ދިވެހީންގެ ރާއްޖެއަށް އަލުން އެނބުރި ދިޔުމުގެ ޚާއްޞަ ދަތުރަށް ފަށާފައިވަނީ މީގެ 365 ދުވަސްކުރިން 17 ނޮވެމްބަރ 2023 ވަނަ ދުވަހެއެވެ. ރައްޔިތުންނަށް އެ މީހުންގެ އުންމީދުތައް ހާސިލުވެ، ކަންބޮޑުވުންތަކަށް ހައްލުލިބޭނެ ކަމުގެ ވިންދުތައް ހިތްތަކުގައި ޖަހަންފެށިއެވެ. 17 ނޮވެމްބަރ 2023 ވީ ހުކުރުދުވަސް އަލިވިލުނީ އާ އުއްމީދާއި، ކުރިއެރުމާއި،ޖޯޝް ދިވެހީންގެ ހިތްތަކަށް ގެނުވަމުންނެވެ. ކޮންމެ ފަސް އަހަރަކުން ބައްދަލުކުރާ މި ދުވަސްވެފައި އޮންނަނީ ދިވެހި ރައްޔިތުންނަށް އަބަދުވެސް އާ އުއްމީދުތަކެއް ގެނުވާ ދުވަހެއްގެ ގޮތުގައެވެ. މާޔޫސްވެފައިވާ ހިތްތަކަށް އުފާވެރިކަމާއި، އާރޯކަން ގެނުވާ ދުވަހެއްގެ ގޮތުގައެވެ. ސަބަބަކީ މިއީ ފަސް އަހަރުގެ ވެރިކަމެއް ނިމި، އެއިރަކު ރައްޔިތުން ވެރިކަމަށް އިންތިޚާބު ކުރާ ފަރާތުން، ވެރިކަމުގެ ހުވައި ކުރައްވައި، ޤައުމާއި މުޚާތަބް ކުރައްވާ ދުވަސް ކަމަށްވާތީއެވެ.
ދެވަނަ ޖުމްހޫރިއްޔާގެ 7 ވަނަ ރައީސް، މިހާރުގެ ރައީސުލް ޖުމްހޫރިއްޔާގެ ޑރ މުހައްމަދު މުއިއްޒު ވެރިކަމުގެ ހުވާކުރެއްވީ 17 ނޮވެމްބަރ 2023 ވަނަ ދުވަހުއެވެ. ހުވައިކުރެއްވުމަށްފަހު، ޤައުމާއި މުޚާތަބްކުރައްވާ އެ މަނިކުފާނު ދެއްކެވި ވާހަކަފުޅު ވެގެންދިޔައީ އުއްމީދުތައް ގެއްލިފައި ތިބި އެތައް ދިވެހި ރައްޔިތުންނަށް އުއްމީދާއި އާރޯކަން ގެނުވައިދިން ވާހަކަފުޅަކަށެވެ. ޤައުމީ ރޫހާއި ވަތަނީ ޖޯޝް ގެއްލިފައި ތިބި ހިތްތަކުގައި އަލުން އެ ވިންދު ޖަހަންފެށި ދުވަހަށެވެ.
ޤައުމާއި މުޚާތަބްކުރައްވާ އެންމެ ފުރަތަމަ ދެއްކެވި ވާހަކަފުޅު ފައްޓަވަމުން ރައީސް ވިދާޅުވީ ދައުލަތެއްގެ ސަލާމަތާއި ދުނިޔޭގައި އެ ބައެއްގެ އާރާއި ބާރާއި، ޤަދަރާއި އިޙްތިރާމު ނެގެހެއްޓުމަށްޓަކައި މައިގަނޑު ދެ ބާވަތެއްގެ ބިނާކުރުމެއް ބިނާކުރާ ކަމަށެވެ. އެއީ، ޢުމްރާނީ ބިނާކުރުމާއި އިންސާނީ ބިނާކުރުން ކަމަށެވެ.
"އެހެން ޢިބާރާތަކުން ދަންނަވާނަމަ، ގެދޮރާއި، ދިފާޢީ ބުރުޒުތަކާއި، މަގުތަކާއި، ފާލަންތަކާއި، އޮފީސްތައް ބިނާކުރުމާއި، ހެޔޮވިސްނުން ހުރި ސިކުނޑިތަކެއް ލިބިފައިވާ، އަޚްލާޤު ރަނގަޅު މުޖުތަމަޢެއް ބިނާކުރުމެވެ. ރައީސް ވިދާޅުވީ އެއީ ޤައުމުގެ ފަސްގަނޑު ބިނާކުރުމާއި، ޤައުމުގެ ސިކުނޑިތައް ބިނާކުރުން. މި ފެށުނު ރިޔާސީ ދައުރުގެ ސިޔާސަތަކަށް ވާނީ، އެ ދެ ބާވަތުގެ ބިނާކުރުން ވަޒަން ހަމަކޮށް ކުރިއަށް ގެންދިޔުން. ޢިލްމާއި ހުނަރާއި، އަޚްލާޤާއި ދީނާއި، އުޅުންތެރިކަމާއި މަސައްކަތްތެރިކަމެވެ. މިކަންކަން ދިވެހި ދަރީންގެ ކިބައިގައި އަށަގެންނެވުން. ހަމައެހެންމެ، ރާއްޖޭގެ ބިނާވެށްޓަށް އާދަޔާ ޚިލާފު އިންޤިލާބީ މުއްސަނދިކަމެއް ގެނެސްދިނުން. އަޅުގަނޑު އެކުލަވައިލާ ސަރުކާރު ކުރިއަށްދާނީ، އިރާދަކުރެއްވިއްޔާ މި ދެ އަސާސުގެ މަތީގައި" ރައީސް ވިދާޅުވިއެވެ.
އެއާއެކު ޤައުމުގެ ހުންގާނުގައި ހިފަހައްޓަވާ ހަލުވިކަމާއި މަސައްކަތް ފެއްޓެވިއެވެ. ފަތިސްނަމާދުން ދުވަހުގެ މަސައްކަތް ފައްޓަވާ ވެރިއެއްގެ ގޮތުގައި ރައީސް ޑރ މުއިއްޒު ފާހަގަވާއިރު، އެމަނިކުފާނު ޤައުމުގެ ރިޔާސަތާއި ހަވާލުވެވަޑައިގެންނެވިއިރު، ޤައުމު އޮތީ ނާޒުކު ހާލަތެއްގައެވެ. އެއީ ޚުޠޫރަތްތެރި ދަނޑިވަޅެކެވެ. ދިވެހިރާއްޖޭގެ އިޤުތިޞާދު އޮތީ ފުން އަނދަވަޅަކަށް ވެއްޓިފައެވެ. ދިވެހި ދައުލަތުގެ ދަރަނި އޮތީ ޖުމްލަ 119 ބިލިއަން ރުފިޔާއަށް އަރާފައެވެ. މިއީ ރާއްޖޭގެ މުޅި މާލީ ޙަޔާތުގައިވެސް ދިވެހި ތާރީޚު ދުށް އެންމެ ބޮޑު ދަރަނ ޏެވެ. އެހެންކަމުން ފެނިގެންދިޔައީ އެކަމުން އަރައިގަތުމަށްޓަކައި ހަރުދަނާ، ހަލުވި ފިޔަވަޅުތަކެއް އަޅުއްވަން ފެއްޓެވި ތަނެއެވެ. ގައުމު ވެއްޓެމުންދިޔަ ފުން އަނދަވަޅު ނަގައި ކޮޅަށް ޖެއްސެވުމުގެ މަސައްކަތް ފެއްޓެވިތަނެވެ. ރާއްޖޭގެ އިގްތިސާދުން ފައިސާ ބޭރުވަމުންދާ މަގުތައް ހޯދައި، އެ މަގުތައް ބަންދުކުރުމުގެ ބުރަ މަސައްކަތް ފެއްޓެވި ތަނެވެ.
ރާއްޖޭގެ އިގްތިސާދުގެ ބޮޑު ބައި ހިއްސާކުރަނީ ފަތުރުވެރިކަމެވެ. ފަތުރުވެރިކަމުން ލިބެންޖެހޭ މިންވަރާ ގާތަށްވެސް ރާއްޖެއަށް ޑޮލަރު ނުލިބ އެވެ. ޑޮލަރުގެ މައްސަލައަށް ހައްލެއް ހޯދައިދިނުމަށް ނިމިދިޔަ ހުރިހާ ސަރުކާރަކުން ރައްޔިތުން އެދެއެވެ. ކޮންމެ ސަރުކާރަކުންވެސް ވެރިކަމަށް އައުމުގެކުރިން މި ވައުދު ފުއްދަދޭނެ ކަމުގެ ފޮނި ހުވަފެން ރައްޔިތުންނަށް ދައްކައެވެ. ނަމަވެސް ވެރިކަން ލިބުމަށްފަހު، އެއިރަކު އޮންނަ ސަރުކާރު އޮންނަނީ މަދު ވިޔަފާރިވެރިއެއްގެ ނުފޫޒުގައި ޖެހި ތާށިވެފައެވެ. ފަސް އަހަރު ނިމޭއިރުވެސް އޮންނަނީ އެ ނުފޫޒާއި ވަކިތަކުގެ ތެރޭގައެވެ. ނަމަވެސް ރައީސް ޑރ މުއިއްޒުގެ ވެރިކަމުގެ އެންމެ ފުރަތަމަ ދުވަހުގެ ފެއްޓެވި މަސައްކަތަކީ އިގްތިސާދުގައި ޑޮލަރު ހިފަހައްޓައި މިހާރު އުފެދިފައި އޮތް ޑޮލަރުގެ ކަޅު ބާޒާރު ނައްތާލުމުގެ އުނދަގޫ މަސައްކަތެވެ. ފަތުރުވެރިކަމުގެ ވިޔަފާރިތަކަށް އާމްދަނީގެ ގޮތުގައި ލިބޭ ޑޮލަރު ރާއްޖޭގެ ބޭންކުތަކަށް މާރުކުރަން ޖެހޭގޮތަށް، އަދި ކޮންމެ ފަތުރުވެރިއެއްގެ ބޮލަށް 500 ޑޮލަރު ރާއްޖޭގެ ބޭންކުތަކަށް މާރުކުރަން ޖެހޭގޮތަށް ގަވާއިދު އެކުލަވާލާފައިވާއިރު އެއީ ރާއްޖޭގެ ބޭންކިންގެ ނިޒާމަށް ވަންނަ ބޭރު ފައިސާގެ މިންވަރު އިތުރުކުރެވޭނެ މަގެކެވެ.
ފަތުރުވެރިކަމަށް ބޭރު ފައިސާއިން ލިބޭ އާމްދަނީން އަހަރަކު ޖުމްލަ 750 މިލިއަން ޑޮލަރާ ހަމައަށް ރާއްޖޭގެ ބޭންކުތަކުން މާރުކުރަން ޖެހޭގޮތަށް މަރުކަޒީ ބޭންކު، އެމްއެމްއޭގެ ބޭރު ފައިސާއާ ބެހޭ ގަވައިދަށް ބަދަލު ގެނެސް އަމަލުކުރަން ފަށާފައިވަނީ 1 އޮކްޓޯބަރ 2024 ގައެވެ. ރިސޯޓުތަކުން ކޮންމެ އަހަރަކުވެސް ވަކި އަދަދަކުން ރާއްޖޭގެ ބޭންކުތަކަށް ޑޮލަރު މާރުކުރުން ލާޒިމުކޮށް އެ ގޮތަށް އަމަލުކުރަން ކަނޑައެޅި މިއީ ފުރަތަމަ ފަހަރެއެވެ. މިއީ ވެރިކަމުގެ އާރާއި ބާރުގެ ދަހިވެތިކަމުގައި މިހާތަނަށް އެއްވެސް ވެރިއަކަށް ކުރަން ކެރިވަޑައިގެންނެވި ކަމެއް ނޫނެވެ. ނަމަވެސް ޤައުމުގެ ހައްގުގައި އެ ނިންމުން ނިންމަވަން ކެރިވަޑައިގެންނެވި ރައީސަކީވެސް އަދުގެ ރައީސުލް ޖުމްހޫރިއްޔާ ޑރ މުހައްމަދު މުއިއްޒެވެ. ފަތުރުވެރިކަމުގެ ސިނާއަތުން އަހަރަކު 6 ބިލިއަން ޑޮލަރުގެ އާމްދަނީ ހޯދުމަކީ މި ސަރުކާރުގެ އަމާޒެކެވެ. އެ ސިނާއަތުގެ ފައިދާ ރައްޔިތުންގެ ޖީބުތަކަށް އިހުސާސްކޮށްދިނުމުގެ ފޮނި ވައުދާއެކު އައި މި ސަރުކާރުން ވަނީ އެ ސިނާއަތުން ނަގާ ޓެކްސްވެސް ބޮޑުކޮށްފައެވެ. އެއާޕޯޓުން ނަގާ ޓެކުހާއި، ގްރީން ޓެކްސް އަދި ޓީޖީއެސްޓީ ބޮޑުކުރުމާއެކު ރާއްޖެއަށް ލިބޭ އާމްދަނީ އިތުރުވެގެންދާނެ ކަމަށް ސަރުކާރުން ލަފާކުރެއެވެ.
ރައީސްގެ އަމާޒަކީ 6 ބިލިއަން ޑޮލަރުގައި މިހާރު އޮތް ރާއްޖޭގެ ޖީޑީޕީ 2028 ގެ ނިޔަލަށް 10 ބިލިއަން ރުފިޔާއަށް އިތުރުކުރުމެވެ. އެހެންނަމަވެސް ވެރިކަމާ ހަވާލުވެވަޑައިގެންނެވިއިރު ކުރިމަތީގައި އޮތީ ދަތިއުނދަގޫ ދުވަސްތަކެއްކަން އެމަނިކުފާނަށް އެނގިވަޑައިގަންނަވައެވެ. ކުރީ ސަރުކާރުން އެމަނިކުފާނުގެ ސަރުކާރަށް ވާރުތަވީ 120 ބިލިއަނުން ދަރުވާލާފައިވާ އޮތް އިގްތިސާދެކެވެ. މިދިޔަ 5 އަހަރު ނިންމާލީ 8 ބިލިއަން ރުފިޔާ ޗާޕުކުރުމަށްފަހުއެވެ. ރައީސް ތަކުރާރުކޮށް ވިދާޅުވަމުން ގެންދެވީ އިގްތިސާދު އަލުން ކޮޅަށް ޖައްސަވާނެ ކަމާއި، ފައިސާ ޗާޕް ނުކުރައްވާނެ ކަމަށެވެ. އެ ވައުދާއެކު 365 ދުވަސް ނިންމަވާލެއްވީ، އެ ވައުދު ދަމަހައްޓަވައި ފާއިސާ ޗާޕްނުކޮށެވެ.
ދައުލަތަށް ނުލިބި ހުރި ފައިސާ ހޯދުމުގެ ވައުދުވެސް އެމަނިކުފާނު ވެވަޑައިގެންނެވިއެވެ. މިދިޔަ މަހުގެ 11 ގެ ނިޔަލަށް ސަރުކާރުން މިވަނީ ދައުލަތަށް ނުލިބި ހުރި ފައިސާގެ ތެރެއިން 3.7 ބިލިއަން ރުފިޔާ ހޯއްދަވާފައެވެ. މި މަސައްކަތުގެ ނަތީޖާއަކީ ރައީސް ވިދާޅުވި ގޮތުގައި ދައުލަތުގެ ހަރަދުތައް ފުއްދަން ނަގަންޖެހޭ ދަރަނި މަދުވުމެވެ. ޒަމާންތަކެއް ވަންދެން ފަރުވާކުޑަކޮށްލާފައި އޮތް، އެ މަސައްކަތްތައް އެމަނިކުފާނު މި ގެންދަވަނީ ބާރު ސްޕީޑުގައި ކުރިއަށް ގެންދަވަމުން ނެވެ.
17 ނޮވެމްބަރ 2023 ގައި ރައީސް ދެއްވި ފުރަތަމަ ތަގްރީރްގައި ޒުވާނުންނާއި މުކާތަބް ކުރައްވާ ވިދާޅުވީ ތިޔައީ، ޤައުމު ހިންގުމުގެ އިންޖީނު ކަމަށާއި، ޤައުމު ދެމިއޮތުމުގެ ހަކަތަ ކަމަށެވެ. މާދަމާ ޤައުމުގެ ހުންގާނުގައި ހިފަން ތިބި ޒުވާނުންނަކީ ސަލާމަތް ސިއްހަތެއްގައި ތިބި ބަޔަކަށް ހެދުމަކީ ވެރިކަމުގައި ތިއްބަވާ ފަރާތްތަކުން ކުރަންޖެހޭނެ، އެ ފަރާތަށް ލާޒިމް ކަމެކެއެވެ. ރައީސްގެ 365 ދުވަސްތެރޭގައި މިވަނީ، ވޭޕްގެ ޝިކާރަޔަށްވެ ނެތެމުން އައި ޒުވާން ޖީލެއް އަނބުރާ ގެނައުމުގެ މުހިއްމު މަސައްކަތްޕުޅު ފައްޓަވާފައެވެ. ދުނިޔޭގެ ސިއްހަތު ޖަމްއިއްޔާއިން ބުނެފައިވާ ގޮތުގައި ދުންފަތުގެ އިސްތިއުމާލުކުރުމުގެ ހުރިހާ ވައްތަރަކީ ވެސް ގެއްލުންހުރި އަދި ގައިންގަޔަށް ނާރާ ބަލިތަކުގެ ތެރޭގައި ކެންސަރާއި ހިތުގެ ބަލިތަކާއި ފުއްޕާމޭގެ ދާއިމީ ބަލިތަކާއި ހަކުރު ބަލީގެ ނުރައްކާ ބޮޑު ކަމެއް ކަމަށެވެ. ޒުވާނުން ޖީލު މި ވަބާއިން ސަލާމަތް ކުރުމަށްޓަކައި، ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުންކުރުން މަނާކުރުމަށް، ސަރުކާރުން މަޖިލީހަށް ހުށަހަޅައިގެން، ދުންފަތް ކޮންޓްރޯލް ކުރުމާބެހޭ ގާނޫނަށް ގެނައި އިސްލާހު، ރައީސް ޑރ. މުޙައްމަދު މުއިއްޒު ތަސްދީގުކުރައްވާފައިވަނީ 14 ނޮވެމްބަރ 2024 ގައެވެ. މިހާރު ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުން ކުރުމަކީ މަނާކަމެކެއެވެ. މިއީ ތައުރީފް ހައްގު ނިންމުމެކެއެވެ. އެތައް މައެއްގެ މޫނަށް ހިނިތުންވުން ގެނުވި ކަމެކެއެވެ. ދިވެހި ހުރިހާ ރައްޔިތުންގެ ތައުރީފް އޮހިގެންދިޔަ ކަމެކެއެވެ.
ދިވެހިރާއްޖެއަކީ ސައްތައިން ސައްތަ އިސްލާމީ ޤައުމެކެއެވެ. ދިވެހިން އަބަދުވެސް އެދެނީ ރާއްޖޭގެ ވެރިކަމަށް އެ ރައްޔިތުން އިސްކުރާ ވެރިއަކީ އިސްލާމްދީނާއި، ވަތަންގެ ދިފާއުގައި މަސައްކަތް ކުރައްވާ ވެރިއަކަށް ވުމެވެ. ރައީސް ޑރ މުއިއްޒުގެ ފުރަތަމަ ތަޤްރީރުން އެމަނިކުފާނުގެ ހިތްޕުޅުގައި މި ވަތަނަށް އޮތް ލޯތްބާއި ކުލުނު ހާމަވެގެން ދިޔައެވެ. އެ ދުވަހު ރައީސް ވިދާޅުވީ މާތްވެގެންވާ އިސްލާމްދީނާއި، ދިވެހި ޤައުމާއި، ފަސްގަނޑު ދިފާޢުކުރައްވާނެ ކަމަށާއި، ޣައްދާރު ނުވާނެ ކަމަށެވެ. މި ވައުދާއެކު އިސްލާމްދީނާއި، މި ވަތަންގެ ހައްގުގައި އެ މަނިކުފާނު 365 ދުވަހު ކުރެއްވީ ބުރަ އަދި އެހާމެ އުނދަގޫ މަސައްކަތެކެއެވެ. ރާއްޖޭގައި ތިބި އިންޑިއާ ސިފައިން ފޮނުވާލުމުގެ މަސައްކަތް ފެއްޓެވިއެވެ. ރައީސް އިއުލާން ކުރެއްވި 100 ދުވަހުގެ ޕްލޭންގައި ވެސް އިންޑިއާ ސިފައިން ފޮނުވާލުން ހިމެނޭއިރު، އެ ސިފައިން ވަނީ އެ މުއްދަތުގައި ފޮނުވާލާފައެވެ. އެމީހުންގެ ބަދަލުގައި ބަލިމީހުން އުފުލާ ހެލިކޮޕްޓަރުތައް އޮޕަރޭޓު ކުރާނެ އިންޑިއާގެ ސިވިލިއަނުން ނުވަތަ އާންމުން ވަނީ ގެނެސްފައެވެ. 4 މާރޗްގައި 2024 ގައި ބ އޭދަފުށީ ރައްޔިތުންނާއި މުޚާތަބްކުރައްވާ ދެއްކެވި ވާހަކަފުޅުގައި ރައީސް ވަނީ، މިޤައުމުގައި މިހާރު ޔުނީފޯމުގައި އަދި ކުލަ ހެދުމުގައިވެސް، އެއްވެސް ކަހަލަ ހެދުމެއްގައި އިންޑިއާ ސިފައިން ނުތިބޭނެ ކަމުގެ ޔަޤީންކަން ދެއްވާފައެވެ. އެ މަނިކުފާނުގެ މި ނިންމެވުމަށް މި ދިވެހި ފަސްގަނޑުގެ އަމަންއަމާން ކަމާއި، ސުލްހަ މަސަލަސް ކަމާއި، އިސްލާމްދީނަށް ލޯބިކުރާ އެތައް ދިވެހި ރައްޔިތެއްގެ ކުލުނާއި ލޯބި އޮހިގެންދިޔައެވެ.
ދިވެހީންނަކީ މިނިވަންކަމުގެ ދަރީން ކަމަށާއި، ދޫނި އޭގެ ހާލި ބަލަހައްޓާ ފަދައިން، ދިވެހީން މި އަންނަނީ މި ލޮބުވެތި ދިވެހި ފަސްގަނޑު މިނިވަންކަންމަތީ، އެތައް ޒަމާނަކަށް ބަލަހައްޓަމުން ކަމަށް ރައްޔިތުންނާއި މުޚާތަބް ކުރައްވަމުން އެމަނިކުފާނު ދެއްވި ފުރަތަމަ ތަގްރީރްގައި ވަނީ ވިދާޅުވެފައެވެ. ރައީސް ވިދާޅުވީ އެއީ، ދިވެހި ރައްޔިތުން އެދޭގޮތް ކަމަށާއި، ދިވެހީންގެ ނަފުސާއި ފުރާނައިގެ ނިންމުން ކަމަށެވެ.
މި މަގުން ހިންގަވައި މިސަރުކާރަށް 365 ދުވަސްވެގެން ދިޔައިރު، ދިވެހިންނަކީ މިނިވަންކަމުގެ ދަރިންނަށް ވަނީ ހައްދަވައިދެއްވާފައެވެ. ދިވެހިރާއްޖޭގެ ކަނޑުގެ ސަރަހައްދު 24 ގަނޑިއިރު ފަޚުރުވެރިކަމާ އެކު މިހާރު ބަލަހައްޓަމުން އަންނަނީ މި ފަސްގަނޑަށް އުފަން ދިވެހި ދަރިންނެވެ. އަޅުގަނޑުމެންގެ ފަޚުރުކަމުގައިވާ ދިވެހި ސިފައިންނެވެ. މިއީ މިހާތަނަށް އެއްވެސް ވެރިއަކު މި ފަސްގަނޑުގެ ދިފާއުގައި ކުރެއްވި މަސައްކަތެއް ނޫނެއެވެ. އަބަދުވެސް މިކަމުގައި ދިވެހިން އައީ އަވަށްޓެރިންނަށް ބަރޯސާވަމުންނެވެ. ދުނިޔޭގެ ޑްރޯން ޓެކްނޮލޮޖީގެ އެންމެ އެޑްވާންސް ޑްރޯންތައް ކަމަށްވާ ބައިރެކްތާރު ޓީބީ2 މޮޑެލްގެ ޑްރޯންތަކުން، 15 މާރޗް 2024 އިން ފެށިގެން ދިވެހި ސިފައިން އަންނަނީ ރާއްޖޭގެ ކަނޑު ސަރަހައްދު 24 ގަނޑިއިރު ބަލަހައްޓަމުންނެވެ. މިއީ އެންމެ ޒަމާނީ އަސްކަރީ އަދި މުއާސަލާތީ އާލާތްތަކާއެކު އުފައްދާފައިވާ ޑްރޯންތަކެވެ. މި ޑްރޯންތަކަކީ 27 ގަޑިއިރަށް ވުރެ ގިނައިރު 25،000 ފޫޓަށް ވުރެ މަތިން ދަތުރު ކުރުމުގެ ގާބިލްކަން ލިބިފައިވާ ޑްރޯންތަކެވެ. 70 އާއި 120 ނޯޓުގެ ސްޕީޑްގައި ދުއްވުމުގެ ގާބިލްކަން ލިބިފައިވާ މި ޑްރޯންތަކަކީ ދުނިޔޭގެ ގިނަ ގައުމުތަކުގައިވެސް ބޭނުން ކުރަމުން އަންނަ ވައްތަރެކެވެ. މި ޑްރޯންގައި ލޭޒާ ގައިޑަޑް މިސައިލް ހަރު ކުރުމުގެ ގާބިލްކަންވެސް ލިބިފައި ވެއެވެ.
މި ދިވެހި ފަސްގަނޑުގެ ހައްޤުގައި ޝަހީދުވި ޝަހީދުންގެ އާއިލާތަކަށް ޤައުމުގެ ފެންވަރުގައި މާ ބޮޑު އެހީތެރިކަމަކާއި އަޅާލުމެއް މީގެކުރިން ފޯރުކޮށްދެވިފައެއް ނެތެއެވެ. އެ ޝަހީދުގެ އާއިލާތަކަށް ކޮންމެވެސް މިންވަރެއްގެ އެހީއެއް މީގެކުރިން ފޯރުކޮށްދިން ނަމަވެސް އެ އެހީވެސް ވަނީ ފަހަކަށްއައިސް ހުއްޓިފައެވެ. އެ ޝަހީދުން ވީ ގުރުބާނީގެ އަގު، އެ ދަރަޖައިގައި ކުރެވިފައެއް ނެތެއެވެ. ނަމަވެސް ރައީސް ޑރ މުހައްމަދު މުއިއްޒުގެ ވެރިކަމުގައި އައި ފުރަތަމަ ނަސްރުގެ ދުވަސް ވެގެންދިޔައީ، އެ ޝަހީދުގެ ޒިކުރާ އާކުރެވި އެ ފަރާތްތަކުގެ އަގު ވަޒަންކުރެވިގެން ދިޔަ ދުވަހަކަށެވެ. 3 ނޮވެމްބަރ 2024 ވަނަ ދުވަހު އޮތް ނަސްރުގެ ދުވަހުގެ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ޝަހީދުވި އާއިލާތަކަށް ހާއްސަކޮށް ޝަހީދުންގެ ހިޔާގެ ނަމުގައި 50 ޔުނިޓް ހިމެނޭ ހާއްސަ ހައުސިންގ އިމާރާތެއް މި ދައުރުގެ ތެރޭގައި އަޅާނިންމައި، އެ ފަރާތްތަކާ ހަވާލު ކުރައްވާނެ ކަމަށެވެ. ނަޞްރުގެ ދުވަހުގެ ރަސްމީ ޖަލްސާގައި ރައީސް ވަނީ ނިޝާން ޢަސްކަރީގެ ވެރިކަމުގެ ޢިއްޒަތް، މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އަރުވައިފާއެވެ. ރާއްޖޭގެ ވެރިކަން ބަދަލުކޮށްލަން ހަތިޔާރާ އެކު ޓެރަރިސްޓުންގެ ބަޔަކު ނޮވެމްބަރު 3، 1988 ގައި ހަމަލާދިން އިރު ޖަލީލު ހުންނެވީ ސިފައިންގެ މައި މަރުކަޒުގެ ޓާސްކް ފޯހުގެ ކޮމާންޑަރަކަށެވެ. ނޮވެމްބަރު 3 ގައި އަމާޒުވި އުދުވާނީ ހަމަލާއިން ޤައުމު ދިފާއުކުރެއްވި މޭސްތިރިޔާއަކީ އެއީއެވެ. އެހެންނަމަވެސް މިހާތަނަށް އައިއިރު އޭނާ ކުރެއްވި އަގުހުރި މަސައްކަތުގެ ޤައުމީ ފެންވަރުގައި އަގު ވަޒަންކުރެވިފައި ނެތްކަމުގެ ހިތި އަސަރުކުރެވިފައިވާ ކަން ހާމަވެގެން ދިޔައީ އޭނާއަށް އެ ޝަރަފް އެރުވުނު ވަގުތު ލޮލުން އޮހެރިގެންދިޔަ އުފާވެރިކަމުގެ ކަރުނައިންނެވެ. ދިވެހި ރައްޔިތުން ވެރިއެއްގެ ފަރާތުން އެދޭ ކަންތައްތައްތަކަކީ މިއީ ނޫންތޯއެވެ.
ދުވާލުގެ ގިނަ ވަގުތު ކުޅިވަރާއި މަޖަލުގައި ހޭދަކުރެއްވުމުގެ ބަދަލުގައި ޤައުމަށް ޚިދްމަތް ކުރެއްވުމުގައި ނަމޫނާ ދައްކަވަމުން ވަޑައިގަންނަވާ އަދުގެ ރައީސުލް ޖުމްހޫރިއްޔާ ޑރ މުހައްމަދު މުއިއްޒު ވެގެންދާނީ، ދިވެހި ތާރީޚުގައި ރަންއަކުރުން ފަވާލެވޭނެ ނަމަކަށެވެ. ހަމަގައިމުވެސް ރައީސް ޑރ މުއިއްޒުގެ 365 ދުވަހު ހައްލުކުރެއްވީ އެއްވެސް ވެރިއަކަށް އަތްލާން ކެރިވަޑައިނުގެންނެވި އެތައް މައްސަލައެކެއެވެ. ހާމަކޮށްދެއްވީ 365 ދުވަސް އެމަނިކުފާނު ހޭދަކުރެއްވީ ސާތިބުކަމާއެކު ރައްޔިތުންގެ ފަޅީގައި ކަމެވެ. އައްސަރިބަހާއި ސާބަސް ހައްގު ނޫންތޯއެވެ. ހަމަގައިމުވެސް މިއަދު ކޮންމެ ދިވެއްސެއްގެ ޝުޢޫރަކީ
ކޮން ފަދަ ނަސީބެއްތޯއެ މީ، ދޮންވެލި ބިމެއްގައި ލެއްވުމީ
ހަންހާރަވެތި ދިވެހީންގެ މީ، ގިންތީ ތެރޭ ހިމެނުއްވުމީ
