ގާނޫނީ ދާއިރާއިން ގުޅުން ބަދަހިކުރުމަށް ރަޝިޔާއާއެކު އެއްބަސްވުމެއް ގާއިމުކޮށްފި

ދިވެހިރާއްޖެއާއި ރަޝިއާއާ ދެމެދު ގާނޫނީ ދާއިރާއިން ގުޅުން ބަދަހިކުރުމުގެ މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރައްވާފައިވަނީ ޕްރޮސިކިއުޓަރ ޖެނެރަލް އަލްއުސްތާޛު ޢައްބާސް ޝަރީފާއި އެ އޮފީހުގެ ވަފުދެއް، ރަޝިއާގެ ކަޒާންގައި މިހާރު ކުރިއަށްދާ ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ގެ މެމްބަރު ގައުމުތަކުގެ ޕްރޮސިކިއުޓަރ ޖެނެރަލުންގެ 24 ވަނަ ބައްދަލުވުމުގައި ބައިވެރިވެވަޑައިގަތުމަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

މި ބައްދަލުވުމުގެ ހަވާސާގައި ޕްރޮސިކިއުޓަރ ޖެނެރަލް ޢައްބާސް ޝަރީފް ވަނީ ރަޝިއާގެ ޕްރޮސިކިއުޓަރ ޖެނެރަލް އެލެގްޒެންޑަރ ގުޓްސާންއާ ބައްދަލުކުރައްވައި ރަސްމީ މަޝްވަރާތައް ކުރިއަށް ގެންދަވާފައެވެ.

މި މަޝްވަރާތަކަށްފަހު، ދެ ޤައުމުގެ ޕްރޮސިކިއުޓަރ ޖެނެރަލްގެ އޮފީހުގެ މެދުގައި ގުޅުން ބަދަހިކޮށް އެއްބާރުލުން އިތުރުކުރުމުގެ އެއްބަސްވުމުގައި ވަނީ ސޮއިކުރައްވާފައެވެ.

މި އެއްބަސްވުމުގެ މައިގަނޑު މަޤްޞަދަކީ ދެ އޮފީހުގެ ދެމެދުގައި ފަންނީ ދިރާސާތައް ކުރުމާއި، މުވައްޒަފުންނަށް ބޭނުންވާ ތަމްރީނު ފުރުޞަތުތައް ފަހިކޮށްދިނުމުގެ އިތުރުން، މަސައްކަތުގެ ތަޖުރިބާއާއި އިލްމު ހިއްސާކުރުމުގެ ހަރުދަނާ އޮނިގަނޑެއް އެކުލަވާލުމެވެ.

މީގެއިތުރުން، ދެފަރާތުން އެއްބަސްވާ އެކި ދާއިރާތަކުން ފަންނީ އެހީތެރިކަން ފޯރުކޮށްދީ، ގުޅިގެން މަސައްކަތް ކުރުމަށްވެސް މި އެއްބަސްވުމުގައި ހިމަނާފައިވެއެވެ.