ޖުމްހޫރީ ޕާޓީގެ ވެރިކަމެއްގައި 65 އަހަރުން މަތީ ކޮންމެ މީހަކަށް 7000 ރުފިޔާ ދެއްވާނެ ކަމަށް ޖުމްހޫރީ ޕާޓީގެ ލީޑަރ އަދި އެ ޕާޓީގެ ރިޔާސީ ކެނޑިޑޭޓް އޮނަރަބަލް ޤާޞިމް އިބްރާހިމް ވިދާޅުވެއްޖެއެވެ.
ޤާޞިމް މިހެން ވިދާޅުވީ، އެމަނިކުފާނަށް ޖޭޕީގެ ރިޔާސީ ޓިކެޓު އެރުވުމަށް ރޭ ކާނިވާ ސަރަހައްދުގައި ބޭއްވި ބޮޑު ޖަލްސާގައި ވާހަކަފުޅު ދައްކަވަމުންނެވެ.
އެމަނިކުފާނުގެ ވެރިކަމެއްގައި ރާއްޖޭގެ އެއްވެސް ރައްޔިތަކު ބާކީ ނުވާނެ ކަމަށް، ޤާޞިމް ވަނީ ވިދާޅުވެފައެވެ.
ގާސިމް ވިދާޅުވީ އޭނާގެ ވެރިކަމެއްގައި ބައިނަލްއަގުވާމީ މުބާރާތްތައް ބޭއްވޭ ވަރަށް އިންފްރާސްޓްރަކްޗާ ގާއިމުކޮށް ދުނިޔޭގެ ފެންވަރުގެ އޮލިމްޕިކް ސްޓޭޑިއަމްއެއް އަޅުއްވާނެ ކަމަށެވެ. އަދި ބައިނަލްއަގުވާމީ މޯޝަންޕިކްޗަރަސް ސްޓޫޑިއޯ އައިލެންޑެއް ރާއްޖޭގެ ރަށެއްގައި ތަރައްގީކޮށް، ދިވެހި ޒުވާނުންނަށް އެމީހުންގެ ހުނަރުން އާމްދަނީ ލިބޭނެ މަގުފަހި ކުރައްވާނެ ކަމަށް ވެސް ގާސިމް ވައުދުވެވަޑައިގެންނެވިއެވެ.
ބޯހިޔާވަހިކަމުގެ ހާސްކަމުގައި ތިބި ރައްޔިތުންގެ ހާސްކަން ފިލުވާލައި ދައުރު ނިމުމުގެ ކުރިން ރާއްޖޭގައި 20،000 ހައުސިން ޔުނިޓް އެޅުމަކީ ވެސް ގާސިމްގެ ވައުދެކެވެ. އެކަމަކު، އޭނާގެ އަމާޒަކީ 30،000 ހައުސިން ޔުނިޓެވެ. ގާސިމް ވިދާޅުވީ ހިޔާ ފްލެޓްތަކުގައި ހުރި މައްސަލަތައް ފުރަތަމަ 100 ދުވަހުގެ ތެރޭގައި ހައްލުކުރުމަށް އިސްކަންދީ، ޓަވަރުތަކުގައި އިތުރު އެލެވޭޓަރާއި، ބެކަޕްޖަނަރޭޓަރު ބަހައްޓާ، ހިޔާ ނެއިބަހުޑް ޕާކުތައް ތަރައްގީ ކުރައްވާނެ ކަމަށެވެ
