ސައޫދީގެ ސަލާމަތާއި ރައްކާތެރިކަން ކަށަވަރުކުރުމުގައި ޕާކިސްތާނުން ދެމިއޮންނާނެކަމުގެ ޔަގީންކަން ބޮޑުވަޒީރު ޝެހްބާޒް ޝަރީފް ދެއްވައިފި

ސައޫދީ އަރަބިއްޔާގެ އިސްތިގުލާލާއި، ސަރަހައްދީ ފުރިހަމަކަން އަދި އެ ގައުމުގެ ސަލާމަތާއި ރައްކާތެރިކަން ކަށަވަރުކޮށްދިނުމުގައި ޕާކިސްތާނުން އަބަދުވެސް ސާބިތުކަމާއެކު ދެމިއޮންނާނެ ކަމުގެ ފުރިހަމަ ޔަގީންކަން ޕާކިސްތާނުގެ ބޮޑުވަޒީރު ޝެހްބާޒް ޝަރީފް އަލުން އާކުރައްވައިފިއެވެ.

އާދީއްތަ ދުވަހު މީސްމީޑިއާގައި ހިއްސާކުރެއްވި ޕޯސްޓެއްގައި ބޮޑުވަޒީރު ޝެހްބާޒް ޝަރީފް ވަނީ، ސައޫދީ އަރަބިއްޔާގެ ވެރިރަށް ރިޔާޒުގައި ހުންނަ ކިންގް ޚާލިދު އިންޓަނޭޝަނަލް އެއާޕޯޓަށް އަމާޒުކޮށް ޔަމަނުގެ ހޫޘީން ދިން ކަމަށް ބުނާ ހަމަލާ ހަރުކަށި އިބާރާތުން ކުށްވެރިކުރައްވާފައެވެ. އަދި މިއީ ސަރަހައްދީ ހަމަޖެހުމަށް ބުރޫއަރާ ފަދަ ނުރައްކާތެރި އަމަލެއްގެ ގޮތުގައި އެމަނިކުފާނު ސިފަކުރެއްވިއެވެ.

ބޮޑުވަޒީރު ޝަރީފް އިތުރަށް ވިދާޅުވީ، ކުށެއްނެތް އާންމު ރައްޔިތުންނާއި ގައުމުތަކުގެ މުހިންމު އުމްރާނީ ވަސީލަތްތަކަށް އަމާޒުކޮށްގެން ދޭ މިފަދަ ފިނޑި ހަމަލާތަކަކީ އެއްވެސް ހާލެއްގައި ބަލައިގަނެވޭނެ ކަންކަމެއް ނޫން ކަމަށެވެ. އަދި މިފަދަ ހަމަލާތަކަކީ މުޅި ސަރަހައްދުގެ ސުލްހަމަސަލަސްކަމާއި ރައްކާތެރިކަމަށް އޮތް ބޮޑު ގޮންޖެހުމެއް ކަމަށްވެސް އެމަނިކުފާނު ފާހަގަކުރެއްވިއެވެ.

މި ހަމަލާއާ ގުޅިގެން ޕާކިސްތާނުން ސައޫދީއަށް ތާއީދު އާކޮށްފައިވާއިރު، ޔަމަނުގެ ހޫޘީން ސައޫދީ އަރަބިއްޔާއަށް މިސައިލް ހަމަލާތަކެއް ދިންތާ މަދު ދުވަސްކޮޅެއްގެ ތެރޭގައި، މިދިޔަ އޯގަސްޓް މަހުގެ ތެރޭގައި ޕާކިސްތާނާއި، ސައޫދީ އަރަބިއްޔާ އަދި ތުރުކީވިލާތް ގުޅިގެން ވަނީ "މައްކާ ޖޮއިންޓް ޑިފެންސް އެގްރީމަންޓް" ގައި ސޮއިކޮށްފައެވެ. މި އެއްބަސްވުމުގެ ދަށުން ސަރަހައްދީ ސަލާމަތާއި ދިފާއީ ކަންކަމުގައި މި ތިން ގައުމުގެ މެދުގައި ގާތް ގުޅުމެއް ދަނީ ބަދަހިކުރަމުންނެވެ.