އޮގަސްޓް މަހު ބާޒާރުގެ އަގުތައް 1.15 އިންސައްތަ ދަށަށް ހިނގައްޖެ

ކަރަންޓާއި ވައިގެ ދަތުރުފަތުރުގެ އަގުތައް ހެޔޮވުމާ ގުޅިގެން، ޖުލައި މަހާ އަޅާބަލާއިރު މިދިޔަ އޮގަސްޓް މަހު ރާއްޖޭގެ ކޮންސިއުމަރ ޕްރައިސް އިންޑެކްސް (ސީޕީއައި) %1.15 ދަށަށް ގޮސްފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) ގެ ހިސާބުތަކުން ދައްކައިފިއެވެ.

ބާޒާރުގައި މުދަލާއި ހިދުމަތުގެ އަގުތަކަށް އައި ބަދަލުތަކަށް ބަލާއިރު، އޮގަސްޓް މަހު ކަރަންޓުގެ ހަރަދުން 3.21 އިންސައްތަ އަދި ވައިގެ ދަތުރުފަތުރުގެ އަގުތަކުން 2.80 އިންސައްތަ ވަނީ ހެޔޮވެފައެވެ.

މީގެ އިތުރުން ދުންފަތުގެ ބާވަތްތަކުގެ އަގު 25.45 އިންސައްތަ ވަނީ ދަށްވެފައެވެ.

އޮގަސްޓް މަހުގެ އިންޑެކްސް ދަށަށް ދިޔުމުގެ މައިގަނޑު ސަބަބަކީ މި ދާއިރާތަކުގެ އަގުތަކަށް އައި މި ބަދަލެވެ.

ޖުމްލަ އިންޑެކްސް ދަށަށް ދިޔަ ނަމަވެސް، ބައެއް ކާބޯތަކެއްޗާއި ހިދުމަތްތަކުގެ އަގު ހުސްވު މަހުގައި ވަނީ އުފުލިފައެވެ.

ކިރާއި ކިރުގެ ބާވަތްތަކުގެ އިތުރުން ބިހުގެ އަގު %1.99 އުފުލިފައިވާއިރު، މޭވާއާއި ތަރުކާރީގެ އަގު 1.19 އިންސައްތަ އަދި މަހުގެ ބާވަތްތަކުގެ އަގު ވަނީ 0.83 އިންސައްތަ މައްޗަށް ގޮސްފައެވެ.

ހިދުމަތްތަކުގެ އަގުތަކަށް ބަލާއިރު، ގެސްޓްހައުސްތަކުގެ އަގު 2.72 އިންސައްތަ މުވާސަލާތީ ހިދުމަތް 2.23 އިންސައްތަ ސިއްހީ ހިދުމަތުން 0.99 ޕަސެންޓް އަދި ކެފޭ އާއި ރެސްޓޯރެންޓާއި ހޮޓާތަކުގެ ހިދުމަތުގެ އަގު ވަނީ 0.68 އިންސައްތަ އުފުލިފައެވެ.

ސަރަޙައްދީ ފެންވަރުގައި ބަލާއިރު، މާލެއާއި އަތޮޅުތެރޭގައި ވެސް ސީޕީއައި ވަނީ ދަށަށް ގޮސްފައެވެ.

ޖުލައި މަހާ އަޅާބަލާއިރު މާލޭގެ އަގުތައް 1.57 އިންސައްތަ ދަށަށް ދިޔައިރު، އަތޮޅުތެރޭގެ އަގުތައް ވަނީ 0.54 އިންސައްތަ ދަށަށް ގޮސްފައެވެ.