެފަޅު ދޫކުރުމުން ދައުލަތަށް 43 މިލިއަން ޑޮލަރު ލިބުމުގެ އިތުރުން އެތަނުގައި ޑޮމެސްޓިކް އެއާޕޯޓެއް އެޅުމަށް އެއްބަސްވެވުނު ކަމަށެވެ. އަދި ނ. އަތޮޅުން ވިއްކި ފަޅުންވެސް އެޑްވާންސްގެ ގޮތުގައި 27 މިލިއަން ޑޮލަރު ދައުލަތަށް ލިބުނު ކަމަށާއި، ނަމަވެސް މި ސަރުކާރުން އެ ޕްރޮޖެކްޓްތައް އެސްއީޒެޑްގެ ދަށަށް ބަދަލުކޮށް ޓޫރިޒަމް ގާނޫނުން ލިބެންޖެހޭ ޓެކުހާއި އާމްދަނީ ދައުލަތަށް ގެއްލުވާލަމުންދާ ކަމަށް ވިދާޅުވެ އެމަނިކުފާނު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.