އެންޓި ކޮރަޕްޝަން ކޮމިޝަން އަދި އިލެކްޝަންސް ކޮމިޝަނުގެ ބައެއް މެމްބަރުން މަގާމުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ފާސްކޮށްފި އެވެ.
ކޮމިޓީން މިގޮތަށް ފާސްކުރީ މިއަދު ބޭއްވި ކޮމިޓީ ބައްދަލުވުމުގަ އެވެ. އެ ބައްދަލުވުން ކުރިއަށް ގެންދިޔައީ ސިއްރުކޮށްގެންނެވެ.
ސިވިލް ސާވިސް ކޮމިޝަނުގެ ރައީސް ވެސް ހިމެނޭ ގޮތުން ދެ ކޮމިޝަނުގެ ޖުމްލަ 5 ބޭފުޅަކު މަގާމުން ވަކިކުރުމަށް މަޖިލީހަށް ހުށަހެޅި މި މަހުގެ 12 ވަނަ ދުވަހު އެވެ. އެ މީހުން ވަކިކުރަން ހުށަހެޅީ، ނުފޫޒަށް ލެނބުމާއި ސުލޫކީ މައްސަލަތަކަކާ ގުޅިގެންނެވެ. ވަކިކުރަން ހުށަހެޅި 6 މީހުންނަކީ:
- ސީއެސްސީގެ ރައީސް މުހައްމަދު ނާސިހު- އޭސީސީގެ ނައިބު ރައީސް އަބްދުއްސަލާމް އާއި އެ ކޮމިޝަންގެ މެމްބަރު ތޯހާ މުހައްމަދު
- އީސީގެ ނައިބު ރައީސް އަލީ ނަޝާތާއި އެ ކޮމިޝަންގެ މެމްބަރުން ކަމަށްވާ މުހައްމަދު އާސިފާއި ޑރ. މުހައްމަދު ޒާހިރު
މީގެ ތެރެއިން ސީއެސްސީގެ ރައީސް ނާސިހު ފިޔަވާ ދެން ތިބި ފަސް ބޭފުޅުން ވަކިކުރުމަށް މިއަދު ބޭއްވި ކޮމިޓީ ބައްދަލުވުމުގައި ވަނީ ފާސްކޮށްފަ އެވެ. އެ ފަސް މެމްބަރުން ވެސް ވަކިކުރަން ފާސްކުރުމުގެ ކުރިން ކޮމިޓީން ވަނީ ލިޔުމުން ޖަވާބުދާރިވުމުގެ ފުރުސަތު ވެސް އަރުވާފަ އެވެ.
މިނިވަން ދެ މުއައްސަސާއެއްގެ ބައެއް މެންބަރުން މަޤާމުން ވަކިކުރުމަށް ކޮމިޓީން ފާސްކޮށްފައިވާއިރު، އެ މެމްބަރުން ކޮމިޝަންތަކުން ވަކިވާނީ ރައްޔިތުންގެ މަޖިލީހުގެ ތަޅުމަށް ކޮމިޓީ ރިޕޯޓު ހުށައަޅައި، ފާސްކުރުމުންނެވެ.
