ފްލައި ދުބާއީގެ ދަތުރުތައް މާދަމާ ފެށޭނެ: ވަޒީރު އަމީން

މެދުއިރުމަތީގެ ހަނގުރާމައިގެ އަސަރުތައް ކުޑަވެ ހާލަތު ރަނގަޅުވަމުންދާ ކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާގެ ވަޒީރު މުހައްމަދު އަމީން ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އަމީން ވިދާޅުވީ ހާލަތު މަޑުމަޑުން ރަނގަޅުވަމުންދާ ކަމަށެވެ.

މާދަމާ ފްލައި ދުބާއީގެ ދަތުރުތައް ރާއްޖެއަށް ކުރަން ހަމަޖެހިފައިވާ ކަމަށް އަމީން ވިދާޅުވިއެވެ.

ހަނގުރާމައިގެ ސަބަުބުން ހީނަރުވެފައިވާ މެދުއިރުމަތީގެ ވައިގެ ސަރަހައްދުގެ ހާލަތު މަޑުމަޑުން ރަނގަޅުވަމުންދިއުމާއެކު، ވަކި ހާއްސަ މަގުތަކަކުން ދަތުރުފަތުރުތައް އަލުން ފެށިގެން ދިއުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށް އަމީން ވިދާޅުވިއެވެ.

ވޭތުވެދިޔަ ދެ ދުވަހުގެ ތެރޭގައި، މީހުން އަނބުރާ ގައުމަށް ގެންދިއުމަށް ކުރެވުނު ގިނަ ދަތުރުތަކެއް ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް އައިސްފައިވާ ކަމަށާއި އޭގެ ތެރޭގައި އެމިރޭޓްސްގެ ބައެއް ފްލައިޓްތައް ހިމެނޭ ކަމަށް މިނިސްޓަރު ވިދާޅުވިއެވެ.

އިއްޔެ ރައީސް އޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމުގައި އަމީން ވަނީ މެދުއިރުމަތީގެ ހަނގުރާމައިގެ އަސަރު ރާއްޖޭގެ ވައިގެ ދަތުރުފަތުރުގެ ނިޒާމަށް ފޯރަމުންދާ ކަމަށް ވިދާޅުވެފައެވެ. އަދި ހަނގުރާމައިގެ ސަބަބުން ކުރާ އަސަރުގެ ގެއްލުން ކުޑަކޮށް އިތުރު އެހެން އެއަރލައިންތައް ރާއްޖެ ގެނައުމަށް މަސައްކަތް ކުރަމުންދާ ކަމަށް ވެސް ވަޒީރު އަމީން ވަނީ ވިދާޅުވެފައެވެ.