ހުސްވި މަހު އެންމެ ގިނައިން ހުށަހަޅާފައިވަނީ ވައްކަމާއި އެކްސިޑެންޓްގެ މައްސަލަތައް: ފުލުހުން

މިދިޔަ ސެޕްޓެމްބަރު މަހު ފުލުހުންގެ އިދާރާއަށް އެންމެ ގިނައިން ހުށަހަޅާފައިވަނީ ވައްކަމާއި މަގުމަތީގެ އެކްސިޑެންޓްތަކުގެ އިތުރުން މަސްތުވާތަކެއްޗާ ގުޅުންހުރި މައްސަލަތައް ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ފުލުހުން ކޮންމެ މަހަކު ވެސް އާންމުކުރާ ތަފާސްހިސާބުތަކަށް ބަލާއިރު، މިދިޔަ މަހު ޖުމްލަ 934 މައްސަލައެއް ފުލުހުންނަށް ވަނީ ހުށަހަޅާފައެވެ.

މީގެ ތެރެއިން އެންމެ ގިނައީ ވައްކަމުގެ މައްސަލަތަކެވެ.

ސެޕްޓެމްބަރު މަހު ފުލުހުންނަށް ހުށަހެޅުނު މައްސަލަތަކުގެ ތަފްސީލު:

ވައްކަން ކުރުން: 278 މައްސަލަ

ޓްރެފިކް އެކްސިޑެންޓް: 224 މައްސަލަ

މަސްތުވާތަކެތީގެ މައްސަލަތައް: 166 މައްސަލަ

މުދަލަށް ގެއްލުން ދިނުން: 57 މައްސަލަ

އަނިޔާކުރުން: 50 މައްސަލަ

މަކަރާއި ހީލަތް ހެދުން: 30 މައްސަލަ

ގެވެށި އަނިޔާ: 24 މައްސަލަ

ފޭރުން: 9 މައްސަލަ

ލިޔެކިޔުން ފޯޖްކުރުން: 9 މައްސަލަ

ވައްކަމާއި ފޭރުން ފަދަ ކުށްތައް ހުއްޓުވުމަށް ފުލުހުން ހާއްސަ މަސައްކަތްތަކެއް ކުރަމުން އަންނައިރު، އޮގަސްޓް މަހާ އަޅާބަލާއިރު ސެޕްޓެމްބަރު މަހު މިފަދަ މައްސަލަތައް ވަނީ އިތުރުވެފައެވެ.

އޮގަސްޓް މަހު ވައްކަމުގެ 254 މައްސަލަ ރިޕޯޓްކޮށްފައިވާއިރު، ސެޕްޓެމްބަރު މަހު އެ އަދަދު ވަނީ 278 އަށް އަރާފައެވެ.

މީގެއިތުރުން، މަގުމަތީގެ އެކްސިޑެންޓްތަކުގެ އަދަދު ވެސް ވަނީ ފާހަގަކޮށްލެވޭ މިންވަރަކަށް އިތުރުވެފައެވެ.

އޮގަސްޓް މަހު 208 އެކްސިޑެންޓް ރިޕޯޓްކޮށްފައިވާއިރު، ސެޕްޓެމްބަރު މަހު މި އަދަދު ވަނީ 224 އަށް އުފުލިފައެވެ.

ފުލުހުންގެ ތަފާސްހިސާބުތަކަށް ބަލާއިރު، އާންމުކޮށް ކޮންމެ މަހަކު ވެސް އެންމެ ގިނައިން ރިޕޯޓްކުރެވެނީ ވައްކަމުގެ މައްސަލަތަކެވެ.

ދެވަނައަށް އެންމެ ގިނައިން ހުށަހެޅެނީ މަގުމަތީގެ އެކްސިޑެންޓްތަކުގެ މައްސަލަތަކެވެ.