ޗައިނާގެ 77 ވަނަ ޤައުމީ ދުވަހުގެ ތަހުނިޔާ ރައީސް ފޮނުއްވައިފި

ޗައިނާގެ 77 ވަނަ ޤައުމީ ދުވަހުގެ މުނާސަބަތުގައި، އެ ޤައުމުގެ ރައީސް ޝީ ޖިންޕިންގް އާއި ބޮޑުވަޒީރު ލީ ކިއަންގަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނިޔާ ފޮނުއްވައިފިއެވެ.

ޗައިނާގެ ލީޑަރުންނަށް ވަކިވަކިން ފޮނުއްވި މެސެޖުތަކުގައި، ރައީސުލްޖުމްހޫރިއްޔާ ވަނީ ދިވެހި ސަރުކާރާއި ރައްޔިތުންގެ ނަމުގައި ޗައިނާގެ ސަރުކާރަށާއި އެކުވެރި ރައްޔިތުންނަށް ދުވަހުގެ ހެޔޮއެދުމާއި ތަހުނިޔާ އަރިސްކުރައްވާފައެވެ. މި މުނާސަބަތަކީ ޗައިނާގެ ރައްޔިތުންގެ މެދުގައި އޮތް އެއްބައިވަންތަކަމާއި އުޚުއްވަތްތެރިކަން ވަރުގަދަކޮށް، ޤައުމުގެ އަމާންކަން ދަމަހައްޓައި، އުންމީދީ މުސްތަޤުބަލަކަށް ވާޞިލުވުމަށް ކުރަމުންދާ މަސައްކަތްތަކަށް ލިބުނު އިތުރު ހިތްވަރެއްކަން އެމަނިކުފާނު ފާހަގަކުރެއްވިއެވެ.

ދިވެހިރާއްޖެއާއި ޗައިނާއާ ދެމެދު އޮތް ބަދަހި ގުޅުމުގެ މައްޗަށް އަލިއަޅުއްވާލައްވަމުން، މި ގުޅުމަކީ ދިގު މުއްދަތުގެ އެކުވެރިކަމާއި، ގާތް ބައިވެރިވުމުގެ އިތުރުން 'ވަން ޗައިނާ ޕްރިންސިޕަލް' ނުވަތަ 'އެއް ޗައިނާ'ގެ ސިޔާސަތަށް ރާއްޖެއިން ދޭ ފުރިހަމަ އެއްބާރުލުމުގެ މައްޗަށް ބިނާވެފައިވާ ގުޅުމެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ. އަދި ވޭތުވެދިޔަ އަހަރުތަކުގައި ޗައިނާއިން ރާއްޖެއަށް ފޯރުކޮށްދެމުންދާ އެހީތެރިކަމާއެކު، ރާއްޖޭގެ އިޖުތިމާޢީ އަދި އިޤްތިޞާދީ ދާއިރާއިން ބޮޑެތި ކުރިއެރުންތަކެއް ހޯދިފައިވާކަން އެމަނިކުފާނު ބަޔާންކުރެއްވިއެވެ.

ރައީސުލްޖުމްހޫރިއްޔާގެ މެސެޖުގައި، ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، ދެ ފަރާތަށްވެސް ފައިދާހުރި ދާއިރާތަކުން ގުޅުން ބަދަހިކުރުމަށް ރާއްޖެއިން އަބަދުވެސް މަސައްކަތްކުރާނެ ކަމުގެ ޔަޤީންކަން ދެއްވިއެވެ.

މި މެސެޖުތައް ނިންމަވާލައްވާފައިވަނީ ޗައިނާގެ ލީޑަރުންނަށް ދުޅަހެޔޮކަމާއި ފާގަތިކަމަށް އެދިވަޑައިގަންނަވަމުންނެވެ. އަދި ޗައިނާގެ ރައްޔިތުންނަށް ދެމެހެއްޓެނިވި ސުލްހަވެރިކަމާއި، އެއްބައިވަންތަކަމާއި، ފުދުންތެރިކަމަށް އެދިވަޑައިގަންނަވާފައެވެ.

މީގެއިތުރުން، ރައީސުލްޖުމްހޫރިއްޔާ ވަނީ އެމަނިކުފާނުގެ ރަސްމީ 'އެކްސް' އެކައުންޓް މެދުވެރިކުރައްވައިވެސް ޗައިނާގެ ޤައުމީ ދުވަހުގެ ތަހުނިޔާ އަރިސްކުރައްވާފައެވެ.