އިސްރާއީލުން ލުބުނާނުގެ ދެކުނަށް ދޭ ހަމަލާތައް މެދުކެނޑުމެއްނެތި ކުރިއަށް!

މިއަދު ވެސް އިސްރާއީލުގެ އިސްތިއުމާރީ ބާރުތަކުން ލުބުނާނުގެ ދެކުނުގެ ސަރަހައްދުތަކަށް ވަރުގަދަ ހަމަލާތަކެއް ދީފިއެވެ. ގަލްފް ޓައިމްސް އިން ރިޕޯޓްކޮށްފައިވާ ގޮތުގައި، ވައިގެ މަގުންނާއި ބޮޑުބަޑި އަދި މެޝިން ބަޑި ބޭނުންކޮށްގެން ދެކުނުގެ އެކި ސަރަހައްދުތަކަށް ވަނީ އަމާޒުކޮށްފައެވެ.

ލުބުނާނުގެ ގައުމީ ހަބަރު ފަތުރާ އިދާރާއިން މައުލޫމާތުދޭ ގޮތުގައި، އިސްރާއީލުގެ ހަނގުރާމަމަތީ ބޯޓުތަކުން ޒައުތަރު އަލް-ޝަރުގިއްޔާ އާއި މައިފަދޫންއާ ގުޅޭ ސަރަހައްދުތަކަށް ވައިގެ ހަމަލާތައް ދީފައިވެއެވެ. މީގެއިތުރުން، ނަބަތީހް އަލް-ފައުގާގެ ކައިރީގައިވާ އަލީ އަލް-ތާހިރު ފަރުބަދަޔަށް މެދުނުކެނޑި ބޮޑުބަޑީގެ ހަމަލާތައް ވަނީ އަމާޒުކޮށްފައެވެ. އަދި ބިންތު ޖުބައިލް ސަރަހައްދުގައި ހިމެނޭ ހައްދަތާ އަވަށުގެ ތެރެއިން އިސްރާއީލުގެ އަސްކަރީ އުޅަނދުތައް ދަތުރުކުރަމުންދިޔަ ވަގުތު، އެ އަވަށުގެ އެކި ދިމާލަށް މެޝިން ބަޑިން ހަމަލާދީފައިވާ ކަމަށްވެސް އެ އިދާރާއިން ބަޔާންކޮށްފައިވެއެވެ.

މި ހަމަލާތައް ކުރިއަށް މިދަނީ ލުބުނާނުގެ ދެކުނު ބޯޑަރުގައި މަސްރަހު އިންތިހާއަށް ގޯސްވެ، ނުތަނަވަސްކަން އިތުރުވެފައިވާ ދަނޑިވަޅެއްގައެވެ. ހާއްސަކޮށް، ދެވޭ ހަމަލާތަކުގެ ދާއިރާ ފުޅާވެ، އާންމުން ދިރިއުޅޭ ސަރަހައްދުތަކަށް ސީދާ އަމާޒުކޮށް ހަމަލާތައް ދެމުންދާތީ ބައިނަލްއަގުވާމީ ފެންވަރުގައި ބޮޑެތި ކަންބޮޑުވުންތަކެއް ވަނީ އުފެދިފައެވެ.

ލުބުނާނާއި އިސްރާއީލުގެ އިސްތިއުމާރީ ބާރުތަކާ ދެމެދު، އެމެރިކާގެ މެދުވެރިވުމާއެކު މިދިޔަ ޖޫން މަހު ވަނީ އޮނިގަނޑު އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން، ސަލާމަތީ ގޮތުން އަޅާ ފިޔަވަޅުތަކުގެ ތެރޭގައި ލުބުނާނުގެ އަސްކަރިއްޔާ މަޑުމަޑުން އެ ސަރަހައްދުގައި ގާއިމުކުރުމާއި، އިސްތިއުމާރީ ބާރުތައް އެ ސަރަހައްދުން ފޭބުން ހިމެނެއެވެ. އަދި ސަރަހައްދު އަލުން އާބާދުކުރުމާއި އިގްތިސާދީ ގޮތުން ކުރިއެރުވުމަށް ބޭނުންވާ މުހިންމު ފިޔަވަޅުތައް ވެސް މި އެއްބަސްވުމުގައި ހިމެނެއެވެ.

ނަމަވެސް، އިސްރާއީލުން ދެމުންދާ ހުއްޓުމެއްނެތް މިފަދަ ހަމަލާތަކުގެ ސަބަބުން މި އެއްބަސްވުމުގެ މާއްދާތައް އަމަލީ ގޮތުން ތަންފީޒުކުރުމަށް ގިނަގުނަ ގޮންޖެހުންތަކާއި ހުރަސްތަކެއް ވަނީ ކުރިމަތިވެފައެވެ.