އީރާނަށް ތާއީދުކުރާ ޖަމާއަތްތަކުން ހަތިޔާރު ބެހެއްޓުމަށް އިރާގުގެ ބޮޑުވަޒީރު ސުންގަޑިއެއް ކަނޑައަޅައިފި

ޢިރާގުގައި ހަރަކާތްތެރިވާ އެމެރިކާ އިސްވެ އޮންނަ ކޯލިޝަން ފައުޖުތަކުގެ މިޝަން ނިމުމަކަށް އައުމާ ގުޅިގެން، އެ ޤައުމުގެ ހަތިޔާރު އެޅި ޖަމާޢަތްތަކުން ދައުލަތާ ހަތިޔާރު ޙަވާލުކުރަންޖެހޭ އައު ސުންގަޑިއަކީ 2027 ވަނަ އަހަރުގެ ޖޫން 30 ކަމަށް ޢިރާގުގެ ބޮޑުވަޒީރު ޢަލީ އަލް-ޒައިދީ އިޢުލާން ކުރައްވައިފިއެވެ.

ކުރިން ކަނޑައެޅި ސެޕްޓެމްބަރު 30 ގެ ސުންގަޑި ބަދަލުކުރެއްވުމަށްފަހު ނެރުއްވި ބަޔާނެއްގައި ބޮޑުވަޒީރު ޒައިދީ ވިދާޅުވީ، ދައުލަތުގެ ބާރުގެ ދަށުގައި ނެތް ހަތިޔާރުތަކުގެ މައްސަލައަށް ޙައްލެއް ހޯދުމަށް ސީރިއަސް މަސައްކަތްތަކެއް ފެށޭ ތާރީޚަކީ މިއަދެވެ. އަދި މިއީ ސާފު މަގުޗާޓަކާއި އެއްބަސްވެވިފައިވާ ތާވަލުތަކެއްގެ ދަށުން، ލަސްވެގެން އަންނަ އަހަރުގެ ޖޫން 30 ގެ ނިޔަލަށް ކުރިއަށްދާނެ ކަމެއް ކަމަށްވެސް އެމަނިކުފާނު ވިދާޅުވިއެވެ.

ޢިރާގު ސަރުކާރުން ޤަބޫލުކުރާ ގޮތުގައި ކޯލިޝަން ފައުޖުތައް އެ ޤައުމުން ފޭބުމުން، އީރާނުގެ މަދަދުލިބޭ ގިނަ ހަތިޔާރު އެޅި ޖަމާޢަތްތަކުން ހަތިޔާރު ބެހެއްޓުމަށް ދައްކަމުންދާ އުޒުރުތަކަށް ނިމުމެއް އަންނާނެއެވެ. ނަމަވެސް، ފައުޖުތައް ފޭބުމުގެ ސަބަބުން އެ ޖަމާޢަތްތަކުގެ ބާރުގަދަވެ، މެދުއިރުމަތީގައި ހިނގަމުންދާ ހަނގުރާމައިގެ ތެރެއަށް ޢިރާގު އިތުރަށް ވަދެގެން ހިނގައިދާނެ ކަމުގެ ބިރު ގިނަ ފަރާތްތަކަކުން އަންނަނީ ފާޅުކުރަމުންނެވެ.

ދުސްތޫރީ އުސޫލުތަކުގެ މައްޗަށް ބިނާކޮށް، ހަނގުރާމަކުރުމާއި ސުލްހަ ގާއިމުކުރުމުގެ ނިންމުންތައް ނިންމަންވާނީ ދުސްތޫރީ ބާރުތަކުން ކަމަށާއި، އެއާ ހިލާފަށް ހިންގާ ހުރިހާ އަސްކަރީ ހަރަކާތްތަކެއް މަނާކުރަންޖެހޭނެ ކަމަށް ބޮޑުވަޒީރު ޒައިދީ މިއަދު ވަނީ ވިދާޅުވެފައެވެ. އިސްލާމިކް ސްޓޭޓް (އައި.އެސް) ޖަމާއަތާ ދެކޮޅަށް ކުރި ހަނގުރާމައިގައި އެހީތެރިވުމަށް އިރާގަށް ސިފައިން ފޮނުވިތާ ދިހަ އަހަރަށްވުރެ ގިނަ ދުވަސް ފަހުން، އެމެރިކާ އިސްވެ އޮވެ އުފައްދާފައިވާ ބައިނަލްއަގުވާމީ ކޯލިޝަނުން އިރާގުގައި ކުރިއަށްގެންދިޔަ މިޝަން ރަސްމީކޮށް ނިންމާލާފައިވަނީ އޭގެ އެއް ދުވަސް ކުރިންނެވެ.

އިރާގުން އެމެރިކާގެ ސިފައިން ބޭރުވުމަކީ ލިބުނު "ތާރީޚީ ކާމިޔާބީއެއް" ކަމަށް ސިފަކޮށް، އީރާނުގެ ރިވޮލިއުޝަނަރީ ގާޑްސްއިން ވަނީ އެކަމަށް މަރުހަބާ ކިޔާފައެވެ. އަދި މުޅި މެދުއިރުމަތީ ސަރަހައްދުން އެމެރިކާގެ ސިފައިން ފޭބުމަށްވެސް އެ ބާރުން ވަނީ ގޮވާލާފައެވެ. އީރާނުގެ ރަސްމީ މީޑިއާތަކުން އާންމުކުރި ބަޔާނެއްގައިވާ ގޮތުން، މި ތާރީޚީ ކާމިޔާބީއަށްޓަކައި އިރާގުގެ ފަޚުރުވެރި ރައްޔިތުންނަށާއި، އިސްލާމީ މުގާވަމާގެ ރެސިސްޓެންސް ސަފުތަކުގެ އިތުރުން އިސްލާމީ ދުނިޔޭގެ އިންގިލާބީ މުޖާހިދުންނަށް ވަނީ ތަހުނިޔާ ފޮނުވާފައެވެ.

ހަތިޔާރު ބެހެއްޓުމަށްޓަކައި ޒައިދީ ކުރިން ކަނޑައެޅުއްވި ސެޕްޓެމްބަރު 30 ގެ ސުންގަޑި އުވާލެއްވީ ހަތިޔާރުތައް 'ރެގިއުލޭޓް' ކުރުމާ ގުޅޭގޮތުން ކުރިއަށްދާ މަޝްވަރާތަކާ ގުޅިގެންނެވެ. ބައެއް ޖަމާއަތްތަކުން މިހާރުވެސް ދައުލަތާ ހަތިޔާރު ހަވާލުކޮށްފައިވާއިރު، އަނެއްބައި ޖަމާއަތްތަކުން ވަނީ ހަތިޔާރު ބެހެއްޓުމަށް އިންކާރުކޮށްފައެވެ.

އީރާނުގެ ތާއީދުލިބޭ އިރާގުގެ ހަތިޔާރު އެޅި ޖަމާއަތްތަކުން ބުދަ ދުވަހު ހާމަކުރި ގޮތުގައި، ދައުލަތާ ހަތިޔާރު ހަވާލުކުރުމަށް އެއްވެސް ވަގުތެއް ނުވަތަ އެއްބަސްވުމަކަށް އަމަލުކުރުމަށް އެ ފަރާތްތަކުން ބަނދެވިފައެއް ނުވެއެވެ. ކަތާއިބު ހިޒްބުاللهގެ އަސްކަރީ ތަރުޖަމާނު ޖައުފަރު އަލް-ހުސައިނީ ވިދާޅުވީ، ހަތިޔާރުތައް 'ރެގިއުލޭޓް' ކުރުމާ ގުޅޭގޮތުން މަޝްވަރާތައް ކުރެވެމުންދިޔަ ނަމަވެސް، އެކަމާ ގުޅޭގޮތުން އިރާގު ސަރުކާރުގެ ފަރާތުން އަދި ޖަވާބެއް ލިބިފައިނުވާ ކަމަށެވެ. އެހެންކަމުން އެއްވެސް ސަރުކާރަކުން ނުވަތަ ސިޔާސީ ޕާޓީއަކުން ދައްކާފައިވާ ވަގުތީ ތާވަލަކަށް ބޯނުލަނބާނެ ކަމަށް އެ ޖަމާޢަތުން ވަނީ ބުނެފައެވެ.

މުގާވަމާގެ އިއްތިހާދުތަކުން ހުށަހަޅާފައިވާ ޝަރުޠުތަކުގެ ތެރޭގައި ހަމައެކަނި ބޭރުގެ ސިފައިން ފޭބުމުގެ އިތުރުން އެމެރިކާގެ ސިޔާސީ އަދި އިޤްތިޞާދީ ނުފޫޒުތައް ހުއްޓުވުންވެސް ހިމެނެއެވެ. ކަތާއިބު ހިޒްބުالله އިން ބުނެފައިވަނީ "އިސްތިޢުމާރީ ބާރުތައް ފޭބުމަކީ ފުރިހަމަ މިނިވަންކަމާއި ސިޔާދަތު ހޯދުމަށް އެޅޭ ފުރަތަމަ ފިޔަވަޅު" ކަމަށެވެ. އަދި އަމިއްލަ ރައްޔިތުންގެ ލާބަޔާއި މަންފާއަށް މަސައްކަތް ނުކުރާ ސަރުކާރެއް، ކުރެވެން އޮތް ހުރިހާ ވަސީލަތެއް ބޭނުންކޮށްގެން ވައްޓާލެވޭނެ ކަމަށް ބުނެ އެ ޖަމާޢަތުން ވަނީ ޒައިދީގެ ސަރުކާރަށް އިންޒާރުވެސް ކޮށްފައެވެ.

އީރާނަށް ތާއީދުކުރާ ޖަމާއަތްތަކުން އެމެރިކާ ސިފައިން ބޭލުމަށް ގޮވާލައި ޑްރޯނާއި މިސައިލް ހަމަލާތައް ދެމުންދާއިރު، އެމެރިކާއިން ދިން ރައްދު ހަމަލާތަކުގައި އެ ޖަމާއަތްތަކުގެ އިސް ކޮމާންޑަރުންތަކެއް ވަނީ އަވަހާރަ ކޮށްލާފައެވެ. އެމެރިކާ އާއި އިސްރާއީލުން އީރާނަށް ދިން ހަމަލާތަކާއެކު މެދުއިރުމަތީގެ މަސްރަޙު ގޯސްވެފައިވާއިރު، ކުރުދިސްތާން ސަރަހައްދުގައި ތިބޭ އިއްތިހާދުގެ ސިފައިންނަށް އަމާޒުކޮށް އީރާނާ ގުޅުންހުރި ޖަމާއަތްތަކުން ދޭ ހަމަލާތައް މިހާރު ވަނީ އިތުރަށް ވަރުގަދަކޮށްފައެވެ.