ހުޅުމާލޭ ފޭސް ދޭއްގެ ހިޔާ ފްލެޓްތަކުގެ ނުވަވަނަ ޓަވަރުގައި މީހަކު ރަހީނުކުރި މައްސަލައާ ގުޅިގެން ހައްޔަރު ކުރި 12 މީހުންގެ ބަންދުގެ މުއްދަތު ޖަހައިފިއެވެ.
ހިޔާގެ ނުވަވަނަ ޓަވަރުގައި މީހަކު ރަހީނުކޮށްފައިވާ ކަމަށް ފުލުހުންގެ އިދާރާއަށް ލިބުނު ރިޕޯޓަކާއި ގުޅިގެން، އެ އިދާރާއިން ޚާއްސަ އޮޕަރޭޝަނެއް ފަށާފައިވަނީ ބުރާސްފަތި ދުވަހުގެ ރޭ އިރާކޮޅުގެ ވަގުތެއްގައެވެ. ރަހީނުކޮށްފައިހުރި މީހާ ފުލުހުން ސަލާމަތްކޮށްފައިވަނީ، އޭނާ ރަހީނުކޮށްފައި ހުރި ހިޔާގެ ނުވަވަނަ ޓަވަރުގެ 20 ވަނަ ފަންގިފިލާގައި ހުރި 11 ވަނަ އެޕާޓްމަންޓުގެ ދޮރު ވައްޓާލައިގެން ވަދެއެވެ. ފުލުހުންގެ ވަނީ އެތަނަށް ވަދެ ރަހީނުކޮށްފައިވާ މީހާ، ފުލުހުންގެ ހިމާޔަތަށް ގެނެސްފައެވެ.
އެ މައްސަލައިގައި ހައްޔަރު ކުރި 12 މީހުންގެ ބަންދުގެ މުއްދަތު ޖަހާފައިވާއިރު ފުލުހުން މީޑިއާތަކަށް ބުނީ އެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން އޭގެ ތެރެއިން ފަސް މީހުން ފަސް ދުވަހަށް ބަންދު ކުރަން ނިންމާފައިވާ ކަމަށެވެ. ބާކީ ތިބި ހަތް މީހުން ހަތް ދުވަހަށް ބަންދު ކުރަން އަމުރު ކޮށްފައިވާ ކަމަށް ވެސް ފުލުހުން ބުންޏެވެ.
މައުލޫމާތު ލިބިފައިވާ ގޮތުގައި ފުލުހުން އެ އެޕާރޓްމެންޓަށް ވަންއިރު، ރަހީނުކޮށްފައިވާމީހާގެ ބޯބާލައި، އެ މީހުން ތިބީ އޭނާގެ އިނގިލި ބުރިކުރަން ތައްޔާރުވެގެންނެވެ. ރަހީނުކޮށްފައި ހުރީ ދިވެހި ފިރިހެނެކެއެވެ. އަދި އެ މީހާ އާއި ބެހޭ އެއްވެސް މައުލޫމާތެއް ފުލުހުންގެ އިދާރާއިން ހާމަކޮށްފައެއް ނުވެއެވެ.
ފުލުހުން އެ އެޕާރޓްމެންޓަށް ވަންއިރު، އެ ތާގައި 12 މީހުން ތިއްބެއެވެ. އަދި އެ 12 މީހުން މިހާރު ވަނީ ފުލުހުންގެ ބެލުމުގެ ދަށަށް ގެނެސްފައެވެ. ފުލުހުންގެ ޚާއްސަ އޮޕަރޭޝަން ކުރިއަށް ދިޔަވަގުތު ހޯމްލޭންޑް ސެކިއުރިޓީ، އެންޑް ޓެކްނޮލޮޖީ މިނިސްޓަރު އަލީ އިހުސާން އެ ސަރަހައްދަށް ވަޑައިގެންފައިވެއެވެ.
