މި ދިވެހިރާއްޖޭގެ ރައްޔިތުންނަށް ހެޔޮވަރިކަމެއް ހޯދައިދީ، މި ސަރުކާރު ބަދަލުކުރާނަން: ރައީސް ނަޝީދު

ދިވެހިރާއްޖޭގެ ރައްޔިތުންނަށް ހެޔޮވަރިކަމެއް ހޯދައިދިނުމަށްޓަކައި މިހާރު އޮތް ސަރުކާރު ބަދަލުކޮށް، ދެން އުފެދޭނީ ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ސަރުކާރެއް ކަމަށް އެ ޕާޓީގެ ރައީސް އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިރޭ ކުރިޔަށްދަމުންދާ އެމްޑީޕީގެ ފަސްވަނަ ކޮންގްރެސްގައި ވާހަކަފުޅު ދައްކަވަމުންނެވެ.

ރައީސް ނަޝީދުގެ ވާހަކަފުޅުގައި މިހާރުގެ ސަރުކާރަށް ފާޑުވިދާޅުވަމުން ވިދާޅުވީ، ދޮގުހެދުމާއި، އޮޅުވާލުމާއި، މަކަރުހެދުމަކީ މި ސަރުކާރުގެ ހަމައެކަނި އަމާޒު ކަމަށެވެ. އަދި ރައްޔިތުންނަށް ކަމެއް ކޮށްދިނުމުގެ އެއްވެސް ޚިޔާލެއް ސަރުކާރުގެ ނެތްއިރު، ދަރަނި އަދާކުރުމުގެ ސިޔާސަތެއްވެސް ނެތް ކަމަށް ވިދާޅުވިއެވެ. ބޭރުން ފައިސާ ނުގެނެވުމުގެ ސަބަބުން ރާއްޖޭގައި ހުރި ޑޮލަރު އެތަންމިތަނުން ނަގަމުންދާއިރު، މިއަދު ޚަޒާނާގައާއި ބޭންކުތަކުގައި ޑޮލަރެއް ނެތް ކަމަށާއި، ޓީޓީ ހެދުމަށާއި އިމްޕޯޓް މުދަލަށް ފައިސާ ނުދެއްކި، ތަކެތީގެ އަގު އިންތިހާއަށް އުފުލި ރައްޔިތުން ތަދުމަޑުކަމެއްގެ ތެރެއަށް ވެއްޓިފައިވާ ކަމަށް އެމަނިކުފާނު ފާހަގަކުރެއްވިއެވެ. އެހެންކަމުން ރައްޔިތުން މި ހާލަތުގައި ތިއްބާ އެމްޑީޕީން ބަލަން ނުތިބޭނެ ކަމަށާއި، ނުކުމެ މި ވެރިކަން ބަދަލުކުރާނެ ކަމަށް ވިދާޅުވިއެވެ.

ރާއްޖޭގެ އިޤްތިޞާދީ އަދި އިޖުތިމާޢީ ތަރައްޤީއަށް އަލިއަޅުއްވާލައްވަމުން ރައީސް ނަޝީދު ވިދާޅުވީ، މިއަދު ދިވެހިން މިދެކޭ ތަނަވަސްކަމަކީ އެމްޑީޕީގެ މަސައްކަތް ކަމަށެވެ. އެގޮތުން 2008 ވަނަ އަހަރު ދައުލަތުގެ އާމްދަނީ 7 ބިލިއަން ރުފިޔާގައި ހުއްޓާ، އެމްޑީޕީން ގެނައި ޓެކްސް ނިޒާމުގެ ސަބަބުން މިއަދު އާމްދަނީ 40 ބިލިއަން ރުފިޔާއަށް އަރާފައިވާކަން ފާހަގަކުރެއްވިއެވެ. މީގެއިތުރުން، ދޮށީ އުމުރުގެ މީހުންގެ ޕެންޝަނާއި، އެކަނިވެރި މައިންނާއި ޔަތީމު ކުދިންގެ ޢިނާޔަތްތަކާއި، އާސަންދައިގެ ޚިދުމަތާއި، ހިލޭ ޑިގްރީ އަދި ކޮވިޑުގެ އާލަމީ ވަބާއިން ދިވެހިން ސަލާމަތުގެ އައްސޭރިއަކަށް ގެންގޮސްދިނީ އެމްޑީޕީން ކަމަށް ވިދާޅުވިއެވެ.

ހަމައެއާއެކު، ރަށްތައް ދަތުރުފަތުރުގެ ނިޒާމުން ގުޅާލުމާއި، ލާމަރުކަޒީ ނިޒާމާއި، ރައްޔިތުންނަށް ބޯހިޔާވަހިކަމާއި ފްލެޓު ހޯދައިދިނުމާއި، ރަށްރަށުގެ ބަނދަރާއި ތޮށިލުމާއި، ސްކޫލްތަކާއި ހޮސްޕިޓަލްތަކާއި ފުޓްސަލް ދަނޑުތައް ތަރައްޤީކުރުމުގެ އިތުރުން އެންމެ ކުޑަ އުޖޫރަ (މިނިމަމް ވޭޖް) އާއި ސަރވިސް ޗާޖް ޤާނޫނުން ކަށަވަރުކޮށްދިނީވެސް އެމްޑީޕީގެ ސިޔާސަތުން ކަމަށް ވިދާޅުވިއެވެ.

އެމްޑީޕީ އުފެދިގެން އައި ތާރީޚަށް ބައްލަވާލައްވަމުން، 2003 ސެޕްޓެމްބަރު 19 ގައި އީވާން ނަސީމް މަރާލުމާ ގުޅިގެން ރާއްޖެއަށް ގެންނަން ފެށި ބަދަލުތަކާއި، 2004 ވަނަ އަހަރު ޕާޓީ އުފެއްދި ދުވަސްވަރު ޤާނޫނުއަސާސީއަށް ގެންނަން އުޅުނު އިސްލާޙުތަކުގެ ވާހަކަ ދެއްކެވިއެވެ. އަދި ޤާނޫނުއަސާސީން ތިންބާރު ވަކިކުރުމަށް އެދުނު ނަމަވެސް، ރައީސުލްޖުމްހޫރިއްޔާއަށް އޮތް ބާރުތައް އަދިވެސް އެއްކޮށް ކަނޑަނޭޅޭ ކަމަށާއި، މި ކޮންގްރެސްގެ ތެރެއިން ފުރިހަމަ ޤާނޫނުއަސާސީއެއް އެކުލަވާލުމުގެ މަޝްވަރާތައް ކުރިއަށްދާނެ ކަމަށް ވިދާޅުވިއެވެ.

މި ކޮންގްރެސްގައި ކައުންސިލްތަކަށް ޚާއްޞަކޮށްގެން އިންވެސްޓްމަންޓް ފޯރަމެއް ބާއްވާކަން ފާހަގަކުރައްވައި ނަޝީދު ވިދާޅުވީ، ރަށްރަށުގައި ވަޒީފާއާއި އާމްދަނީ އިތުރުކުރުމަށް ކައުންސިލްތަކުން 76 ޕްރޮޖެކްޓެއް ފާހަގަކޮށްފައިވާ ކަމަށެވެ. އަދި ރާއްޖޭގެ ދެބައިކުޅައެއްބަޔަށްވުރެ ގިނަ ކައުންސިލް ތަމްސީލުކުރާ ޕާޓީގެ ހައިސިއްޔަތުން އެ ޕްރޮޖެކްޓްތަކަށް އިންވެސްޓްމަންޓް ހޯދައިދިނުމަކީ ޕާޓީގެ ވާޖިބެއް ކަމަށް ވިދާޅުވިއެވެ.

ނިންމަވާލައްވަމުން ރައީސް ނަޝީދު ވިދާޅުވީ، ސަރުކާރުން ޑޮލަރު މާރުކުރުމާ ގުޅޭގޮތުން ދައްކަމުންދާ ވާހަކަތަކާއި، ޓޫރިޒަމް ދާއިރާއަށް ގެންނަން އުޅޭ ބަދަލުތަކަކީ ފެއިލްވެފައިވާ އަދި ތަންފީޒުނުކުރެވޭނެ ސިޔާސަތުތަކެއް ކަމަށެވެ. މިފަދަ މީޒާނެއް ނެތް، ލާހޫރޭ އިޤްތިޞާދީ ސިޔާސަތުތަކުގެ ސަބަބުން ޤައުމު އަނދަވަޅަކަށް ވެއްޓެން ދޫކޮށްނުލައްވާނެ ކަމަށާއި، އިރާދަކުރެއްވިއްޔާ ރައީސް ޑރ. މުޙައްމަދު މުޢިއްޒުގެ ސަރުކާރު ބަދަލުކުރައްވާނެ ކަމަށް އެމަނިކުފާނު ތަކުރާރުކޮށް ވިދާޅުވިއެވެ.