އާފަލާއި އޮރެންޖުގެ އަގު އަތް ނުފޯރާ ފަށަށް!

ބާޒާރުގައި އާފަލާ އޮރެންޖުގެ އަގު ވަރަށް ބޮޑަށް އުފުލިއްޖެއެވެ.

މާލެ ސިޓީގައި މޭވާ އާ ތަރުކާރީ ވިއްކާ ފިހާރަތަކުން އޮރެންޖެން މިހާރު ލިބެނީ އާންމުކޮށް 7 ރުފިޔާ އާ 11 ރުފިޔާ އާ ދެމެދުގެ އަގެއްގައެވެ. އަދި އާފަލެއް 8 ރުފިޔާ އާއި 10 ރުފިޔާގެ އަގެއްގައެވެ.

ބާޒާރުގައި މި ބާވަތްތަކުގެ އަގު އުފުލިފައިވަނީ ކީއްވެ ކަމެއް ނޭނގެއެވެ. އެހެން ނަމަވެސް ސަރުކާރުން ފައިސާ ޗާޕުކުރަމުންދާތީ ރުފިޔާގެ އަގުވަނީ ވަރަށް ބޮޑަށް ދަށްވެފައެވެ. އޭގެ ސަބަބުން ޑޮލަރު ގަންނަން ޖެހެނީ ބޮޑު އަގުގައެވެ. އަދި އެހެން ކަމުން ޖުމްލަ ގޮތެއްގައި ރާއްޖޭގެ ދިރިއުޅުމުގެ އަގުވަނީ ވަރަށް ބޮޑަށް އުފުލިފައެވެ.

އާފަލާ އޮރެންޖުގެ އަގު ބޮޑުވެފައިވާއިރު މީގެ ކުރިން ސަރުކާރުން ވަނީ ކޮޗިން ފެރީގެ ސަބަބުން އާފަލާ އޮރެންޖު 2 ރުފިޔާއަށް ގަންނަން ލިބޭނެ ކަމަށްވެސް ބުނެފައެވެ. އެހެން ނަމަވެސް ކޮޗިން ފެރީ ނުހިންގިގެން ހުއްޓާލިއިރުވެސް އެ އަގަށް އާފަލާ އޮރެންޖު ނުލިބެއެވެ.

މިތަކެތީގެ އަގު ބޮޑުވެފައިވާތީ ގިނަ ބަޔަކު ދަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ. އާފަލާ އޮރެންޖު ހިމެނެނީ ވަރަށް ގިނަ އަދަދެއްގެ ދިވެހިން އެންމެ ގިނައިން ބޭނުންކުރާ މޭވާތަކުގެ ތެރޭގައެވެ.