ރަމަޝާންމަހުގެ އުމްރާްއަށް ނުފުރުނު ފަރާތްތަކަށް ހާއްސަ އިންތިޒާމްތަކެއް ހައްޖު ކޯޕަރޭޝަނުން ހަމަޖައްސަނީ

އެކި ގްރޫޕްތަކުގެ ހަވާލުގައި މި ރަމަޝާން މަހު އުމްރާއަށް ދިއުމަށް ނިންމާފައިވަނިކޮށް ފްލައިޓްތައް ކެންސަލް ވުމާއި އެނޫންވެސް ދިމާވި ދަތިތަކާއި ހުރެ ފުރޭގޮތް ވެފައިނުވާ ފަރާތްތަކަށް ހާއްސަ އިންތިޒާމްތަކެއް ހައްޖު ކޯޕަރޭޝަނުން ހަމަޖެއްސުމުގެ މަސައްކަތް ފަށައިފިއެވެ.

ހައްޖު ކޯޕަރޭޝަންގެ ފަރާތުން އާއްމުކުރި ނޫސްބަޔާނެއްގައި ބުނީ ރައީސް ޑރ މުހައްމަދު މުއިއްޒުގެ ހާއްސަ އިރުޝާދުގެ ދަށުން ތަފާތު އެކި ސަބަބުތަކާހުރެ 1447 ވަނަ އަހަރުގެ ރަމަޝާން މަހުގެ އުމްރާ އަދާކުރަން ނުދެވިފައިވާ ފަރާތްތަށް ހާއްސަ އިންތިޒާމްތަކެއް ހަމަޖެއްސުމަށް އެކުންފުނިން މަސައްކަތް ކުރަމުންދާ ކަމަށެވެ.

މިއަހަރުގެ ރަމަޝާން މަހުގެ އުމްރާ އަދާކުރަން ނުވެފައިވާ ފަރާތްތަކުން އުމްރާއަށް ގެންދިއުމަށް ފްލައިޓް ޗާޓަރ ކުރުމާއި އެކޮމަޑޭޝަން ހަމަޖެއްސުމުގެ މަސައްކަތް ކުރަމުންދާ ކަމަށް ހައްޖު ކޯޕަރޭޝަންގެ ބަޔާނުގައި ވަނީ ބުނެފައެވެ. އެހެންކަމުން ދިމާވި ސަބަބަކާހުރެ މިއަހަރުގެ ރަމަޝާން މަހުގެ އުމްރާ އަދާކުރަން އެދި ނުދެފައިވާ ފަރާތްތަކަށް އެހީވުމަށް ހައްޖު ކޯޕަރޭޝަނުން ހުޅުވާލާފައިވާ ފުރުސަތުގެ ބޭނުން ހިފަން ބޭނުންވާ ފަރާތްތަކުން 06 މާޗް 2026 ވާ ހުކުރު ދުވަހުގެ މެންދުރު 12:00 ގެ ކުރިން ހައްޖު ކޯޕަރޭޝަންގެ މެއިލް އެޑްރެސް އަށް މައުލޫމާތު ފޮނުވަން ހައްޖު ކޯޕަރޭޝަނުން ވަނީ އެދިފައެވެ.

ހައްޖު ކޯޕަރޭޝަންގެ ފަރާތުން ހާއްސަ އިންތިޒާމް ހަމަޖެއްސުމާއި ގުޅޭގޮތުން އިތުރު މައުލޫމާތު ސާފުކުރަން ބޭނުންވާނަމަ އެކުންފުނީގެ ވައިބަރ ނަމްބަރ 7961012 މެދުވެރިކޮށް މައުލޫމާތު ސާފުކުރަން ވަނީ އެދިފައެވެ.

ހައްޖު ކޯޕަރޭޝަނުން އުމްރާއަށް ނުފުރިވާ އުމްރާވެރިން ފުރުވާލުވުމުގެ މަސައްކަތް ފަށާފައިވާއިރު އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވެސް ވަނީ ތަފާތު އެކި ސަބަބުތަކާއި ހުރެ ފްލައިޓްތައް ކެންސަލް ވުމުގެ ސަބަބުން އުމްރާއަށް ނުފުރި ތިބި ދިވެހިން ފުރުވާލުމުގެ މަސައްކަތް ސަރުކާރުން އިސްލާމިކް މިނިސްޓްރީ އާއި ހައްޖު ކޯޕަރޭޝަން ގުޅިގެން ކުރަން ފަށާފައިވާ ކަމަށް ވިދާޅުވެފައެވެ.

މިވަގުތު ނުފުރި ތިބި 150 އެއްހާ މީހުންގެ އިތުރުން އިތުރު މީހުންނަށް ޖާގަ ދޭނެ ކަމަށް އިސްލާމިކް މިނިސްޓަރ ވަނީ ވިދާޅުވެފައެވެ.

މެދުއިރުމަތީގައި ކުރަމުންދާ ހަނގުރާމަ އާއި ގުޅިގެން ދުނިޔޭގެ އެކި ހިސާބުތަކުން ރާއްޖެ އަންނަ ގިނަ އަދަދެއްގެ ފްލައިޓްތައް ވަނީ ކެންސަލް ކޮށްފައެވެ.