މޮރޮކޯގެ އައް ބޮޑުވަޒިރަށް ރައީސް ތަހުނިޔާ ވިދާޅުވެއްޖެ

މޮރޮކޯގެ 18 ވަނަ ބޮޑުވަޒީރުގެ މަގާމަށް ފާތިމާ އިއްޒަހުރާ އަލް މަންސޫރީ އައްޔަނު ކުރެއްވުމާ ގުޅިގެން، އެކަމުގެ ތަހުނިޔާ ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮނުއްވައިފިއެވެ.

ބޮޑުވަޒީރު ފާތިމާ އިއްޒަހުރާއަށް ރައީސުލްޖުމްހޫރިއްޔާ ފޮނުއްވި ސިޓީފުޅުގައި، އެކަމަނާއަކީ މޮރޮކޯގެ ފުރަތަމަ އަންހެން ބޮޑުވަޒީރުކަން ފާހަގަކުރައްވައި، މިއީ އެ ގައުމަށާއި މުޅި އަރަބި ދުނިޔެއަށް ލިބުނު ތާރީޚީ ކުރިއެރުމެއްގެ ގޮތުގައި ސިފަކުރެއްވިއެވެ.

އެކަމަނާއަކީ އަރަބި ދުނިޔޭގައި ބޮޑުވަޒީރުކަމުގެ މަގާމު ފުރުއްވާ ދެވަނަ އަންހެން ބޭފުޅާކަން ފާހަގަކުރައްވައި، މިއީ އެ ސަރަހައްދުގެ ސިޔާސީ ތާރީޚުގައި ހުޅުވިގެންދިޔަ އައު ބާބެއް ކަމަށް ވިދާޅުވިއެވެ.

މީގެއިތުރުން، މިއީ އަންހެނުންގެ ލީޑަރޝިޕް ދައްކުވައިދޭ މުހިންމު މިސާލެއް ކަމަށާއި، މިއީ ހުރިހާ ތަނެއްގައި ތިބި އަންހެނުންނަށް ލިބުނު ހިތްވަރެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އަދި އަންހެނުންގެ ހައްގުތައް ކުރިއެރުވުމަށާއި، އިޖުތިމާއީ އަދި ސިޔާސީ ކަންކަމުގައި އަންހެނުންގެ ބައިވެރިވުން އިތުރުކުރުމަށް ދިވެހިރާއްޖެއިން އަބަދުވެސް ދޭ އަހައްމިއްޔަތުކަން އެމަނިކުފާނު ތަކުރާރު ކުރެއްވިއެވެ.

ދިވެހިރާއްޖެއާއި މޮރޮކޯއާ ދެމެދު އޮތް ޒަމާންވީ އެކުވެރި ގުޅުމުގެ މައްޗަށް އަލިއަޅުއްވާލައްވަމުން، ދެ ގައުމުގެ ދެމެދުގައި އޮތް އިހުތިރާމާއި އެއްބާރުލުން އިތުރަށް ހަރުދަނާކޮށް، ދެ ގައުމުގެ ލާބައާއި މަންފާއަށްޓަކައި ބޮޑުވަޒީރާއެކު ގާތުން މަސައްކަތް ކުރެއްވުމަށް ބޭނުންފުޅުވާކަން ރައީސުލްޖުމްހޫރިއްޔާ ހާމަކުރެއްވިއެވެ.

ރައީސުލްޖުމްހޫރިއްޔާގެ ސިޓީފުޅު ނިންމަވާލައްވާފައިވަނީ، ބޮޑުވަޒީރުގެ އައު މަސްއޫލިއްޔަތު އަދާކުރެއްވުމުގައްޔާއި، މޮރޮކޯގެ ރައްޔިތުންނަށް އިތުރު ފާގަތިކަމާއި ކުރިއެރުން ހޯއްދަވައިދެއްވުމަށް ކުރައްވާ މަސައްކަތްޕުޅުގައި ކާމިޔާބީއަށް އެދިވަޑައިގަންނަވަމުންނެވެ.