އިއްޔެއާއި މިއަދުވެސް ވިލާކޮލެޖުން އިސްކަންދޭނީ ދަރިވަރުންނަށް ފެންވަރުރަނގަޅު މަތީތަޢުލީމުގެ ފުރުޞަތުތައް ފޯރުކޮށް ދިނުމަށް ކަމަށް ވިލާ ކުންފުނީގެ ވެރިޔާ ގާސިމް އިބްރާހިމް ވިދާޅުވެއްޖެއެވެ.
ވިލާ ކޮލެޖާއި ވިލާ އިންޓަނޭޝަނަލް ހައި ސްކޫލަށް 17 އަހަރު ފުރުމާ ގުޅިގެން ދުވަހުގެ ތަހްނިޔާ އާއި ހެޔޮ އެދުންތައް ވިލާކޮލެޖާއި ވިލާ އިންޓަރނޭޝަނަލް ހައިސްކޫލުގެ މެނޭޖްމަންޓާއި، ކޮލެޖްގެ ހުރިހާ ދަރިވަރުންނަށް ފޮނުއްވައި، "އެކްސް" ގައި ކުރެއްވި ޕޯސްޓެއްގައި ގާސިމް ވިދާޅުވީ ވޭތުވި 17 އަހަރުގައި ވިލާ ކޮލެޖުންވަނީ މަތީތަޢުލީމުގެ، ފެންވަރު ރަނގަޅު އެތަކެއް ފުރުޞަތުތަކެއް ދިވެހިދަރިވަރުންނަށް ފޯރުކޮށްދީފައިވާ ކަމަށެވެ.
ގާސިމް ވިދާޅުވީ އެ ކޮލެޖުން ދުނިޔޭގެ ނަން ހިނގާ ޔުނިވަރސިޓީތައް ޤަބޫލުކުރާ އެންމެ މަތީ މިންވަރަށް އަދި ރާއްޖޭގެ ކޮލިފިކޭޝަން އޮތޯރިޓީ ޤަބޫލު ކުރާ އެންމެ މަތީ މިންގަނޑުތަކަށް ފެތިފައިވާ އޭލެވަލް އާއި، ސެޓްފިކޭޓްލެވަލް ޕްރޮގްރާމްތަކާއި، ޑިޕޮލޮމާއާއި، ބެޗްލާސް ޑިގްރީގެ އިތުރުން މާސްޓާސް ޑިގްރީގެ އެތަކެއް ހާސް ދަރިވަރުން އެ ހިޔާވަހިކަމުގެ ދަށުން މަތީ ތަޢުލީމު ހާޞިލް ކޮށް އެ ދަރިވަރުންގެ ދިރިއުޅުން އުޖާލާކޮށްފައިވާ ކަމަށެވެ.
އެކަމުގެ ނަތީޖާ އެއްގެ ގޮތުން ޢިލްމު ފެތުރުމުގެ ތެރެއިން ދިވެހިޤައުމު ބިނާކުރުމާއި، ޤައުމުގެ މާދަމާގެ މުސްތަޤްބަލު އުޖާލާކުރުމުގައި ވިލާކޮލެޖާއި، ވިލާ އިންޓަރނޭޝަނަލް ހައި ސްކޫލުން، ދިވެހި ޤައުމުގެ ނިޞްބަތުން ނުހަނު ފުރިހަމަ ދައުރެެއް ، ވޭތުވި 17 އަހަރުގައި އަދާކޮށްދީފަކަމީ، ނުހަނު އުފާކުރާ އަދި އެހާމެ ފަޚުރިވެރި ކަމާއެކު ފާހަގަކޮށްލަން ބޭނުންވާ ކަމެއް ކަމަށް ގާސިމްގެ ޕޯސްޓުގައި ވިދާޅުވެފައި ވެއެވެ.
ގާސިމް ވަނީ ވިލާ ކޮލެޖު ހިންގެވުމުގައި ފުރަތަމަ ދުވަހުން ފެށިގެން ރެކްޓަރ ޑރ އަޙްމަދު އަންވަރު، އަދި ކޮލެޖުގެ ވައިސްރެކްޓަރުން، ފެކަލްޓީތަކުގެ ޑީނުންނާއި، ކޮލެޖުގެ އިދާރީ އެންމެހާ މުއައްޒަފުންނާއި، ލެކްޗަރަރއިންގެ އިތުރުން ވިލާ އިންޓަރނޭޝަނަލް ހައިސްކޫލު ހިންގަވަމުން ގެންދަވާ އެންމެހާ ފަރާތްތަކަށް ދުވަހުގެ ތަޙްނިޔާ ދަންނަވާފައެވެ
ގާސިމް ވިދާޅުވީ އިއްޔެއާއި މިއަދުވެސް ވިލާކޮލެޖުން އަހްމިއްޔަތުކަން ދީފައިވާނީ ދަރިވަރުންނަށް ފެންވަރުރަނގަޅު މަތީތަޢުލީމުގެ ނަމޫނާ ފުރުޞަތުތައް ފޯރުކޮށް ދިނުމަށް ކަމަށެވެ. އަދި الله ގެ ތަނަވަސް ރަޙްމަތާއި އެކު މާދަމާވެސް ވިލާކޮލެޖް ދެމި އޮންނާނީ އެގޮތުގައި ކަމަށް ވިދާޅުވިއެވެ.
